(ក្រុងរីយ៉ូ)៖ លោក វ៉ាត់ ចំរើន នាយកបេសកកម្មដឹកនាំអត្តពលិកកម្ពុជា ចូលរួមប្រកួតកីឡាអូឡាំពិក Olympic Games រដូវក្ដៅ លើកទី៣១ នៅទីក្រុង Rio ប្រទេសប្រេស៊ីល បានឲ្យដឹងថា កីឡាករហែលទឹកកម្ពុជា ពូ សុវិជ្ជា នឹងធ្វើការ ប្រកួតមុនគេលើវិញ្ញាសាហែលទឹកចម្ងាយ ១០០ម៉ែត្រសេរី នាវេលាម៉ោង ១១យប់នេះ (ម៉ោងនៅកម្ពុជា) ខណៈអត្តពលិក ៥រូបផ្សេងទៀត នឹងប្រកួតនៅពេលបន្ដបន្ទាប់ខាងមុខ។

អគ្គលេខាធិការគណៈកម្មាធិការជាតិអូឡាំពិកកម្ពុជាដដែលរូបនេះ មិនបានបញ្ជាក់ពីចំនួនគូប្រកួតរបស់កីឡាករ ពូ សុវិជ្ជា ទេ ប៉ុន្ដែគេ គឺជាអត្តពលិកតំណាងឲ្យប្រទេសកម្ពុជាមុនគេ ដែលបានបង្ហាញសមត្ថភាពក្នុងព្រឹត្តិការណ៍ Olympic Games ឆ្នាំ២០១៦នេះ។

លោកបានបន្ថែមថា យប់នេះប្រតិភូ និងថ្នាក់ដឹកនាំទាំងអស់ នឹងចេញដំណើរទៅទីលានហែលទឹក ដើម្បីផ្ដល់កម្លាំងចិត្ត អត្តពលិក ពូ សុវិជ្ជា។

សម្រាប់កម្មវិធីប្រកួតបន្ដ លោក វ៉ាត់ ចំរើន បានបញ្ជាក់ថា៖

១/. កីឡាការិនីហែលទឹក ហែម ថុនវិទិនី វិញ្ញាសាហែលចម្ងាយ ៥០ម៉ែត្រសេរី ប្រកួតនៅថ្ងៃទី១២ សីហា វេលាម៉ោង ១រសៀល (ម៉ោងនៅប្រេស៊ីល)។
២/. កីឡាការិនីអត្តពលកម្ម (រត់ប្រណាំង) លី ណារី ប្រកួតថ្ងៃទី១៤ សីហា វេលាម៉ោង ៩ព្រឹក (ម៉ោងនៅប្រេស៊ីល)។
៤/. កីឡាការិនីចំបាប់ ចូវ សុធារ៉ា វិញ្ញាសាទម្ងន់ ៤៨គីឡូក្រាម ប្រកួតថ្ងៃទី១៧ សីហា វេលាម៉ោង ១០ព្រឹក (ម៉ោងនៅប្រេស៊ីល)។
៤/. កីឡាការិនីតេក្វាន់ដូ ស៊ន សៀវម៉ី វិញ្ញាសាទម្ងន់ លើស ៦៧គីឡូក្រាម (+67Kg) ប្រកួតថ្ងៃទី២០ សីហា វេលាម៉ោង ១រសៀល (ម៉ោងនៅប្រេស៊ីល)។
៥/. កីឡាករអត្តពលកម្ម នីកូ ប្រកួតថ្ងៃទី២១ សីហា វេលាម៉ោង ៩៖៣០នាទីព្រឹក (ម៉ោងនៅប្រេស៊ីល)៕