(ភ្នំពេញ)៖ ខ្មាន់កាំភ្លើងបាញ់ប្លន់យកម៉ូតូ នៅមុខហាងកាហ្វេដេលី ខណ្ឌចំការមន ដែលបណ្តាលឲ្យយុវជនម្នាក់រងរបួសធ្ងន់នោះ ត្រូវបានចាប់ខ្លួនហើយ នៅខណ្ឌដូនពេញ នាថ្ងៃទី១១ ខែសីហា ឆ្នាំ២០១៦នេះ។
មន្រ្តីនគរបាលខណ្ឌដូនពេញ បានឲ្យដឹងថា នៅវេលាម៉ោង១៖៣០នាទីរំលងអាធ្រាត្រ ចូលថ្ងៃទី១១ ខែសីហា ឆ្នាំ២០១៦នេះ កម្លាំងផ្នែកយុត្តិធម៌ ខណ្ឌដូនពេញ សហការជាមួយកម្លាំងនគរបាលព្រហ្មទណ្ឌកម្រិតស្រាល និងកម្លាំងអន្តរាគមន៍ពិសេស បានចាប់ខ្លួនជនដៃដល់រូបនេះ នៅម្តុំលក់ផ្កា ផ្លូវលេខ៥៩៨ ក្រោយពីបើកម៉ូតូគេចខ្លួនពីម្តុំស្ពាននាគ ខណ្ឌដូនពេញ។
ជនដៃដល់រូបនេះមានឈ្មោះ ខាត់ សុឃីម ហៅកូ អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលលេខ ៣០E ផ្លូវជាតិលេខ៤ សង្កាត់ចោមចៅ ខណ្ឌពោធិ៍សែនជ័យ ដែលជននេះបានបាញ់ជនរងគ្រោះមានឈ្មោះ ប៉ិន ថារ៉ាត់ អាយុ១៩ឆ្នាំ មុខរបរបុគ្គលិកក្រមហ៊ុន ស្នាក់នៅផ្ទះជួល ម្តុំត្រឡោកបែក ខណ្ឌទួលគោក រងរបួសត្រង់ក្រោមស្មាខាងឆ្វេងធ្លាយ ដោះខាងស្តាំ និងភ្លៅខាងស្តាំ ហើយកំពុងសម្រាកព្យាបាលនៅមន្ទីរពេទ្យកាល់ម៉ែត។
ក្រោយការចាប់ខ្លួនកម្លាំងនគរបាល បានដកហូតម៉ូតូមួយគ្រឿង ម៉ាក C125 ពណ៌ខ្មៅ ឆ្នាំ២០១៦ គ្មានស្លាកលេខ។
សូមបញ្ជាក់ថា យុវជនម្នាក់បានរងរបួសធ្ងន់ធ្ងរ ដោយត្រូវក្រុមចោរប្លន់ប្រដាប់អាវុធមួយក្រុម បាញ់ប្រហារចំនួន២គ្រាប់ ប្លន់យកម៉ូតូ Dream សេរីឆ្នាំ២០១៦ មួយគ្រឿងទៅបាត់។
ហេតុការណ៍បាញ់ប្លន់បណ្តាលឲ្យជនរងគ្រោះរងរបួសធ្ងន់ខាងលើនេះ គឺបានកើតឡើងតាមបណ្តោយមហាវិថីព្រះសីហនុ កែងនិងផ្លូវ១១៣ ស្ថិតក្នុងសង្កាត់បឹងកេងកង ទី២ខណ្ឌចំការមន នាម៉ោង១៖៣០នាទីរំលងអាធ្រាត្រ ឈានចូលថ្ងៃ ទី១០ ខែសីហា ឆ្នាំ២០១៦។
នៅមោ៉ងខាងលើគេបានឃើញជនរងគ្រោះជិះម៉ូតូមួយគ្រឿងតែម្នាក់ឯងតាមមហាវិថីព្រះសីហនុ លុះជិះមកដល់ចំណុចកើតហេតុត្រង់មុខហាង ដេលីកាហ្វេ ជនរងគ្រោះបានឈប់ម៉ូតូ បំរ៉ុងបត់ជើងតូច ភ្លាមនោះៗ ក៏បានលេខមុខក្រុមប្លន់ប្រដាប់អាវុធមួយក្រុម និងប្រើប្រាស់កាំភ្លើងខ្លីផងនោះបានធ្វើសកម្មភាព បាញ់សំដៅមកលើជនរងគ្រោះចំនួន២គ្រាប់ បណ្តាលឲ្យជនរងគ្រោះរងរបួសធ្ងន់ប្រកាច់ដេកដួល នៅក្នុងថ្លុកឈាមគួរអោយអាសូរ បន្ទាប់មកក្រុមចោរប្លន់ប្រដាប់អាវុធទាំងនោះ បានយកម៉ូតូរបស់ជនរងគ្រោះ ជិះចេញពីកន្លែងបាញ់ប្លន់ទៅដោយសុវត្ថិភាព៕
