(ភ្នំពេញ)៖ នៅព្រឹកថ្ងៃពុធ ទី២៧ ខែកញ្ញា ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឱ្យលោក ផាតទ្រីក មូហ្វី (Patrick Murphy) ចូលជួបសម្តែងការគួរសម និងពិភាក្សាការងារ។ ជំនួបនេះ បានធ្វើឡើងនៅវិមានសន្តិភាព។
លោកឯកអគ្គរដ្ឋទូត មូហ្វី ត្រូវបានតែងតាំងជាឯកអគ្គរដ្ឋទូតប្រចាំនៅកម្ពុជា នៅថ្ងៃទី៨ ខែសីហា ឆ្នាំ២០១៩។ លោកជាមន្ត្រីអាជីពជាន់ខ្ពស់ម្នាក់នៅក្នុងក្រសួងការបរទេស និងបានដឹកនាំការិយាល័យទទួលបន្ទុកកិច្ចការតំបន់អាស៊ីខាងកើត និងប៉ាស៊ីហ្វិក របស់ក្រសួងការបរទេសសហរដ្ឋអាមេរិក ពីឆ្នាំ២០១៨ ដល់ឆ្នាំ២០១៩ ជាមន្ត្រីជាន់ខ្ពស់ប្រចាំនៅការិយាល័យ (ឧបការីររដ្ឋមន្ត្រីស្តីទី)។ លោកបានធ្វើជាឧបការីរងរដ្ឋមន្ត្រីក្រសួងការបរទេសទទួលបន្ទុកតំបន់អាស៊ីអាគ្នេយ៍ពីឆ្នាំ ២០១៦ ដល់ឆ្នាំ២០១៨។
ជាការកត់សម្គាល់ ក្រោយពេលបង្កើតរាជរដ្ឋាភិបាលថ្មីរយៈពេលជាងមួយខែនេះ សម្តេចធិបតី ហ៊ុន ម៉ាណែត បានជួបមន្ត្រីរបស់អាមេរិកចំនួន៣លើកហើយ។ លើកទី១ សម្តេចធិបតី ហ៊ុន ម៉ាណែត ទទួលជួបគណ:ប្រតិភូមន្ត្រីព្រឹទ្ធសភាអាមេរិក ដឹកនាំដោយលោក អាឡិច ខានស៍ (Alex Carnes) ក្រឡាបញ្ជីនៃក្រុមភាគច្រើនរបស់អនុគណ:កម្មាធិការស្តីពីប្រតិបត្តិការរបស់រដ្ឋ និងបរទេស និងកម្មវិធីពាក់ព័ន្ធនានា របស់គណ:កម្មាធិការគ្រប់គ្រង និងបែងចែកថវិកាជាតិរបស់ព្រឹទ្ធសភាអាមេរិក។ ជំនួបធ្វើឡើងនៅវិមានសន្តិភាពនាល្ងាចថ្ងៃទី២៨ ខែសីហា ឆ្នាំ២០២៣ នៅវិមានសន្តិភាព។
ជំនួបលើកទី២ សម្តេចធបិតី ហ៊ុន ម៉ាណែត ទទួលជួបលោកស្រី វ៉ិចតូរីយ៉ា នូលែន អនុរដ្ឋមន្ត្រីការបរទេសស្តីទីអាមេរិក។ ជំនួបធ្វើឡើងនៅថ្ងៃទី២២ ខែកញ្ញា ឆ្នាំ២០២៣ នាទីក្រុងញូវយ៉ក សហរដ្ឋអាមេរិក ពេលសម្តេចធិបតីអញ្ជើញចូលរួមថ្លែងសុន្ទរកថានៅមហាសន្និបាតអង្គការសហប្រជាជាតិ។
ជំនួបលើកទី៣ សម្តេចធិបតី ហ៊ុន ម៉ាណែត ទទួលជួបលោក មូហ្វី ឯកអគ្គរដ្ឋទូតអាមេរិក។ ធ្វើនៅព្រឹកថ្ងៃទី២៧ ខែកញ្ញា ឆ្នាំ២០២៣នេះ នៅវិមានសន្តិភាព៕
