(ហ្សាកាតា, ឥណ្ឌូនេស៊ី)៖ ក្នុងឋានៈជាប្រមុខរាជរដ្ឋាភិបាលកម្ពុជា ជាសមាជិករបស់អាស៊ាននោះ សម្តេចមហាបវរធិបតី ហ៊ុន ម៉ាណែត បានលើកឡើងថា សន្តិសុខ គឺជាបញ្ហាដ៏ចម្បងមួយដែលអាស៊ានត្រូវយកចិត្តទុកដាក់ ហើយត្រូវប្រឹងប្រែងសម្របសម្រួលរាល់បញ្ហាទាំងឡាយ សម្តៅកាត់បន្ថយជម្លោះ និងថែរក្សាបាននូវសុខសន្តិភាព ស្ថេរភាព ព្រមទាំងធានាឱ្យមានវិបុលភាព ដែលជាគ្រឹះដ៏សំខាន់ក្នុងការអភិវឌ្ឍសេដ្ឋកិច្ច។
សម្តេចធិបតី ហ៊ុន ម៉ាណែត បានគូសរំលេចបែបនេះ ក្នុងពេលជួបពិភាក្សាការងារជាមួយលោក កៅ គឹមហួន អគ្គលេខាធិការអាស៊ាន។ សម្តេចធិបតី ហ៊ុន ម៉ាណែត ពេលអញ្ជើញដល់ប្រទេសឥណ្ឌូនេស៊ីភ្លាម ក៏បានអញ្ជើញជួបសម្តែងការគួរសម និងពិភាក្សាការងារជាមួយអគ្គលេខាធិការអាស៊ាននៅរសៀលថ្ងៃចន្ទ ទី៤ ខែកញ្ញា ឆ្នាំ២០២៣នេះ។
សម្ដេចមហាបវរធិបតីនាយករដ្ឋមន្ត្រី បានសម្តែងក្តីរីករាយ និងបានថ្លែងអំណរគុណ ចំពោះគណៈប្រតិភូនៃអគ្គលេខាធិការអាស៊ាន ដែលបានចូលជួបសម្ដែងការគួរសម និងបានបញ្ជាក់ថានេះ ជាលើកដំបូងដែលសម្ដេចធិបតី បានដឹកនាំគណៈប្រតិភូបំពេញបេសកកម្មនៅក្រៅប្រទេស ហើយជំនួបជាមួយលោក កៅ គឹមហួន ជាជំនួបលើកដំបូងនៅក្រៅប្រទេស របស់សម្ដេច ក្នុងឋានៈជានាយករដ្ឋមន្ត្រីកម្ពុជា។
លោក កៅ គឹមហួន បានថ្លែងអំណរគុណចំពោះសម្ដេចធិបតី ដែលបានអនុញ្ញាតឱ្យគណៈប្រតិភូចូលជួបសម្តែងការគួរសម។ លោកអគ្គលេខាធិការ ក៏បានសម្តែងការអបអរសាទរចំពោះសម្ដេច ដែលត្រូវបានជ្រើសតាំងជានាយករដ្ឋមន្ត្រី ហើយថ្មីៗនេះ សម្ដេចក៏ទទួលបានគោរមងារជាសម្ដេចមហាបវរធិបតី ដែលនេះជាគោរមងារដ៏ឧត្តុង្គឧត្តម្ភ។
លោក កៅ គឹមហួន ក៏បានជម្រាបពីកិច្ចការរបស់អាស៊ាន លើទិដ្ឋភាពជាច្រើន មានដូចជា៖ ចក្ខុវិស័យរបស់អាស៊ានសម្រាប់២០៤៥ ត្រូវបានអនុម័តដោយក្រុមប្រឹក្សាសហគមន៍សន្ដិសុខនយោបាយអាស៊ាន ដែលជាចក្ខុវិស័យរយៈពេលវែងរហូតដល់២៥ឆ្នាំ ដែលមិនធ្លាប់មាននៅក្នុងប្រវត្តិសាស្ត្ររបស់អាស៊ាន។ ក៏ប៉ុន្តែកិច្ចការអាស៊ាន ដែលលោកមានការចាប់អារម្មណ៍ជាងគេនៅក្នុងសសរស្ដម្ភទាំងបីរបស់អាស៊ាន គឺអាស៊ានប្រមូលផ្ដុំលើសហគមន៍សេដ្ឋកិច្ចអាស៊ាន ដែលកំពុងតែលេចធ្លោនៅក្នុងកិច្ចការរបស់អាស៊ានដោយទទួលបាននូវការផ្តល់ថវិកាជាអាទិភាពជាច្រើនសម្រាប់ឱ្យសហគមន៍សេដ្ឋកិច្ចអាស៊ានដំណើរការប្រកបដោយប្រសិទ្ធភាព ។
លោក កៅ គឹមហួន បានបន្តថា អាស៊ានបានធ្វើការបើកសេដ្ឋកិច្ចឌីជីថលឈានទៅដល់២០២៥ ដែលតាមការវាយតម្លៃ គឺអាចបំពេញបន្ថែមថវិការហូតដល់២ទ្រីលានដុល្លារ នៅឆ្នាំ២០៣០ ហើយផលិតផលក្នុងស្រុកសរុប របស់អាស៊ាន អាចនឹងកើតដល់២ទ្រីលានដុល្លារ នៅឆ្នាំ២០៣០ ។ ចំពោះសហគមន៍សេដ្ឋកិច្ចអាស៊ាន មានឯកសារច្រើនជាងគេ ដែលត្រូវអនុម័ត បន្ទាប់មក គឺការអនុម័តលើឯកសារនៃសហគមន៍សង្គម វប្បមធម៌អាស៊ាន។
សម្ដេចធិបតី បានកោតសរសើ និងវាយតម្លៃខ្ពស់ចំពោះការរួមចំណែករបស់លោក អគ្គលេខាធិការអាស៊ាន អគ្គលេខាធិការដ្ឋានអាស៊ាន ចំពោះការខិតខំប្រឹងប្រែង និង គំនិតផ្ដួចផ្ដើមនានា ក្នុងការជំរុញដំណើរកសាងសហគមន៍អាស៊ាន។
សម្ដេចធិបតី ក៏បានឯកភាពចំពោះអាស៊ាន ដែលផ្ដោតទៅលើសហគមន៍សេដ្ឋកិច្ចអាស៊ាន ដែលបានធ្វើសមាហរណកម្មនៅក្នុងតំបន់អាស៊ាន ដោយផ្ដោតសក្ដានុពលជំរុញសេដ្ឋកិច្ចអាស៊ាន ពិសេសជំរុញកិច្ចព្រមព្រៀងភាពជាដៃគូសេដ្ឋកិច្ចតំបន់គ្រប់ជ្រុងជ្រោយ (RCEP) ។
សម្ដេចធិបតី ហ៊ុន ម៉ាណែត បានលើកឡើងអំពីបញ្ហាសន្ដិសុខ ដោយសម្តេចចាត់ទុកបញ្ហានេះ ជាបញ្ហាចម្បងសម្រាប់អាស៊ាន ដែលទាមទារឱ្យខិតខំធ្វើការសម្របសម្រួល សំដៅធ្វើការកាត់បន្ថយជម្លោះ ដើម្បីថែរក្សាសន្ដិភាព ស្ថិរភាព ធានាឱ្យមាន វិបុលភាពដែលជាមូលដ្ឋានសំខាន់នៃការអភិវឌ្ឍសេដ្ឋកិច្ច។
សម្ដេចធិបតី មានប្រសាសន៍បន្តថា «ឯកឧត្តមអគ្គលេខាធិការអាស៊ានយល់ច្បាស់ណាស់អំពីតម្លៃនៃសន្ដិភាព ប្រសិនបើនៅក្នុងតំបន់មានអស្ថិរភាព និងមានការលំបាក នោះនឹងធ្វើឱ្យប៉ះពាល់ដល់សេដ្ឋកិច្ចអាស៊ានទាំងមូល។ ដូច្នេះអាស៊ានត្រូវដើរតួនាទីយ៉ាងសំខាន់ក្នុងការពង្រឹង ថែរក្សា សន្ដិភាព ស្ថិរភាព»៕
