(ហ្សាកាតា, ឥណ្ឌូនេស៊ី)៖ នៅព្រឹកថ្ងៃពុធ ទី៦ ខែកញ្ញា ឆ្នាំ២០២៣នេះ លោកជំទាវ ពេជ ចន្ទមុន្នី ហ៊ុនម៉ាណែត បានអញ្ជើញចូលរួមកម្មវិធីនានា ជាមួយភរិយាថ្នាក់ដឹកនាំ នៃបណ្តាប្រទេសសមាជិកអាស៊ាន និងដៃគូអាស៊ាន ដែលមានចំនួនប្រមាណ ១១រូប។
កម្មវិធីនេះ រៀបចំដោយភរិយារបស់ប្រធានាធិបតីឥណ្ឌូនេស៊ី ដើម្បីស្វាគមន៍ភរិយាមេដឹកនាំអាស៊ាន និងដៃគូរបស់អាស៊ានទស្សនាក្នុងកំលុងអមស្វាមីបំពេញការងារនៅប្រទេសឥណ្ឌូនេស៊ី។
ក្នុងកម្មវិធីនោះ មានការសម្តែង និងបង្ហាញអំពីសិល្បៈ វប្បធម៌ចម្រុះ និងមានការដាក់តាំងបង្ហាញផលិតផលក្នុងស្រុកនានា នៃប្រទេសឥណ្ឌូណេស៊ី ដែលបានរៀបចំឡើងនៅសួន Taman Mini Indonesia Indah ក្នុងទីក្រុងហ្សាការតា៕
