(កំពត)៖ ជនជាតិចិន៧នាក់ ក្នុងស្រី៥នាក់ បានរងរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍រថយន្តម៉ាកសាំងយ៉ុង បុករថយន្តហ៊ីយ៉ាន់ដាយដឹកទំនិញ នៅម៉ោង២៖១០នាទីរសៀលថ្ងៃទី១១ ខែសីហា ឆ្នាំ២០១៦នេះ ស្ថិតនៅចំណុចក្បែរស្ពានទ្វារថ្មី លើកំណាត់ផ្លូវជាតិលេខ៣ កំពត-ភ្នំពេញ ក្នុងភូមិទ្វារថ្មី ឃុំព្រៃថ្នង ស្រុកទឹកឈូ ខេត្តកំពត។

មន្ដ្រីនគរបាលចរាចរ បានឲ្យដឹងថា ជនរងគ្រោះទាំង៧នាក់ ក្នុងនោះស្រី៥នាក់ សុទ្ធតែជាជនជាតិចិន ជិះលើរថយន្តសាំងយ៉ុង ពណ៌ស ពាក់ស្លាកលេខ សៀមរាប 2B-1327 ក្នុងទិសដៅធ្វើដំណើរមកពីក្រុងភ្នំពេញ ឆ្ពោះទៅចូលទីរួមខេត្តកំពត លុះដល់ចំណុចខាងលើ រថយន្ដក៏បានបុកគ្នាជាមួយរថយន្តម៉ាកហ៊ីយ៉ាន់ដាយដឹក ក្នុងទិសដៅបញ្ជ្រាស់គ្នា។

មន្ដ្រីនគរបាលបានបន្ដទៀតថា ក្រោយហេតុការណ៍ អ្នកបើកបររថយន្តហ៊ីយ៉ាន់ដាយ បានចុះរត់គេចខ្លួនបាត់ ចំណែកអ្នករងរបួសធ្ងន់ស្រាល ត្រូវបានរថយន្តសង្គ្រោះមកដឹកនាំយក ទៅព្យាបាលនៅមន្ទីរពេទ្យ រីឯរថយន្ដទាំង ២ត្រូវបានសមត្ថកិច្ចយក ទៅរក្សាទុកនៅអធិការដ្ឋាននគរបាលស្រុក ដើម្បីដោះស្រាយតាមនីតិវិធី៕