(កែប)៖ លោកបណ្ឌិត សោម ពិសិដ្ឋ អភិបាលខេត្តកែប ព្រមទាំងមន្ត្រីពាក់ព័ន្ធ នាថ្ងៃទី១៥ ខែកញ្ញា ឆ្នាំ២០២៣ បាននាំយកសម្ភារបរិក្ខាពេទ្យមួយចំនួនធំដែលជាអំណោយរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវ ពេជ ចន្ទមុន្នី ជូនដល់មន្ទីរពេទ្យបង្អែកខេត្តកែប ដើម្បីបម្រើជូនប្រជាពលរដ្ឋក្នុងវិស័យសុខាភិបាល។
នាឱកាសនោះ លោកអភិបាលខេត្ត សោម ពិសិដ្ឋ បានថ្លែងថា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា សម្តេចតែងតែយកចិត្តទុក្ខដាក់ខ្ពស់នូវសុខទុក្ខរបស់ប្រជាពលរដ្ឋ នៅទូទាំងប្រទេស។
ដោយឡែកខេត្តកែប តាមរយៈរូបលោកផ្ទាល់ ជាអភិបាលខេត្តកែប សម្តេចតែងតែគិតគូរផ្តល់អំណោយជាគ្រឿងឧបភោគ បរិភោគ សម្ភារបរិក្ខាពេទ្យ ដើម្បីជីវភាព និងសុខុមាភាពប្រជាពលរដ្ឋនៅមូលដ្ឋានជុំវិញទូទាំងខេត្តកែបនេះផងដែរ។
ទន្ទឹមនេះ លោកអភិបាលខេត្ត ក្នុងនាមរដ្ឋបាលខេត្ត បានគោរពថ្លែងអំណរគុណយ៉ាងជ្រាលជ្រៅបំផុត និងសូមគោរពជូនពរបវរមហាប្រសើរគោរពជូនចំពោះសម្តេចធិបតី ហ៊ុន ម៉ាណែត និងលោកជំទាវ ពេជ ចន្ទមុន្នី ព្រមទាំងបុត្រា បុត្រី សូមបានសមប្រកបដោយពុទ្ធពរទាំងបួនប្រការកុំបីឃ្លៀងឃ្លាតឡើយ។
សម្ភារជាអំណោយ ដែលផ្ដល់ឱ្យមន្ទីរពេទ្យបង្អែកខេត្តកែប រួមមាន៖
*១- សម្ភារៈថែទាំអ្នកជំងឺ, សម្ភារជំនួយមន្ទីរពិសោធន៍, សម្ភារជំនួយផ្លូវដង្ហើម, សម្ភារបរិក្ខារផ្សេងៗ ចំនួន ២០០មុខ
*២- អាវពេទ្យចំនួន ១.៤៤០ អាវ
*៣- ខ្នើយកើយចំនួន ១០០ខ្នើយ
*៤- សស្រោមដៃ ចំនួន១៥.០០០ស្រោម
*៥- អាវអ្នកជំងឺ ចំនួន ៣.០០០អាវ
*៦- អាវកំរិត២ ចំនួន ៧.៥០០អាវ
*៧- ជើងរៀនដើរ ចំនួន ២០គ្រឿង
*៨- គ្រែពិនិត្យរោគស្រ្តី ចំនួន ១សម្រាប់ផងដែរ៕
