(កំពត)៖ បុរសពិការជើងទាំងពីរ និងដៃម្ខាង ក្រខ្សត់គ្មានទីពឹង លោក មឹង ពួន អាយុ ៣៣ឆ្នាំ រស់នៅជាមួយប្អូននៅភូមិឫស្សីជួរ ឃុំស្តេចគង់ខាងត្បូង ស្រុកបន្ទាយមាស ខេត្តកំពត ទទួលបានរទេះរុញមួយគ្រឿង និងអំណោយសម្រាលការលំបាក ពីកាកបាទក្រហមកម្ពុជា។
ការផ្ដល់អំណោយខាងលើនេះ បានធ្វើឡើងនៅលំនៅឋានរបស់លោកផ្ទាល់តែម្ដង ក្រោយវត្តមានលោកវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា ដែលប្រព្រឹត្តទៅកាលចុងខែសីហា ឆ្នាំ២០២៣នេះ។
ក្នុងឳកាសនោះ លោកវេជ្ជ. បានពាំនាំមកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះគ្រួសារជនពិការដោយក្តីនឹករឭកបំផុត និងបានលើកទឹកចិត្តដល់បុរសពិការរូបនេះ ត្រូវខិតខំតស៊ូក្នុងជីវិត និងរស់នៅដោយក្តីសង្ឃឹម។
ជានិច្ចកាលសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរពីសុខទុក្ខរបស់ប្រជាពលរដ្ឋដែលជួបការលំបាក មានជំងឺ ចាស់ជរា ស្ត្រីមេម៉ាយកូនច្រើនក្នុងបន្ទុក ជនងាយរងគ្រោះ និងរងគ្រោះបំផុត ដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។
សម្រាប់អំណោយដែលបានប្រគល់ជូនដល់បុរសជនពិការខាងនេះរួមមាន រទេះរុញចំនួនមួយគ្រឿង អង្ករ១០០គីឡូ ឃីត១កញ្ចប់ (សារ៉ុង ក្រម៉ាម៉ុង ភួយ អាវយឺត) ទឹកត្រី២យួរ ត្រីខរ២យួរ មីជាត់ចំនួន២កេះ និងថវិការមួយចំនួនផងដែរ។
ជាមួយគ្នាលោក មឹង ពួន ដ៏កំសត់រូបនេះ បានថ្លែងពីផលិបាកដែលខ្លួនបានជួប និងបានថ្លែងអំណរគុណដ៏ជ្រាលជ្រៅចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលអ្នកម្តាយមនុស្សធម៌ បានជួយសម្រាលការលំបាករបស់លោក និងប្រជាពលរដ្ឋងាយរងគ្រោះបំផុតនៅកម្ពុជា៕
