(ភ្នំពេញ)៖ សហភាពសហជីពការងារកម្មករកម្ពុជា (CWLCU) ដែលមានសមាជិកជាង ២ម៉ឺននាក់ មកពីវិស័យវាយនភ័ណ្ឌ កាត់ដេរ ផលិតស្បែកជើង និងកាបូប បានបង្ហាញការកោតសរសើរ និងថ្លែងអំណរគុណរាជរដ្ឋាភិបាលកម្ពុជាដឹកនាំដោយសម្តេចមហាបវរធិបតី ហ៊ុន ម៉ាណែត មានឆន្ទៈគិតគូរដល់ផលប្រយោជន៍របស់កម្មករ និយោជិត ហើយប្រឹងប្រែងដំឡើងប្រាក់ឈ្នួលអប្បបរមាជូនកម្មករ និយោជិត បើទោះបីពិភពលោក រួមទាំងកម្ពុជាកំពុងស្ថិតក្នុងវិបត្តិសេដ្ឋកិច្ច។
សហភាពសហជីពការងារកម្មករកម្ពុជា បានគូសរំលេចថា ខ្លួនបានតាមដានយ៉ាងយកចិត្តទុកដាក់លើដំណើរការនៃការចរចាប្រាក់ឈ្នួលអប្បរមារបស់ក្រុមប្រឹក្សាជាតិប្រាក់ឈ្នួលអប្បរមា ដែលជាយន្តត្រីភាគី តាំងពីកិច្ចប្រជុំលើកទី១ រហូតមកដល់ថ្ងៃទី២៨ ខែកញ្ញា ឆ្នាំ២០២៣នេះ។
សហភាពសហជីពការងារកម្មករកម្ពុជា បានគូសបញ្ជាក់ថា «យើងខ្ញុំសង្កេតឃើញថា ការចរចានេះត្រូវធ្វើឡើងប្រកបដោយបច្ចេកទេស និងមានលក្ខណៈវិទ្យាសាស្ត្រដោយផ្អែកលើលក្ខណៈវិនិច្ឆ័យបែបសង្គម សេដ្ឋកិច្ចស្របតាមស្តង់ដាសកលដោយអង្គការអន្តរជាតិខាងការងារ»។
សហភាពសហជីពការងារកម្មករកម្ពុជា ដែលកំពុងធ្វើការផ្ទាល់ក្នុងការលើកកំពស់សិទ្ធិសេរីភាពកម្មករ ការពារសិទ្ធិកម្ម ការពារផលប្រយោជន៍ស្របច្បាប់របស់កម្មករ និយោជិតនោះ បានបង្ហាញការអបអរសារទរជាមួយកម្មករ និយោជិត ដែលទទួលបានប្រាក់ឈ្នួលអប្បរមាថ្មីចំនួន ២០៤ដុល្លារក្នុងមួយខែនៅឆ្នាំ២០២៤។ សហជីពមួយនេះ បានលើកឡើងដែរថា បើបូកប្រាក់អត្ថប្រយោជន៍ផ្សេងៗទៀត កម្មករ និយោជិតម្នាក់ទទួលបានប្រាក់ឈ្នួល ប្រចាំខែទាបបំផុតរហូតដល់ ២៣២ដុល្លារអាមេរិក ដោយមិនរាប់បញ្ចូលប្រាក់ថែមម៉ោងនោះទេ។
ជាមួយគ្នានេះ សហភាពសហជីពការងារកម្មករកម្ពុជា និងសមាជិក សមាជិកាទាំងអស់ បានថ្លែងអំណរគុណយ៉ាងជ្រាលជ្រៅបំផុតចំពោះសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីម្ពុជា ដែលតែងតែយកចិត្តទុកដាក់លើកកម្ពស់ជីវភាពកម្មករ និយោជិតទាំងអស់នៅគ្រប់កាលៈទេសៈ។ ជាពិសេសសម្ដេចធិបតី បានបន្ថែមចំនួន ២ដុល្លារ លើប្រាក់ឈ្នួលអប្បរមាចំនួន២០២ដុល្លារ សម្រាប់ឆ្នាំ២០២៤ ទោះបីជាប្រទេសនៅលើពិភពលោករួមទាំងប្រទេសកម្ពុជា កំពុងទទួលរងផលប៉ះពាល់នៃវិបត្តិសេដ្ឋកិច្ចសកល ដែលធ្វើឱ្យតម្រូវការសកលផ្នែកវាយនភណ្ឌមានការថយចុះក៏ដោយ។
សហជីពបានបង្ហាញការកត់សម្គាល់របស់ខ្លួនដែរថា ប្រទេសកម្ពុជាក្រោមការដឹកនាំរបស់សម្ដេចបវរធិបតី ហ៊ុន ម៉ាណែត គឺមិនត្រឹមតែអាចរក្សាស្ថេរភាពការងារ ជូនកម្មករ និយោជិត មិនឱ្យបាត់បង់ប៉ុណ្ណោះទេ ថែម ទាំងបានយកចិត្តទុកដាក់ក្នុងការដំឡើងប្រាក់ឈ្នួលអប្បបរមា ជូនកម្មករ និយោជិតថែមទៀត។
ពាក់ព័ន្ធការដំឡើងប្រាក់ឈ្នួលនេះ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ការដំឡើងប្រាក់ឈ្នួលនាពេលនេះ ធ្វើឱ្យកម្ពុជា ក្លាយទៅជាប្រទេសនាំចេញផលិតផលសម្លៀកបំពាក់ ស្បែកជើង កាបូប និងសម្ភារៈផ្សេងៗតែមួយគត់ ដែលបានដំឡើងប្រាក់ឈ្នួលជូនកម្មករ និយោជិត។
លោក ហេង សួរ បានឱ្យដឹងថា ប្រាក់ឈ្នួលអប្បបរមា និងប្រាក់អត្ថប្រយោជន៍ផ្សេងៗចូលគ្នា ដោយមិនគិតអំពីការថែមម៉ោង កម្មករ និយោជិតអាចទទួលបានចន្លោះពី ២២១ដុល្លារ ទៅ ២៣២ដុល្លារក្នុង ១ខែ។
របាយការណ៍ពីអង្គការផ្នែកការងារ បានបង្ហាញថា ឆ្នាំ២០២៣ ប្រាក់ឈ្នួលនៅកម្ពុជា ខ្ពស់ជាងប្រទេសចំនួន៥នៅតំបន់អាស៊ីនេះ រួមមានប្រទេសវៀតណាម មានប្រាក់ឈ្នួលចន្លោះពី ១៣៨ដុល្លារ ទៅ១៩៨ដុល្លារ, ប្រទេសស្រីលង្ការ ៣៩ដុល្លារ, ប្រទេសបង់ក្លាដែស ៧៤ដុល្លារ, ប្រទេសឡាវ ៧៥ដុល្លារ និងប្រទេសមីយ៉ាន់ម៉ា ៦៩ដុល្លារ។
បច្ចុប្បន្ននេះ កម្ពុជា មានរោងចក្រ សហគ្រាសក្នុងវិស័យវាយនភណ្ឌ កាត់ដេរ ផលិតស្បែកជើង និងផលិត ផលធ្វើដំណើរ និងកាបូបមានចំនួន១,៣៣២ និងមានកម្មករ និយោជិតប្រមាណ ៨៤ម៉ឺននាក់ ផ្តល់ចំណូល ប្រចាំឆ្នាំជិត ៣ពាន់លានដុល្លារ៕
