(ត្បូងឃ្មុំ)៖ សាលារៀនជាច្រើននៅក្នុងស្រុកអូររាំងឪ ខេត្តត្បូងឃ្មុំ បានចាប់ផ្តើមធ្វើយុទ្ធនាការ «មិនប្រើថង់ប្លាស្ទិក» ដើម្បីបំផុសសិស្សានុសិស្សកាត់បន្ថយ ឬលុបបំបាត់ការប្រើប្រាស់ថង់ប្លាស្ទិកនៅក្នុងសាលារៀន និងតាមភូមិឋានរបស់ពួកគេ។
ថង់ប្លាស្ទិកជាបញ្ហាដ៏គួរឱ្យព្រួយបារម្ភ ដែលកំពុងរីករាលដាលនៅលើសកលលោក។ ជារៀង រាល់ឆ្នាំសំណល់ប្លាស្ទិកចំនួន ៣០០លានតោន ត្រូវបានបង្កើត ហើយត្រូវការរយៈពេល ១ពាន់ឆ្នាំ ដើម្បីរលាយ។ បញ្ហានេះ ក៏កំពុងកើតឡើងនៅកម្ពុជាផងដែរ។ កំណើនប្រជាជន និងការលូតលាស់សេដ្ឋកិច្ចយ៉ាងឆាប់រហ័សបាននាំឱ្យបរិមាណសំណល់មានការកើនឡើងយ៉ាងខ្លាំង។ នៅរាជធានីភ្នំពេញ សំណល់ជាំង ៣,៥០០តោន ត្រូវបានបង្កើតឡើងជារៀងរាល់ថ្ងៃ ដែលក្នុងនោះ ២០ភាគរយជាប្លាស្ទិក។
ការអប់រំឱ្យប្រជាពលរដ្ឋយល់ពីផលលំបាក ពីឥទ្ធិពលអាក្រក់នៃប្លាស្ទិកសម្រាប់បរិស្ថាន និងជីវិត គឺជាកិច្ចការដ៏សំខាន់មួយ ដើម្បីឆ្ពោះទៅសម្រេចនូវផែនការកាត់បន្ថយការប្រើប្រាស់ប្លាស្ទិក។ កាលពីថ្ងៃទី១ ខែកញ្ញា ឆ្នាំ២០២៣ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រកាសដាក់ចេញយុទ្ធនាការកាត់បន្ថយការប្រើប្រាស់ថង់ប្លាស្ទិកនៅតាមសាលារៀន។ លោករដ្ឋមន្ត្រី បានចាប់ផ្តើមអនុវត្តន៍យុទ្ធនាការនេះនៅតាមសាលាទាំង៤៤ ក្នុងស្រុកអូររាំងឪ ខេត្តត្បូងឃ្មុំ។
លោករដ្ឋមន្ត្រីក្រសួងបរិស្ថាន បានសំណូមពរសិស្សានុសិស្សទាំងអស់គ្នា ចូលរួមៗក្នុងយុទ្ធនាការកាត់បន្ថយការប្រើប្រាស់ថង់ប្លាស្ទិកទាំងអស់គ្នា «ដើម្បីភាពល្អបរិសុទ្ធបរិស្ថានយើង»។
បើតាមលោក អ៊ាង សុផល្លែត បានឱ្យដឹងថា លោកនឹងបន្តធ្វើយុទ្ធនាការនេះ នៅតាមសាលារៀនទូទាំងប្រទេស។
សូមបញ្ចាក់ថា ការគ្រប់គ្រងសំណល់រឹង សំរាមគឺជាកាតព្វកិច្ចរបស់យើងទាំងអស់គ្នា។ ដើម្បីចូលរួមការពារ ពង្រឹង ការគ្រប់គ្រងបរិស្ថាន ក្រសួងបរិស្ថានបានបង្កើតច្បាប់ បទដ្ឋានគតិយុត្ដជាច្រើនក្នុងនោះមានច្បាប់ធំៗ ក្នុងនោះក្រមបរិស្ថានដែលមានវិសាលភាពគ្របដណ្ដប់លើការងារពាក់ព័ន្ធវិស័យបរិស្ថាន និងធនធានធម្មជាតិដោយការធ្វើសមាហរណកម្មច្បាប់ និងលិខិតបទដ្ឋានគតិយុត្ដពាក់ព័ន្ធដែលមានស្រាប់។ ទន្ទឹមនេះប្រជាពលរដ្ឋមានការចូលរួមក្នុងសកម្មភាពមេត្រីបរិស្ថាន ហើយបានចាត់ទុកទីក្រុង ទីប្រជុំជន ភូមិឋាន និងផ្ទះដែលកំពុងរស់នៅ ដែលចាំបាច់ត្រូវតែស្អាត មានអនាម័យជាប្រចាំ ដើម្បីរក្សាសោភណភាពមូលដ្ឋាន និងលើកតម្កើងសុខុមាលភាពសាធារណៈ។
ផ្តើមចេញពីយុទ្ធនាការកាត់បន្ថយការប្រើប្រាស់ថង់ប្លាស្ទិក សិស្សានុសិស្សនៅតាមសាលារៀន អាចចាប់ផ្តើមការចូលរួមសកម្មភាពជាក់ស្តែងជាមួយនឹងពាក្យមួយឃ្លាថា «ថ្ងៃនេះ ខ្ញុំមិនប្រើប្រាស់ស្ទិក»៕
