(ភ្នំពេញ)៖ បើទោះបីកំពុងមមាញឹកនឹងកិច្ចប្រជុំអាស៊ាន នៅប្រទេសឥណ្ឌូនេស៊ីយ៉ាងណាក្តី សម្តេចមហាបវរធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ក៏បានឆ្លៀតដោះស្រាយបញ្ហា ដែលជាសំណូមពររបស់ព្រះសង្ឃ និងប្រជាពលរដ្ឋពាក់ព័ន្ធផ្លូវចូលទៅទួលព្រះធាតុ ស្ថិតនៅក្នុងភូមិតាបែន ឃុំព្រែកអញ្ចាញ ស្រុកមុខកំពូល ខេត្តកណ្តាល។
ទួលព្រះធាតុ គឺជាទីទួលបុរាណកន្លែងគោរពប្រណិប័តន៍សាសនា និងជំនឿមួយរបស់ប្រជាពលរដ្ឋក្នុងឃុំព្រែកអញ្ចាញ ដែលមានប្រវត្តិយូរលង់ណាស់មកហើយ។ ទីទួលបុរាណមួយនេះ មានដើមពោធិ៍មួយដើមយ៉ាងធំ ត្រូវបានគេវាយតម្លៃថាមានអាយុកាលប្រមាណជា១ពាន់ឆ្នាំ។ ដើមពោធិ៍មួយដើមនេះ បែកមែកត្រសាយត្រសុំចោលម្លប់យ៉ាងត្រឈឹងត្រឈៃ។ ក្រៅពីនោះ ព្រះសង្ឃក៏បានរៀបចំជាទីសក្ការៈបូជាសម្រាប់ការគោរពប្រណិប័តន៍ទាំងខាងព្រះពុទ្ធសាសនា និងព្រហ្មញ្ញសាសនា។
លោក ឡេង ប៊ុនលីម អាយុ ៧០ឆ្នាំ រស់នៅភូមិព្រែកតាបែន ឃុំព្រែកអញ្ចាញ ស្រុកមុខកំពូល ខេត្តកណ្តាល បានរៀបរាប់ឱ្យដឹងថា ចាប់តាំងពីលោកដឹងក្តីមក គឺបានឃើញទីទួលបុរាណ រួមជាមួយដើមពោធិ៍ដ៏ធំ។ លោក ប៊ុនលីម បានឱ្យដឹងទៀតថា ប្រជាពលរដ្ឋនៅឃុំព្រែកអញ្ចាញតែងមកប្រណិប័តន៍ជំនឿ ក៏ដូចជាបួងសួងបន់ស្រន់ពេលមានអាសន្នផ្សេងៗ។
លោក ឡេង ប៊ុនលីម ក៏បានឱ្យដឹងទៀតថា ទីទួលព្រះធាតុ ក៏ជាកន្លែងជួបជុំរបស់ប្រជាពលរដ្ឋរួមគ្នាប្រារព្ធពិធីបុណ្យទាន និងពិធីជាប្រពៃណីទំនាមទម្លាប់ដទៃទៀតជាហូរហែ។
ទួលព្រះធាតុស្ថិតមិនឆ្ងាយនោះឡើយពីរាជធានីភ្នំពេញ។ ទួលជាទីសក្ការៈបូជារបស់ប្រជាពលរដ្ឋនេះ ស្ថិតនៅស្ពានទី១២ ហើយចុះពីផ្លូវជាតិលេខ៦អា ត្រឹមតែប្រមាណពីរគីឡូម៉ែត្រប៉ុណ្ណោះ។ តែអ្វីជាផលលំបាកសម្រាប់ចូលទៅកាន់ទួលបុរាណមួយនេះ គឺផ្លូវធ្វើដំណើរ។ បច្ចុប្បន្នទួលព្រះធាតុ ត្រូវបានហ៊ុមព័ទ្ធដោយដីដែលជាកម្មសិទ្ធិឯកជន ដូច្នេះបើប្រជាពលរដ្ឋចង់ចូលទៅកាន់ទីទួលនេះ ត្រូវសុំគេធ្វើដំណើរចូលទៅ។
ដោយជួបការលំបាកបែបនេះ ព្រះតេជគុណ ពៅ ពិសិដ្ឋ ដែលគង់ថែទាំនៅទីទួលបុរាណខាងលើ បានស្វះស្វែងរកកិច្ចអន្តរាគមន៍ពីអាជ្ញាធរជាច្រើនលើកច្រើនសារតែមិនទទួលបានផល។ ថ្មីៗនេះ ព្រះតេជគុណ ពៅ ពិសិដ្ឋ ដែលបាននិមន្តមកគង់នៅទីទួលព្រះធាតុ៥ព្រះវស្សាមកហើយនោះ ក៏បានសម្រេចធ្វើវីដេអូអំពាវនាវឆ្ពោះត្រង់ទៅសម្តេចធិបតី ហ៊ុន ម៉ាណែត ឱ្យជួយរកដំណោះស្រាយ និងសង់ផ្លូវចូលទៅកាន់ទីទួលបុរាណនេះ។
សារសំណូមពររបស់ព្រះតេជគុណ ពៅ ពិសិដ្ឋ បង្ហោះទៅត្រឹមតែរយៈពេលមួយថ្ងៃ និងមួយយប់ ក៏បានដល់សម្តេចធិបតី ហ៊ុន ម៉ាណែត។ ទោះបីកំពុងជាប់ការងារក្នុងកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅឥណ្ឌូនេស៊ីយ៉ាងណាក្តី សម្តេចធិបតីនាយករដ្ឋមន្ត្រី បានណែនាំឱ្យអភិបាលខេត្តកណ្តាល លោក គង់ សោភ័ណ ចុះសិក្សាសម្របសម្រួលសង់ផ្លូវជូនប្រជាពលរដ្ឋធ្វើដំណើរចូលទៅកាន់ទួលជាទីគោរពសក្ការៈខាងលើនេះ។
នៅថ្ងៃទី៤ ខែកញ្ញា លោក គង់ សោភ័ណ បានចុះទៅដល់ទួលព្រះធាតុ និងជួបសម្របសម្រួលជាមួយម្ចាស់ដីនៅជុំវិញទួល ព្រមទាំងពិភាក្សាជាមួយអាជ្ញាធរស្រុក ដើម្បីសាងសង់ផ្លូវ។
បើតាមអាជ្ញាធរតម្រាយផ្លូវចូលទៅកាន់ទួលព្រះធាតុ មានប្រវែងជិត ២គីឡូម៉ែត្រ។ ក្នុងនោះដីជិត ១គីឡូម៉ែត្រ ជាផ្លូវរដ្ឋដែលមានស្រាប់ ដោយឡែកដីជាង ១គីឡូម៉ែត្រទៀត ជាដីកម្មសិទ្ធិឯកជនចំនួន៣ម្ចាស់ រួមមានលោក ងួន ស៊ាង, លោកស្រី ង៉ូវ ប៉ុក និងលោកស្រី ស្រេង ផេកគាង។ ក្រោមកិច្ចសម្របសម្រួលរបស់អភិបាលខេត្តកណ្តាល ម្ចាស់ដីទាំង៣រូប បានយល់ព្រមបរិច្ចាគដីជូនអាជ្ញាធរ ដើម្បីសង់ផ្លូវជូនប្រជាពលរដ្ឋធ្វើដំណើរចូលទៅទួលព្រះធាតុ។
បន្ទាប់ពីបានសម្របសម្រួលហើយនោះ លោក គង់ សោភ័ណ ក៏បានណែនាំ និងចាត់ចែងឱ្យគ្រឿងចាក់ចូលត្រួសត្រាយ និងចាក់ដីសាងសង់ក្នុងពេលឆាប់ៗនេះតែម្តង។ ផ្លូវនេះ នឹងសាងសង់ដោយមានទទឹងផ្លូវរហូតដល់ទៅ៧ម៉ែត្រ។
លោក សោម ផល្លា អភិបាលរងស្រុកមុខកំពូល ក្នុងនាមជាអាជ្ញាធរស្រុកបានបង្ហាញអារម្មណ៍រីករាយ និងត្រេកអរនៅពេលទទួលបានការអន្តរាគមន៍ពីប្រមុខរាជរដ្ឋាភិបាលដោយផ្ទាល់ក្នុងការសាងសង់ផ្លូវជូនប្រជាពលរដ្ឋសម្រាប់ធ្វើដំណើរបែបនេះ។ បើតាមលោក ផល្លា បានឱ្យដឹងថា អភិបាលខេត្តនឹងសាងសង់ជាផ្លូវបេតុង ហើយបំពាក់ភ្លើងសឡាជូនប្រជាពលរដ្ឋថែមទៀតផង។
លោក គង់ សោភ័ណ បានប្រាប់ Fresh News តាមទូរស័ព្ទថា ជំហានដំបូងនេះ លោកឱ្យសាងសង់ផ្លូវតភ្ជាប់ពីផ្លូវមានស្រាប់ ចូលទៅទួលព្រះធាតុឱ្យធ្វើធ្វើដំណើរបានសិន បន្ទាប់មកបន្តសង់លើផ្លូវមានស្រាប់រហូតដល់ទៅផ្លូវជាតិតែម្តង។
បន្ទាប់ពីទទួលការអន្តរាគមន៍យ៉ាងឆាប់រហ័សពីប្រមុខរាជរដ្ឋាភិបាលបែបនេះ ទាំងព្រះតេជគុណ ពៅ ពិសិដ្ឋ ព្រមទាំងប្រជាពលរដ្ឋដែលតែងតែចេញធ្វើបុណ្យទាន និងគោរពប្រណិប័តន៍សាសនានៅទួលព្រះធាតុ បានសម្តែងព្រះទ័យ និងទឹកចិត្តត្រេកអររីករាយជាខ្លាំង។ ព្រះតេជគុណ ពៅ ពិសិដ្ឋ និងប្រជាពលរដ្ឋ បានវាយតម្លៃខ្ពស់ចំពោះទឹកចិត្តគិតគូររបស់សម្តេចធិបតី ហ៊ុន ម៉ាណែត លើសុខទុក្ខ ក៏ដូចជាសេចក្តីត្រូវការរបស់ប្រជាពលរដ្ឋ។
សូមបញ្ជាក់ថា នៅក្នុងពិធីសំណេះសំណាលជាមួយកម្មករ និយោជិតនៅតំបន់ព្រៃស្ពឺកាលពីថ្ងៃទី២៩ ខែសីហា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត បានប្រកាសថា សម្តេចនឹងបង្កើតក្រុមការងារពិសេសមួយ ដើម្បីចុះដោះស្រាយបញ្ហារបស់ប្រជាពលរដ្ឋ។ វិធានការនេះ បានធ្វើឱ្យប្រជាពលរដ្ឋសាទរ និងពេញចិត្តជាខ្លាំង៕
