(ភ្នំពេញ)៖ លោកបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន នៅព្រឹកថ្ងៃទី៥ ខែកញ្ញា ឆ្នាំ២០២៣ បានទទួលជំនួយពីរាជរដ្ឋាភិបាល និងប្រជាជនជប៉ុន ក្រោម «កម្មវិធីអភិវឌ្ឍន៍សេដ្ឋកិច្ចនិងសង្គម» សម្រាប់ប្រើប្រាស់ក្នុងដំណើរការសកម្មភាពមីនមនុស្សធម៌នៅកម្ពុជា ដែលសម្ភារទាំងនេះប្រគល់ជូនដោយលោក UENO Atsushi ឯកអគ្គរាជទូតជប៉ុនប្រចាំកម្ពុជា។
ជំនួយរបស់រាជរដ្ឋាភិបាល និងប្រជាជនជប៉ុន ប្រគល់ជូនដល់អាជ្ញាធរមីន រួមមាន៖ រថយន្ត(Pickup) ២៣គ្រឿង, ម៉ូតូ ៣៧ គ្រឿង, ឧបករណ៍ GPS ៥៤គ្រឿង, ឧបករណ៍ការពារសុវត្ថិភាព ៣០ឈុត, ម៉ាស៊ីនរាវមីន ៣០គ្រឿង, កុំព្យូទ័រយួរដៃ ៧៥គ្រឿង, គ្រឿងបន្លាស់រថយន្ត ២៣គ្រឿង និងគ្រឿងបន្លាស់ម៉ូតូ ៣៧គ្រឿង។
ក្នុងឱកាសទទួលនូវជំនួយឥតសំណងនេះ ទេសរដ្ឋមន្រ្តី បានវាយតម្លៃខ្ពស់ចំពោះចំណងការទូតជាប្រវត្តិសាស្រ្តរវាងកម្ពុជា និងជប៉ុន រយៈពេល ៧០ឆ្នាំនេះ គឺចាប់ពីឆ្នាំ១៩៥៣ ដែលប្រទេសទាំងពីរ បានបង្កើតទំនាក់ទំនងយ៉ាងជិតស្និទ្ធ ដោយផ្អែកលើការគោរពគ្នាទៅវិញទៅមក និងមានតម្លៃរួមគ្នា។ ជាមួយគ្នានោះ ប្រទេសជប៉ុន បានដើរតួនាទីយ៉ាងសំខាន់ក្នុងដំណើរការស្វែងរកសន្តិភាព កំណើនសង្គម និងសេដ្ឋកិច្ចរបស់កម្ពុជា លើវិស័យជាច្រើនដូចជា ហេដ្ឋារចនាសម្ព័ន្ធរូបវន្ត ទេសចរណ៍ ការអប់រំ ការអភិរក្ស និងជួសជុលរមណីយដ្ឋានប្រវត្តិសាស្ត្រ ក៏ដូចជាសកម្មភាពមីនមនុស្សធម៌ ជាដើម។
ពាក់ព័ន្ធនឹងការងារសកម្មភាពមីនមនុស្សធម៌ ប្រទេសជប៉ុន បានចូលរួមជួយឧបត្ថម្ភគាំទ្រដល់កម្ពុជាចាប់តាំងពីឆ្នាំ១៩៩៤ គិតជាទឹកប្រាក់ជាង ២០០លានដុល្លារ បន្ថែមពីលើគ្រឿងបរិក្ខា។ នាថ្ងៃនេះ ដែលទេសរដ្ឋមន្រ្តី បានចាត់ទុកថា ប្រទេសជប៉ុន គឺជាដៃគូយូរអង្វែង និងរឹងមាំមួយក្នុងការសម្រេចបាននូវសមិទ្ធិផលសកម្មភាពមីនរយៈពេលជាង៣០ឆ្នាំនេះ។ វិភាគទានរបស់ជប៉ុន ជាមួយនឹងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ប្រទេសម្ចាស់ជំនួយ ដៃគូអភិវឌ្ឍន៍ ប្រតិបត្តិករដោះមីន និងអ្នកពាក់ព័ន្ធដទៃទៀត គឹជាធានាបាននូវដីប្រកបសុវត្ថិភាពសម្រាប់ប្រជាពលរដ្ឋប្រើប្រាស់ ក៏ដូចជាកាត់បន្ថយគ្រោះថ្នាក់ដោយសារគ្រាប់មីន និងយុទ្ធភណ្ឌមិនទាន់ផ្ទុះដទៃទៀត។
ក្នុងនាមសម្តេចធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន, ទេសរដ្ឋមន្រ្តី បានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាល និងប្រជាជនជប៉ុន ចំពោះការចូលរួមគាំទ្រប្រកបដោយទឹកចិត្តសប្បុរសនេះ ព្រមទាំងជឿជាក់ថា ជំនួយជាគ្រឿងបរិក្ខារនាថ្ងៃនេះនឹងជួយបង្កើនប្រសិទ្ធភាពប្រតិបត្តិការរបស់អាជ្ញាធរមីន ក្នុងការវាយតម្លៃនៅទីវាល ការសិក្សាស្រាវជ្រាវ ការគ្រប់គ្រងគុណភាព ការអប់រំហានិភ័យ និងភាពជាអ្នកដឹកនាំនៃវិស័យសកម្មភាពមីន ក៏ដូចជាជួយជំរុញឱ្យមានការខិតខំប្រឹងប្រែងបន្តឆ្ពោះទៅរកការសម្រេចបាននូវប្រទេសកម្ពុជាដែលគ្មានមីន។
លោក UENO Atsushi ឯកអគ្គរាជទូតជប៉ុន ប្រចាំកម្ពុជា បានវាយតម្លៃខ្ពស់ចំពោះលទ្ធផលទទួលបាននៃការងារបោសសម្អាតមីននៅកម្ពុជា ដោយទទួលបានផ្ទៃដីធំជាងគេក្រោយបញ្ចប់សង្រ្គាម។ ការសម្រេចបានរបស់កម្ពុជា ក៏មានការរួមចំណែកពីរាជរដ្ឋាភិបាល និងប្រជាជនជប៉ុន ហើយជប៉ុនសង្ឃឹមថា គ្រាប់មីន និងសំណល់ជាតិផ្ទុះពីសង្រ្គាមដែលនៅសេសសល់នឹងត្រូវរំដោះចេញពីទឹកដីកម្ពុជា ហើយប្រជាជនកម្ពុជានឹងទទួលបាននូវសុវត្ថិភាព។
លោកឯកអគ្គរាជទូត បានបន្តថា ក្រៅពីជួយដល់ការងារបោសសម្អាតមីននៅកម្ពុជា ជប៉ុនក៏បានចូលរួមជួយដល់កម្ពុជាក្នុងកិច្ចសហប្រតិបត្តិការអន្តរជាតិ ក្នុងនោះថ្មីៗនេះ បានចូលរួមដល់ការបណ្តុះបណ្តាលអ្នកជំនាញការមកពីប្រទេសអ៊ុយក្រែនផងដែរ៕
