(ភ្នំពេញ)​៖ ខ្សែភាពយន្តរឿងភាគរបស់ខ្មែរចំនួន៥រឿង នឹងបង្ហាញវត្តមានឆាប់ៗ នៅលើស្ថានីយទូរទស្សន៍ PNN បន្ទាប់ពីមានការហការគ្នាផលិត រវាងភាគីទូរទស្សន៍​PNN ជាមួយបណ្តាម្ចាស់ផលិតកម្ម ដែលសុទ្ធសឹងតែស្ថិតក្រោមការផលិត និងដឹកនាំដោយផលិតកម្មល្បីៗក្នុងស្រុក ដែលមហាជនទទួលស្គាល់ ពីស្នាដៃការផលិតរឿង កន្លងមក​។

ថ្លែងក្នុងសន្និសីទសាព័ត៌មាន នាព្រឹកថ្ងៃទី១០ខែសីហា ឆ្នាំ២០១៦ ធ្វើឡើងនៅ​ស​ណ្ឋា​​គារភ្នំពេញ នាយកគ្រប់គ្រងស្ថានីយទូរទស្សន៍ PNN លោក Glen Felgate បានមានប្រសាស​ន៍ថា​ ផលិតកម្មដែលសហការ​​ផលិត​ភាពយន្តភាគខ្មែរ ដើម្បីចាក់បញ្ចាំង​នៅលើស្ថានីទូរទស្សន៍ PNN នោះរួមមាន​ ផលិតកម្មខ្មែរមេគង្គ,ផលិតកម្ម​អិល​ឌីភិចឆ័រ,​ផលិតកម្មអែតម្ញូហ្សិក, ផលិត​កម្មអេ​ហ្វ​ស៊ីអា និងផលិតកម្មមហាហង្ស។

លោក Glen Felgate បានលើកឡើងទៀតថា យើងបានចំណាយពេលវេលា និងកិច្ចខិតខំ​ប្រឹង​ប្រែងយ៉ាងច្រើន ក្នុងការជ្រើសរើសភាពយន្តខ្មែរ ដែលល្អបំផុត សម្រាប់អ្នកទស្សនា ហើយក៏មានទំនុកចិត្តថា ទស្សនិកជន PNN នឹងពេញចិត្តសាច់រឿងទាំងនោះ គុណភាពនៃការផលិត និ​ងការ​សម្តែងរបស់តួអង្គនីមួយៗ នៅក្នុងសាច់រឿង។ តាមរយៈខ្សែភាពយន្តភាគខ្មែរនេះ PNN រំពឹងដែរថា នឹងទទួលបានការគាំទ្រ ពីទស្សនិកជនកាន់តែច្រើនបន្ថែមទៀត ខណៈវត្តមាននៃសិល្បករ-សិល្បការិនីល្បីៗ ​ចំនួន១៦រូប ក៏ជាតួសម្តែងនៅក្នុងរឿងភាគចំនួន៥របស់PNN​ ដែលនឹង​ចាប់ផ្តើមចាក់បញ្ចាំងជាលើកដំបូង នៅលើកញ្ចក់ទូរទស្សន៍ PNN នៅដើមខែកញ្ញា​ខាងមុខនេះ។

នាយកគ្រប់គ្រងស្ថានីយទូរទស្សន៍ PNN លោក Glen Felgate បានបន្តថា ពួកយើង​បានចំណា​យ​ទឹកប្រាក់យ៉ាងសន្ធឹកសន្ធាប់ ទៅលើដំណើរការផលិត​ខ្សែ​ភាពយ​ន្ត​ទាំងនោះ។​ ក្រោយពី​បា​ន​ខិតខំ​ប្រឹ​ងប្រែង សម្រិតសម្រាំងយកខ្សែភាពយន្តខ្មែរ ដែ​លល្អ និងគួរឲ្យទាក់ទាញជូនដល់​​ទូរ​ទស្ស​និ​ជន ភីអិនអិន ហើយ​ពួកយើងក៏បានត្រៀមរួចរាល់ជាស្រេច ក្នុង​ការសម្ពោធ និងផ្សព្វផ្សា​យ​ពីខ្សែ​ភាពយ​ន្ត​ខ្មែរល្អទាំងអស់នេះ ជូនដល់សាធារណៈជន។

ទន្ទឹមគ្នានេះ លោក Glen Felgate បានបន្ថែមថា ភី​អិនអិន ​បា​ន​ចាត់ទុករឿង​ភាគខ្មែរ​ គឺ​សំ​ខាន់ខ្លាំងណាស់។ ផលិតកម្ម ដែលត្រូវ​បានជ្រើ​ស​រើសហ​កា​រ​ជាដៃគូ គឺសុទ្ធសឹងតែល្បីឈ្មោះ​ ក្នុងការផលិតភាពយន្ត។ រីឯតារាសិល្បៈដែលចូលរួមសម្តែង ក្នុងភាពយន្តភាគត្រូវចាក់បញ្ចាំង លើកញ្ចក់ទូរទស្សន៍ PNN គឺសុទ្ធសឹងជាកំពូលតារាល្បីលល្បាញ ប្រចាំប្រទេស ហើយក៏នឹងធ្វើឲ្យតារាផ្សេងទៀត នៅក្នុងភាពយន្តរបស់យើង ល្បីឈ្មោះផងដែរ។

សូមជម្រាបថា ពិធី​សន្និសី​ទ​​សាព័ត៌មាន ស្តីពីការបើសម្ពោធខ្សែភាពយន្តខ្មែរ របស់ស្ថានីយ​ទូរទស្សន៍ PN​N ព្រឹកមិញនេះ ក៏មានវត្តមាន​តារាសម្តែងល្បីឈ្មោះប្រុស-ស្រី​ចូលរួមផងដែរ​រួមមាន​ ​កញ្ញា ម៉ាក សែនសូនីតា ហៅ តូតា ,លោក អេ​តវីន,លោក លឹម ជា​ឡាយ ,កញ្ញា គៀត សុវ​ណ្ណា​ឡាង ,កញ្ញា សាឡាត់ ស្រីឡាង ,លោក ហេង នរៈកក្កដា ,លោក ស​ន កាយ៉ាឌី ,កញ្ញា ឡា​យ សម្ផស្ស ,កញ្ញា ចេស៊ីកា ,លោក អ៊ុន សុទ្ធា ,កញ្ញា មឿន ផាណែត,លោក ឈិន សក​ក្កដា ,ក​ញ្ញា ប៊ីរីយ៉ា,អ្នកនាង ស្វែង សុជាតា ,លោក អ៊ូន ឧស្សាហ៍ និងតារាទឹកភ្នែក នី មុនីនាថ។

យ៉ាងណាមិញស្ថានីយទូរ​ទស្សន៍ PNN ក៏បានប្តេជ្ញាចិត្តក្នុងការផលិតខ្សែភាពយន្តភាគ ក្នុងស្រុកឲ្យបានច្រើនជាងមួយរយម៉ោង ក្នុងឆ្នាំ២០១៦នេះ ដើម្បីចាក់ផ្សាយជូន​ទស្សនិកជន ហើយគិតជាមធ្យម ភីអិនអិន ត្រូវចំណាយប្រមាណ៨០០០ដុល្លារ ក្នុងរយៈពេល១ម៉ោង នៃខ្សែភាពយន្តភាគ ហើយភាពយន្តភាគទាំងនោះ ដែលនឹងបង្ហាញនៅលើកញ្ចក់ទូរទស្សន៍ ភីអិនអិន គឺជាផ្នែកមួយក្នុងការបង្ហាញ ពីវប្បធម៌ប្រពៃណី ក៏ដូចជាជីវិតក្នុងសម័យបច្ចុប្បន្ន៕