(ម៉ានីល)៖ រដ្ឋមន្ត្រីការបរទេសហ្វីលីពីន លោក Perfecto Yasay នៅថ្ងៃព្រហស្បតិ៍នេះ បានអំពាវនាវឲ្យរដ្ឋាភិបាលចិន ឲ្យគោរពច្បាប់ដែនសមុទ្រ និងនីតិរដ្ឋ ដើម្បីដោះស្រាយដោយសន្ដិវិធីទៅលើទំនាស់ទាំងនៅក្នុងសមុទ្រចិនខាងត្បូង និងសមុទ្រចិនខាងកើត។ នេះបើយោងតាមការចេញផ្សាយរបស់សារព័ត៌មាន Channel News Asia នៅថ្ងៃទី១១ ខែសីហា។
«យើង...ជំរុញឲ្យប្រទេសចិន ត្រូវតែគោរព និងអនុវត្តតាមច្បាប់សមុទ្រជាដាច់ខាត»។ នេះជាសំដីរបស់លោក Yasay ថ្លែងទៅកាន់អ្នកសារព័ត៌មាន ក្រោយពីបញ្ចប់កិច្ចប្រជុំទ្វេភាគីជាមួយនឹងសហភាគីជប៉ុន ទៅលើបញ្ហាសមុទ្រចិនខាងត្បូង និងខាងកើត។
ថ្ងៃទី១២ ខែកក្កកដា កន្លងទៅនេះ តុលាការអន្តរជាតិឡាអេ បានប្រកាសសម្រេចកាត់ក្ដីឲ្យប្រទេសហ្វីលីពីន ឈ្នះចិន ទៅលើជម្លោះសមុទ្រចិនខាងត្បូង ប៉ុន្តែចិនមិនព្រមទទួលយកការសម្រេចរបស់តុលាការនោះទេ។
គួរបញ្ជាក់ផងដែរថា ជប៉ុនមានទំនាស់ជាមួយចិន នៅសមុទ្រចិនខាងកើត ខណៈដែលហ្វីលីពីនមានទំនាស់ជាមួយចិន នៅសមុទ្រចិនខាងត្បូង៕
