(ភ្នំពេញ)៖ កុមារី អាត ស្រីនុ ដែលមានបញ្ហាពោះវៀនធំ ត្រូវបានវះកាត់បិទប្រហោងពោះវៀន និងដោះពោះវៀនដែលប្រទាក់គ្នា ដើម្បីទាញភ្ជាប់មករន្ធគូទវិញ ដោយជោគជ័យហើយ។
លោកវេជ្ជបណ្ឌិត គី សន់ទី ប្រធានមន្ទីរពេទ្យគន្ធបុប្ឆាកម្ពុជា បានប្រាប់អង្គភាពព័ត៌មាន Fresh News ថា បន្ទាប់ពីការសម្រាកនៅមន្ទីរពេទ្យ និងទទួលការតាមដានសុខភាពអស់រយៈពេល៣ថ្ងៃ នៅព្រឹកថ្ងៃពុធ ទី១៣ ខែកញ្ញា ឆ្នាំ២០២៣នេះ ក្រុមគ្រូពេទ្យមន្ទីរពេទ្យគន្ធបុប្ផា ចាប់ផ្តើមវះកាត់បិទប្រហោងពោះវៀន និងដោះពោះវៀនដែលប្រទាក់គ្នា ដើម្បីទាញភ្ជាប់មករន្ធគូទវិញ។
លោកវេជ្ជបណ្ឌិត បានឱ្យដឹងថា ការវះកាត់មានការស្មុគស្មាញច្រើន និងប្រើរយៈពេលវះកាត់រហូតដល់ទៅ៤ម៉ោង ដោយវេជ្ជបណ្ឌិតដែលមានជំនាញខ្ពស់ចំនួន៣នាក់។ ក្រោយពេលវះកាត់ កុមារី ស្រីនុ បានដឹងខ្លួន ហើយស្គាល់ឪពុកម្តាយ ប៉ុន្តែត្រូវតាមដានបន្តទៅលើដំណើរការ ពោះវៀនធំ ដែលខ្សោយនោះ តើមានដំណើរ ឬអត់ដំណើរការ នៅដំណាក់កាលបន្ទាប់ និងតាមដាននូវហានិភ័យក្រោយវះកាត់បន្តទៀត។
សូមបញ្ជាក់ថា កុមារី អាត ស្រីនុ កើតមានជំងឺខ្សោយពោះវៀនធំបណ្តាលមកពីគ្មានសរសៃប្រសាទពីកំណើត។ កុមារីធ្លាប់បានសម្រាកពេទ្យនៅមន្ទីរពេទ្យគន្ធបុប្ផាភ្នំពេញចំនួន៤ដង ចាប់ពីខែមករា ឆ្នាំ២០២១ ហេីយបានទទួលកាវះកាត់ចំនួន៣ដងរួចមកហើយ។ កុមារីរូបនេះ ត្រូវបានចោះពោះវៀនធំចំហមកក្រៅពោះ (Colostomy) កាលពីថ្ងៃទី២៧ ខែកញ្ញា ឆ្នាំ២០២២។ ចុងក្រោយត្រូវបានវះកាត់នៅមន្ទីរពេទ្យជ័យវរ្មន័ទី៧ ចំនួន១ដងនៅខែមករា ឆ្នាំ២០២២ ជាមួយរោគវិនិច្ឆ័យស្ទះពោះវៀន។
កាលពីថ្ងៃទី៩ ខែកញ្ញា ឆ្នាំ២០២៣ ស្ត្រីជាម្តាយ ដែលមានមុខរបរជាកម្មកររោងចក្រសាប្រីណា (sabrina) បានបីកូនស្រីមានបញ្ហាពោះវៀននេះ ទៅចូលរួមក្នុងពិធីសំណេះសំណាល ធ្វើឡើងក្រោមសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងបំណងស្វែងរកកិច្ចអន្តរាគមន៍ពីសម្តេចជួយព្យាបាលកូនស្រីរបស់ខ្លួន។
មិនខកបំណងនោះឡើយ ពេលអញ្ជើញទៅដល់ទីតាំងកម្មវិធីភ្លាមសម្តេចមហាបវរធិបតី ហ៊ុន ម៉ាណែត ក៏បានដើរសំដៅឆ្ពោះទៅកាន់កម្មការិនី ហៀង ចាន់ ដែលកំពុងបីកូនស្រីមានបញ្ហាពោះវៀននោះ។ បន្ទាប់មកសម្តេចធិបតី បានបញ្ជាលោកស្រី យក់ សម្បត្តិ រដ្ឋលេខាធិការក្រសួងសុខាភិបាលនាំកុមារី និងម្តាយទៅមន្ទីរពេទ្យភ្លាមៗ និងព្យាបាយដោយឥតគិតថ្លៃរហូតជាសះស្បើយ។ បន្ទាប់ពីទទួលបានការណែនាំនោះលោកស្រី យក់ សម្បត្តិ ក៏បានចាត់ចែងនាំយកកុមារីទៅព្យាបាលនៅមន្ទីរពេទ្យគន្ធបុប្ផា។
បន្ទាប់ពីទទួលបានការជួយអន្តរាគមន៍ពីសម្តេចធិបតី, កម្មការិនី ហៀង ចាន់ បានបង្ហាញក្តីរំភើប និងរីករាយជាខ្លាំង។ ស្ត្រីជាកម្មការិនីរូបនេះ បានលើកឡើងថា អ្នកស្រីចាំពេលនេះអស់រយៈពេលជាច្រើនឆ្នាំមកហើយ ដើម្បីមានឱកាសជួបជាមួយសម្ដេចនាយករដ្ឋមន្ត្រី ដើម្បីអាចឱ្យកូនស្រីរបស់ខ្លួន ទទួលបានការព្យាបាល។
កម្មការិនី ហៀង ចាន់ និយាយទាំងអួលដើមកថា «ខ្ញុំអរណាស់ ខ្ញុំតែងតែបន់ឱ្យកូនជួបសម្តេច ដើម្បីទទួលបានការព្យាបាល ឥឡូវនេះបានជួបហើយ។ ឱ្យតែកូនស្រីខ្ញុំជា ខ្ញុំអរណាស់រំភើបណាស់។ អរគុណសម្តេច»។
លោកស្រី យក់ សម្បត្តិ បានថ្លែងអំណរគុណយ៉ាងជ្រាលជ្រៅ ដល់ក្រុមគ្រូពេទ្យមន្ទីរពេទ្យគន្ធបុប្ផា ដែលបានយកចិត្តទុកដាក់ព្យាបាលកុមារី អាត ស្រីនុ។
ក្រោយពេលក្រុមគ្រូពេទ្យវះកាត់បិទពោះវៀនឱ្យកូនស្រីដោយជោគជ័យ អ្នកស្រី ហៀង ចាន់ បានបង្ហាញក្តីរីករាយថែមមួយកម្រិតទៀត។ អ្នកស្រី បានគោរពថ្លែងអំណរគុណយ៉ាងជ្រាលជ្រៅជូនសម្តេចមហាបវរធិបតី និងក្រុមក្រុមគ្រូពេទ្យ ដែលបានជួយព្យាបាលកូនស្រីរបស់អ្នកស្រី៕
