(សៀមរាប)៖ លោកស្រី គួយ ណាលីន ឃឹម ប៊ុនសុង ប្រធានកិត្តិយសសមាគមនារីកម្ពុជា ដើម្បីសន្តិសុខ និងអភិវឌ្ឍន៍និងជាអនុប្រធាន សាខាកាកបាទក្រហមយុវជនកម្ពុជា ខេត្តសៀមរាប នារសៀលថ្ងៃទី១១ ខែសីហា ឆ្នាំ២០១៦ នេះ បាននាំយកអំណោយផ្ដល់ជូនគ្រួសារ ងាយរងគ្រោះ៥០គ្រួសារ ក្នុងស្រុកប្រាសាទបាគង ចំនួន៤ឃុំ រួមមាន ឃុំត្រពាំងធំ ចំនួន២០គ្រួសារ ឃុំបាគង ចំនួន១០គ្រួសារ ឃុំរលួស ចំនួន១០គ្រួសារ និងឃុំមានជ័យ ចំនួន១០គ្រួសារ។
អំណោយដែលលោកជំទាវប្រធាន បានផ្ដល់ជូននោះ គឺក្នុងមួយគ្រួសារទទួលបាន សារុង១ ក្រមា១ ទឹកដោះគោ១កំប៉ុង សាប៊ូលុច១ដុំ ថ្នាំដុះធ្មេញ១បំពង់ ច្រាសដុះធ្មេញ១ នំ១ធុង សាប៊ូម្សៅ១កញ្ចប់ ទឹកត្រី១យួរ ទឹកស៊ីអ៉ីវ១យួរ ប្រេងឆា១ដប ប៊ីចេង១កញ្ចប់ អំបិល១កញ្ចប់ ស្ករស១កញ្ចប់ ប្រេងកូឡា១ដប អង្ករ២៥គ.ក្រ ភួយ១ និងថវិកា៤០,០០០រៀល។
លោកស្រីបានថ្លែងនាឱកាសនោះឲ្យដឹងថា ទោះបីជាអំណោយទាំងនេះ មានចំនួនតិចតួចក្ដី ក៏វាជាផ្នែកមួយជួយកាត់បន្ថយភាពខ្វះខាត របស់បងប្អូនបានមួយកម្រិតផងដែរ។ ទន្ទឹមនឹងនោះ លោកស្រីបានផ្ដែផ្ដាំដល់បងប្អូន ប្រជាពលរដ្ឋថា ដោយរដូវនេះជារដូវភ្លៀងធ្លាក់ សូមបងប្អូនប្រុងប្រយ័ត្ន ក្នុងការថែរក្សាសុខភាព ក៏ដូចជាការពារកូនចៅ ជៀសវាងពីមូសខាំ ដែលអាចបង្កឲ្យកើតជំងឺគ្រុនឈាម និងការពារ ខ្លួនពីគ្រោះធម្មជាត់ ដែលអាចកើតឡើង ជាយថាហេតុនានា៕
