(ភ្នំពេញ)៖ កម្មការិនីបម្រើការងារនៅតាមរោងចក្រមួយចំនួននៅក្នុងរាជធានីភ្នំពេញ បានមើលឃើញថា ការបន្ថែមប្រាក់ឈ្នួល៤ដុល្លារសម្រាប់ឆ្នាំ២០២៤ គឺមិនច្រើននោះទេ ប៉ុន្តែជារឿងមួយដ៏ប្រសើរសម្រាប់ពួកគេក្នុងគ្រាដែលពិភពលោករួមទាំងកម្ពុជាប្រឈមនឹងវិបត្តិសេដ្ឋកិច្ចសកល។
បន្ទាប់ពីការជជែកគ្នាអស់រយៈពេល២០លើក នៅថ្ងៃទី២៨ ខែកញ្ញា ឆ្នាំ២០២៣កន្លងទៅនេះ បានរកឃើញហើយប្រាក់ឈ្នួលអប្បបរមាសម្រាប់កម្មករ និយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបក្នុងឆ្នាំ២០២៤។ ប្រាក់ឈ្នួលអប្បបរមាសម្រាប់ឆ្នាំ២០២៤ គឺ ២០៤ដុល្លារអាម៉េរិកក្នុងមួយខែ។ ក្នុងនោះ២ដុល្លារជាការព្រមព្រៀងរវាងភាគីថៅកែ និងភាគីកម្មករ និយោជិត ហើយ២ដុល្លារទៀត ជាការផ្តល់ជូនដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។
កម្មការិនីដែលកំពុងបម្រើការងារនៅតាមរោងចក្រមួយចំនួនក្នុងរាជធានីភ្នំពេញ បានបង្ហាញការពេញចិត្តចំពោះលទ្ធផលនៃការចរចាប្រាក់ឈ្នួលនេះ។ ពួកគេយល់ថា ការបន្ថែម៤ដុល្លារវាមិនច្រើននោះឡើយ ក៏ប៉ុន្តែក្នុងពេលដែលពិភពលោកកំពុងជួបវិបត្តិសេដ្ឋកិច្ចការដំឡើងបានប្រាក់ឈ្នួលនេះ ជារឿងមួយដ៏ប្រសើរ។
កម្មការិនីឈ្មោះ ទូច ស្រីនិច កំពុងបម្រើការងារនៅរោងចក្រកាត់ដេរសម្លៀកបំពាក់ហ្គ័នយ៉ាងលេបឹល បានបង្ហាញការពេញចិត្តចំពោះការដំឡើងប្រាក់ឈ្នួលនេះ។ សម្រាប់ ទូច ស្រីនិច ការមានការងារធ្វើក្នុងពេលបច្ចុប្បន្ន គឺជារឿងសំខាន់សម្រាប់រូបគេនាពេលបច្ចុប្បន្ន។ ស្រីនិច មិនចង់បានការឡើងប្រាក់ឈ្នួលច្រើន ហើយបែរជារោងចក្រត្រូវបិទទ្វារនោះឡើយ។
ស្រីនិច បានបញ្ជាក់ដូច្នេះ «មិនមែនមិនចង់បានលើសហ្នឹងទេ ចង់បានដែរ តែខ្លាចយើងចង់បានលើសហ្នឹងថៅកែបិទទ្វាររោងចក្រ អត់មានការងារធ្វើ»។
កម្មការិនីពីររូបទៀត កំពុងបម្រើការងារនៅរោងចក្រកាត់ដេរសម្លៀកបំពាក់សួនកាណាឌីយ៉ាឈ្មោះយីងយី ក៏យល់ឃើញប្រហាក់ប្រហែលនឹងកម្មការិនី ស្រីនិច ផងដែរ។ កញ្ញា ចន្ធូ និងកញ្ញា ចំប៉ា បានយល់ឃើញថា ការដំឡើងបានប្រាក់ឈ្នួល៤ដុល្លារបន្ថែមនៅឆ្នាំ២០២៤ គឺជារឿងប្រសើរមួយ។ ពួកគេនឹងកើនប្រាក់ឈ្នួលជាងពេលបច្ចុប្បន្ន នៅពេលមានការថែមម៉ោង។ ចន្ធូ និង ចំប៉ា ក៏មើលឃើញដែរថា ក្នុងស្ថានភាពបច្ចុប្បន្នការទាមទារឱ្យដំឡើងប្រាក់ឈ្នួលខ្ពស់ មិនមែនជារឿងល្អនោះឡើយ។
ការចរចាប្រាក់ឈ្នួលសម្រាប់ឆ្នាំ២០២៤ ជារឿងមួយដ៏តាន់តឹងបំផុត។ ដើមឡើយភាគីថៅកែរោងចក្រមានបំណងដំឡើងត្រឹមតែ១ដុល្លារប៉ុណ្ណោះ។ ប៉ុន្តែក្រោមកិច្ចសម្របសម្រួលរបស់ក្រសួងការងារ និងបណ្តុះបណ្តាលវិជ្ជាជីវៈ ជាពិសេសការជំរុញរបស់សម្តេចមហាបវរធិបតី ហ៊ុន ម៉ាណែត ទើបធ្វើឱ្យភាគីថៅកែរោងចក្រព្រមដំឡើងដល់ ២ដុល្លារ។ ការដំឡើង២ដុល្លារ សម្តេចធិបតី ហ៊ុន ម៉ាណែត មើលឃើញថា ជាចំនួនមួយតិចតួចសម្រាប់កម្មករ និយោជិត អាស្រ័យហេតុនេះសម្តេចក៏បន្ថែម២ដុល្លារទៀត។
កម្មការិនី បានមើលឃើញថា ការតស៊ូជជែកក្នុងការដំឡើងប្រាក់ឈ្នួល និងការបន្ថែមប្រាក់ឈ្នួលពីសំណាក់សម្តេចធិបតី ហ៊ុន ម៉ាណែត គឺជាការស្តែងឱ្យឃើញនូវមនោសញ្ចេតនា និងការគិតគូរខ្ពស់របស់សម្តេចធិបតី ទៅលើសុខទុក្ខរបស់កម្មករ និយោជិត និងការចង់ឱ្យជីវភាពរបស់ពួកគេបានល្អប្រសើរ។
បើទោះបីបានបង្ហាញការពេញចិត្តនឹងការដំឡើងប្រាក់ឈ្នួលដល់២០៤ដុល្លារក្នុងឆ្នាំ២០២៤យ៉ាងណាក្តី តែកម្មការិនីខាងលើនេះ ក៏បានសំណូមដល់សម្តេចធិបតី ហ៊ុន ម៉ាណែត ជួយដាក់ចេញវិធានការនានាជួបទប់ស្កាត់កុំឱ្យមានការដំឡើងថ្លៃឈ្នួលបន្ទប់ដែលពួកគេជួលស្នាក់នៅ។
សូមបញ្ជាក់ថា បច្ចុប្បន្ននេះ កម្ពុជា មានរោងចក្រ សហគ្រាសក្នុងវិស័យវាយនភណ្ឌ កាត់ដេរ ផលិតស្បែកជើង និងផលិត ផលធ្វើដំណើរ និងកាបូបមានចំនួន១,៣៣២ និងមានកម្មករ និយោជិតប្រមាណ ៨៤ម៉ឺននាក់ ផ្តល់ចំណូល ប្រចាំឆ្នាំជិត ៣ពាន់លានដុល្លារ។
លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានអះអាងថា ការដំឡើងប្រាក់ឈ្នួលនាពេលនេះ ធ្វើឱ្យកម្ពុជា ក្លាយទៅជាប្រទេសនាំចេញផលិតផលសម្លៀកបំពាក់ ស្បែកជើង កាបូប និងសម្ភារៈផ្សេងៗតែមួយគត់ ដែលបានដំឡើងប្រាក់ឈ្នួលជូនកម្មករ និយោជិត។
លោក ហេង សួរ បានឱ្យដឹងថា ប្រាក់ឈ្នួលអប្បបរមា និងប្រាក់អត្ថប្រយោជន៍ផ្សេងៗចូលគ្នា ដោយមិនគិតអំពីការថែមម៉ោង កម្មករ និយោជិតអាចទទួលបានចន្លោះពី ២២១ដុល្លារ ទៅ ២៣២ដុល្លារក្នុង ១ខែ។
របាយការណ៍ពីអង្គការផ្នែកការងារ បានបង្ហាញថា ឆ្នាំ២០២៣ ប្រាក់ឈ្នួលនៅកម្ពុជា ខ្ពស់ជាងប្រទេសចំនួន៥នៅតំបន់អាស៊ីនេះ រួមមានប្រទេសវៀតណាម មានប្រាក់ឈ្នួលចន្លោះពី ១៣៨ដុល្លារ ទៅ១៩៨ដុល្លារ, ប្រទេសស្រីលង្ការ ៣៩ដុល្លារ, ប្រទេសបង់ក្លាដែស ៧៤ដុល្លារ, ប្រទេសឡាវ ៧៥ដុល្លារ និងប្រទេសមីយ៉ាន់ម៉ា ៦៩ដុល្លារ៕
