(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានិងលោក គីស៊ីដា ហ្វូមីអុ នាយករដ្ឋមន្ត្រីជប៉ុន បានសន្យាធ្វើការជាមួយគ្នាឱ្យកាន់តែជិតស្និទ្ធ ដើម្បីពង្រឹងទំនាក់ទំនង «ភាពជាដៃគូយុទ្ធសាស្ត្រគ្រប់ជ្រុងជ្រោយ» ក៏ដូចជាដោះស្រាយបញ្ហាអន្តរជាតិមួយចំនួនទៀត។
ការសន្យានេះ បានធ្វើឡើងនៅក្នុងជំនួបពិភាក្សាការងាររវាងសម្តេចធិបតីនាយករដ្ឋមន្ត្រី និងលោកនាយករដ្ឋមន្ត្រីជប៉ុន នៅទីក្រុងហ្សាកាតា ប្រទេសឥណ្ឌូនេស៊ី កាលពីថ្ងៃទី៧ ខែកញ្ញា ឆ្នាំ២០២៣។ ទីក្រុងហ្សាកាតា ប្រទេសឥណ្ឌូនេស៊ី ជាទីដែលសម្តេចធិបតី ហ៊ុន ម៉ាណែត និងលោកនាយករដ្ឋមន្ត្រីជប៉ុន អញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដទៃទៀត។
យោងតាមការចេញផ្សាយរបស់ក្រសួងការបរទេសជប៉ុន បានឱ្យដឹងថា នៅក្នុងជំនួបនោះ លោកនាយកដ្ឋមន្ត្រី គីស៊ីដា បានអបអរសាទរសម្តេចធិបតី ហ៊ុន ម៉ាណែត ដែលទទួលបានការគាំទ្រពីប្រជាពលរដ្ឋ និងរដ្ឋសភាឱ្យដឹកនាំរាជរដ្ឋាភិបាលក្នុងនីតិកាលថ្មីនេះ។
លោកនាយករដ្ឋមន្ត្រីជប៉ុន ក៏បានបានបង្ហាញពីឆន្ទៈចង់ធ្វើការជាមួយសម្តេចធិបតីនាយករដ្ឋមន្ត្រីឱ្យកាន់តែជិតស្និទ្ធ និងស៊ីជម្រៅ ដើម្បីពង្រឹងទំនាក់ទំនង «ភាពជាដៃគូយុទ្ធសាស្ត្រគ្រប់ជ្រុងជ្រោយ» ដែលត្រូវបានដាក់ចេញនៅក្នុងឆ្នាំ២០២៣នេះ។
បន្ថែមពីលើការពង្រឹងទំនាក់ទំនងទ្វេភាគីហើយនោះ លោកនាយករដ្ឋមន្ត្រីជប៉ុន ក៏ចង់ធ្វើការជិតស្និទ្ធជាមួយសម្តេចធិបតី ហ៊ុន ម៉ាណែត ក្នុងរក្សា និងពង្រឹងសេរីភាព និងការបើកចំហសណ្ដាប់ធ្នាប់អន្តរជាតិផ្អែកលើច្បាប់អន្តរជាតិនានា។
ក្នុងជំនួបនោះ លោកនាយករដ្ឋមន្ត្រីគីស៊ីដា បានបង្ហាញពីឆន្ទៈរបស់ជប៉ុន ពង្រឹងកិច្ចសហប្រតិបត្តិការសន្តិសុខ តាមរយៈកិច្ចសន្ទនារវាងកងកម្លាំងជើងគោកស្វ័យការពារជប៉ុន និងកងយោធពលខេមរភូមិន្ទ រួមទាំងការធ្វើទស្សនកិច្ចដោយកងកម្លាំងជើងទឹកស្វ័យការពារជប៉ុន ទៅកាន់មូលដ្ឋានទ័ពជើងទឹករាមជាដើម។
លោក គីស៊ីដា ក៏បានបង្ហាញពីឆន្ទៈរបស់ជប៉ុន ក្នុងការបន្តធ្វើកិច្ចសហប្រតិបត្តិការដើម្បីសេដ្ឋកិច្ច និងការអភិវឌ្ឍសង្គមកម្ពុជា ជាពិសេសលើផ្នែកឌីជីថល ដែលបច្ចុប្បន្នកម្ពុជា ក៏កំពុងប្រើប្រាស់នូវបច្ចេកវិទ្យាជប៉ុនដែរនោះ។
លោកនាយករដ្ឋមន្ត្រីជប៉ុន បន្តថា ជប៉ុននឹងបន្តគាំទ្រដល់ការអភិវឌ្ឍលទ្ធិប្រជាធិបតេយ្យរបស់កម្ពុជា។
ជាការឆ្លើយតប សម្តេចធិបតី ហ៊ុន ម៉ាណែត បានថ្លែងអំណរគុណ និងដឹងគុណជប៉ុន ចំពោះការចូលរួមចំណែកនៅក្នុងសន្តិភាពរបស់កម្ពុជា ក៏ដូចជាការកសាងកម្ពុជាឡើងវិញ ព្រមទាំងការអភិវឌ្ឍសេដ្ឋកិច្ចផងដែរ។
ពាក់ព័ន្ធបញ្ហាសន្តិសុខសម្តេចធិបតីនាយករដ្ឋមន្ត្រី បានគូសបញ្ជាក់ថា វិស័យសន្តិសុខ គឺជាផ្នែកមួយដ៏មានសារៈសំខាន់នៃកិច្ចសហប្រតិបត្តិការទ្វេភាគី។ សម្តេចធិបតី បានអះអាងថា នឹងអភិវឌ្ឍកិច្ចសហប្រតិបត្តិការនេះ មិនត្រឹមតែជាមួយ កងកម្លាំងជើងគោកស្វ័យការពារជប៉ុនណ្ណោះទេ តែក៏ជាមួយកងកម្លាំងជើងទឹកស្វ័យការពារជប៉ុនផងដែរ ហើយកម្ពុជាបន្តបើកកំពង់ផែសមុទ្ររាមស្វាគមន៍ជប៉ុន។
សម្តេចធិបតី ក៏បានបង្ហាញពីឆន្ទៈបន្តធ្វើកិច្ចសហប្រតិបត្តិការជាមួយជប៉ុនលើវិស័យនានា រួមទាំងវិស័យឌីជីថល ដែលរដ្ឋាភិបាលកម្ពុជាកំពុងយកចិត្តទុកដាក់លើវិស័យមួយនេះ។
មេដឹកនាំនៃប្រទេសទាំង២ ក៏បានព្រមព្រៀងគ្នាធ្វើការងារឱ្យកាន់តែជិតស្និទ្ធ ពាក់ព័ន្ធកិច្ចការក្នុងតំបន់ និងអន្តរជាតិ ក្នុងនោះរួមមានការដោះស្រាយបញ្ហាកម្មវិធីមីស៊ីល និងអាវុធនុយក្លេអ៊ែរជាដើម។
បើតាមក្រសួងការបរទេសជប៉ុន ក្នុងជំនួបនោះ លោកនាយករដ្ឋមន្ត្រី គីស៊ីដា បានលើកឡើងពី «គំនិតផ្ដួចផ្ដើមផ្សារភ្ជាប់គ្រប់ជ្រុងជ្រោយអាស៊ាន-ជប៉ុន» ដែលទើបតែត្រូវបានប្រកាសកាលពីពេលថ្មីៗនេះ ហើយលោកនាយករដ្ឋមន្ត្រីជប៉ុនរំពឹងថាចក្ខុវិស័យថ្មីនេះ នឹងមានកិច្ចសហប្រតិការយ៉ាងទូលំទូលាយថែមទៀត ក្នុងពេលប្រារព្ធខួបលើកទី៥០ឆ្នាំ នៃទំនាក់ទំនងមិត្តភាពអាស៊ាន-ជប៉ុន នៅខែធ្នូ ឆ្នាំ២០២៣នេះ៕
