(ភ្នំពេញ)៖ និស្សិត តាំង ប៊ុនហុង ដែលល្បីថាជានិស្សិតខ្លាំងលើខ្លាំង នៅសាកលវិទ្យាល័យអាមេរិកាំងភ្នំពេញ (AUPP) ដែលជាសាកលវិទ្យាល័យនាំមុខគេ ផែ្នកគុណភាពនៅកម្ពុជា ត្រូវបាន លោក កែវ រតនៈ អគ្គនាយកអគ្គិសនីកម្ពុជាជួយឧបត្ថម្ភថៃ្លសិក្សា ឆ្នាំបញ្ចប់បរិញ្ញាបត្រ៤ឆ្នាំនៅ AUPP។

លោកស្រី បណ្ឌិត Billie Slott ជាសាស្រ្តាចារ្យផែ្នកច្បាប់ និងជានាយកកិច្ចការនិស្សិត បានមានប្រសាសន៍ថា ប៊ុនហុង ជានិស្សិតពូកែ ឬនិយាយមួយបែបថាជា «និស្សិតខ្លាំងក្នុង​ចំណោមអ្នកខ្លាំង» នៅ AUPP ត្រូវបាន លោក កែវ រតនៈ ជួយចេញថៃ្លសិក្សាឲ្យពាក់កណ្តាល បន្ទាប់ពីលោក រតនៈ ឮថា ប៊ុនហុង ជានិស្សិតពូកែតែជាកូនអ្នកក្រក្សត់។

ឆ្លើយតបទៅនឹងសំណួរថា ហេតុអ្វីបានជាចាប់អារម្មណ៍ជួយថៃ្លសិក្សាដល់និស្សិត ប៊ុនហុង លោក កែវ រតនៈ បាននិយាយយ៉ាងខ្លីថា លោក «គាំទ្រនិងលើកទឹកចិត្តដល់សិស្ស និងនិស្សិតពូកែទាំងអស់ ព្រោះពួកគាត់នឹងក្លាយជាធនធានមនុស្សដ៏សំខាន់ និងចាំបាច់បំផុតសម្រាប់ប្រទេសយើង»។ លោក រតនៈ ធ្លាប់​ជា និស្សិតខ្លាំង កាលលោកនៅសិក្សា ហើយមកទល់ពេលនេះ បើទោះបីជាលោកទទួលបានសញ្ញាបត្រមកពីអាមេរិក និងអង់គេ្លសរួចហើយក្តី និងកំពុងបំពេញតួនាទីជាមន្រ្តីរាជការ មានឋានៈខ្ពង់ខ្ពស់គួរសមក៏ដោយ ក៏លោកនៅតែសែ្វងរកការសិក្សាបន្តទៀត។

តាំង ប៊ុនហុង ធ្លាប់​ជាសិស្សពូកែទូទាំងប្រទេសនិងទទួលបានចំណាត់ថ្នាក់ A កាលនៅរៀនថ្នាក់វិទ្យាល័យ ។ ប៊ុនហុង ដែលត្រូវចូលឆ្នាំទី៤ ជាឆ្នាំបញ្ចប់នៅ AUPP នៅខែក្រោយនេះ បាននិយាយថា «ខ្ញុំ​អរគុណ​យ៉ាង​ខ្លាំង​ចំពោះ​សន្ដានចិត្ត​របស់​លោក​ពូ​ កែវ រតនៈ។ អត្ថន័យ​នៃ​ទង្វើ​ដ៏​ល្អ​នេះ​គឺ​មិន​មែន​ឋិត​នៅលើ​ខ្ញុំ ឬ​លោក​ពូ​តែ​ម្នាក់ទេ តែ​ជា​សកម្មភាព​មួយ​លើកទឹកចិត្ត​យុវជន​យើង ឲ្យ​​ខំ​កសាងខ្លួន​ដើម្បី​ជា​ធនធាន​មនុស្ស​ សម្រាប់​ប្រទេសជាតិ និង​ដល់ម្ចាស់​ប្រភព​ធនធាន​ផ្សេងទៀត ឲ្យ​​ចូលរួម​ចំណែក​​ជួ​យលើក​ទឹកចិត្ត​យុវជនយើង ​ទូទាំង​ប្រទេស»

ទាក់ទងទៅនឹងអាហារូបករណ៍វិញ លោកស្រីបណ្ឌិត Billie Slott បានមានប្រសាសន៍ថា AUPP សូមស្វាគមន៍និងអំពាវនាវដល់ សប្បុរសជនទាំងអស់ដែលមានបំណងចូលរួមចំណែក​ លើក​កម្ពស់​វិស័យអប់រំ និងជាពិសេសជួយដល់និស្សិតក្រីក្រនៅកម្ពុជា ឲ្យមានឱកាសបានសិក្សានៅសាកលវិទ្យាល័យស្តង់ដារអន្តរជាតិដូច AUPP អាចធ្វើការទំនាក់ទំនងផ្ទាល់ជាមួយលោកស្រីបណ្ឌិត Billie Slott តាមរយៈលេខទូរសព្ទ ៖ 077284200 ឬ Email: [email protected].