(ភ្នំពេញ)៖ លោក ស៊ុន ចាន់ថុល ជាមន្ត្រីជាន់ខ្ពស់រាជរដ្ឋាភិបាលដ៏មានប្រជាប្រិយមួយរូប ក្នុង​តួនាទី​​ជារដ្ឋមន្ត្រីក្រសួងសាធារណការ និងដឹកជញ្ជូន ក្នុងនីតិកាលទី៦កន្លងទៅ។ ប៉ុន្តែនៅ​ក្នុង​នីតិ​កាលថ្មី នីតិកាលទី៧ លោក ស៊ុន ចាន់ថុល មិននៅគ្រប់គ្រង និងដឹកនាំក្រសួងសាធារណការ និងដឹកជញ្ជូនទៀតនោះឡើយ។

ក្នុងនីតិកាលថ្មីបញ្ញវន្តដែលបញ្ចប់ការសិក្សាសាលាល្បីៗនៅអាមេរិក លោក ស៊ុន ចាន់ថុល ទទួល​បាន​ការទុកចិត្តពីរាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត ផ្តល់​ឋានៈជាឧបនាយករដ្ឋមន្ត្រី ដែលជាឋានៈខ្ពស់មួយក្នុងរាជរដ្ឋាភិបាល ហើយកាន់តួនាទី​ជា​អនុ​ប្រធាន​ទី១ នៃក្រុមប្រឹក្សាអភិវឌ្ឍន៍កម្ពុជា។ ក្រុមប្រឹក្សាអភិវឌ្ឍន៍កម្ពុជា មានបេសកកម្ម​លើក​កម្ពស់ និងសម្រួលដល់ការវិនិយោគបរទេស និងក្នុងស្រុក ដើម្បីសម្រេចបាន​នូវវិស័យឯកជន​ដែលមានស្ថិរភាព និងភាពរឹងមាំក្នុងការអភិវឌ្ឍរបស់ប្រទេសកម្ពុជា។

អាណត្តិកន្លងទៅលោកទេសរដ្ឋមន្ត្រីមិនបានបង្ហាញបណ្តាញទំនាក់ទំនងសាធារណៈនោះឡើយ ដោយលោកផ្តោតការទំនាក់ទំនងភាគច្រើនទៅលើបណ្តាញសង្គមរបស់ក្រសួង។ នៅក្នុង​អាណត្តិ​​ថ្មី​​នេះ លោក ស៊ុន ចាន់ថុល បានបង្កើតទំព័រហ្វេសប៊ុកផ្ទាល់ខ្លួន ដើម្បីផ្តល់ការ​ប្រា​ស្រ័យទាក់ទង​ផ្ទាល់​ជាមួយរូបលោក។

ដើម្បីភ្ជាប់ទំនាក់ទំនង និងទទួលបានព័ត៌មាននានាពីលោកឧបនាយករដ្ឋមន្ត្រី ស៊ុន ចាន់ថុល លោកអ្នកអាចចុច «Like» លើទំព័រហ្វេសប៊ុករបស់លោក ដែលមានឈ្មោះ «Chanthol SUN, DPM, CDC 1st Vice-Chairman» ឬចុចលើលីង https://web.facebook.com/DPMSunChanthol

សូមបញ្ជាក់ថា លោក ស៊ុន ចាន់ថុល ធ្លាប់បានកាន់តួនាទីជាច្រើនក្នុងជួររាជរដ្ឋាភិបាលតាំង​ពីឆ្នាំ១៩៩៤មក។ ពីឆ្នាំ១៩៩៤ ដល់ ឆ្នាំ១៩៩៧ បានបម្រើការជារដ្ឋលេខាធិ​ការក្រសួង​សេដ្ឋកិច្ច និងហិរញ្ញវត្ថុ និងជាអគ្គលេខាធិការ​នៃក្រុមប្រឹក្សាអភិវឌ្ឍន៍​កម្ពុជា, ចាប់ពីឆ្នាំ១៩៩៩ ដល់ឆ្នាំ២០០៣ បានបម្រើការជាទីប្រឹក្សាសេដ្ឋកិច្ច និងហិរញ្ញវត្ថុប្រធានសភាជាតិ, ចាប់ពីឆ្នាំ២០០៤ ដល់ឆ្នាំ២០០៨ បានបម្រើ​ការ​ជារដ្ឋមន្ត្រីក្រសួងសាធារណៈការ និងដឹកជញ្ជូន, ចាប់ពីឆ្នាំ២០០៨ ដល់ឆ្នាំ​២០១៣ បានបម្រើការជាទេសរដ្ឋមន្ត្រី និងអនុប្រធានក្រុមប្រឹក្សា​អភិវឌ្ឍន៍​កម្ពុជា, ចាប់ពីឆ្នាំ២០១៣ ដល់ខែមេសា ឆ្នាំ២០១៦ បានបម្រើការជាទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាអនុប្រធានក្រុមប្រឹក្សាអភិវឌ្ឍន៍កម្ពុជា (CDC), ចាប់ពីឆ្នាំ២០១៦ ដល់ខែកញ្ញាឆ្នាំ ២០១៨ បានបម្រើការជាទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន និងចាប់ពីខែកញ្ញា ឆ្នាំ២០១៨ រហូតដល់ដើមខែសីហា ឆ្នាំ២០២៣ បានបម្រើការជាទេស​រដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន។

លោក ស៊ុន ចាន់ថុល បច្ចុប្បន្នមានវ័យប្រមាណ ៦៧ឆ្នាំ។ លោកបានបញ្ចប់ការសិក្សា ថ្នាក់បរិញ្ញាប័ត្រវិទ្យាសាស្ត្រផ្នែកគ្រប់គ្រងពា ណិជ្ជកម្មពីសាកលវិទ្យាល័យអាមេរិក នៅឆ្នាំ១៩៧៨ និងកម្មវិធីគ្រប់គ្រងជាន់ខ្ពស់ពីសាកលវិទ្យាល័យ Whartonរដ្ឋ Pennsylvania នៅឆ្នាំ១៩៩៧ ហើយបញ្ចប់ការសិក្សាថ្នាក់អនុបណ្ឌិតផ្នែករដ្ឋបាល​សាធារណៈ​ពីសាកលវិទ្យា Harvard នៅឆ្នាំ១៩៩៩។

លោក ស៊ុន ចាន់ថុល ក៏ធ្លាប់បានបម្រើការងារឱ្យក្រុមហ៊ុន General Electric រយៈពេល ១៦ឆ្នាំ នៅក្នុងមុខតំណែងប្រតិបត្តិជាន់ខ្ពស់ជាច្រើន, ការគ្រប់គ្រងទូទៅ និងហិរញ្ញវត្ថុ (នៅសហរដ្ឋអាមេ រិក បារាំង និងថៃ), សវនករក្រុមហ៊ុន General Electric ហើយក៏ជាអ្នកបង្កើតក្រុមហ៊ុនពាណិជ្ជកម្ម និងវិនិយោគកម្ពុជា នៅឆ្នាំ១៩៩៩ផងដែរ៕