(ព្រះវិហារ)៖ លោកឧត្តមសេនីយ៍ទោ ច័ន្ទ សុភ័ក្រ្តា មេបញ្ជាការតំបន់ប្រតិបត្តិការសឹករងព្រះវិហារ និងជាប្រធានសមាគមអតីតយុទ្ធជនកម្ពុជាខេត្ត នាថ្ងៃទី២ ខែសីហា ឆ្នាំ២០២៣ បានយកនាំអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ្រ ច័ន្ទមុន្នី ចែកជូនសមាជិកសមាគមអតីតយុទ្ធជន និងប្រជាពលរដ្ឋក្រីក្រចំនួន៩គ្រួសារ ស្ថិតនៅភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ។
នៅក្នុងឱកាសនោះដែរ លោកឧត្តមសេនីយ៍ទោ ច័ន្ទ សុភ័ក្ត្រា បានថ្លែងពាំនាំនូវប្រសាសន៍ផ្តាំផ្ញើរសាកសួរសុខទុក្ខពីសម្តេចមហាបវរធិបតី ហ៊ុន ម៉ាណែត និងលោកជំទាវ ពេជ្រ ច័ន្ទមុន្នី ដែលជានិច្ចជាកាលតែងបានគិតគូរយកចិត្តទុកដាក់ ពីសុខទុក្ខនិងជីវភាពរស់នៅរបស់ប្រជាពលរដ្ឋ ពិសេសប្រជាពលរដ្ឋក្រីក្រ គ្មានទីពឹង។
លោកឧត្តមសេនីយ៍ទោ បានលើកឡើងថា អំណោយជាគ្រឿងឧបភោគ បរិភោគ និងថវិកា ដែលនាំមកចែកជូនបងប្អូននៅពេលនេះ ជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវ ពេជ្រ ច័ន្ទមុន្នី ដែលក្នុង០១គ្រួសារៗ ទទួលបាន៖ អង្ករ ០១បេ, មី ០១កេស, ទឹកត្រី ០១យួរ, ភួយ ០១ និងថវិកាមួយចំនួនផងដែ។
ក្នុងនាមបងប្អូនអតីតយុទ្ធជន និងប្រជាពលរដ្ឋដែលមានវត្តមានក្នុងពិធីនេះ លោកឧត្តមសេនីយ៍ទោ ច័ន្ទ សុភ័ក្ត្រា បានថ្លែងនូវការចូលរួមអបអរសាទរ ចំពោះសម្តេចមហាបវរធិបតី ហ៊ុន ម៉ាណែត ដែលត្រូវបានព្រះករុណាព្រះបាទសម្តេចព្រះបរមនាថ នរោត្តមសីហមុនី តែងតាំងជានាយករដ្ឋមន្ត្រីនៃកម្ពុជា នៅអាណត្តិទី៧នេះ។
លោកក៏បានអំពាវនាវនាវដល់បងប្អូនអតីតយុទ្ធជន និងប្រជាពលរដ្ឋ ត្រូវបន្តគាំទ្រកម្មវិធីនយោបាយនានារបស់រាជរដ្ឋាភិបាលកម្ពុជា ដែលដឹកនាំដោយសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ដើម្បីឱ្យប្រទេសជាតិកាន់តែទទួលបានការអភិវឌ្ឍរីកចម្រើនគ្រប់វិស័យថែមទៀត៕
