(បន្ទាយមានជ័យ)៖ លោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ និងសហការី នៅព្រឹកថ្ងៃទី២៩ ខែសីហា ឆ្នាំ២០២៣ បាននាំយកថវិកាផ្ទាល់ខ្លួនរបស់នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ប្រគល់ជូនដល់គ្រួសារសពចំនួន២គ្រួសារ។
គ្រួសារសពទទាំងនេះរួមមានទី១៖ លោកវរសេនីយ៍ត្រី នួម ឆៃរ៉ាត់, និងទី២៖ នាយចំណង់ ប្លុង ម៉ៅ (អតីតយោធិននៃកងរាជអាវុធហត្ថ ចូលសោធននិវត្តន៍) ក្នុងមួយគ្រួសារទទួលបានថវិកា ៥លានរៀល រួមនឹងថវិកាផ្ទាល់ខ្លួនរបស់លោកឧត្តមសេនីយ៍ត្រី បោន ប៊ិន ចំនួន៥០ម៉ឺនរៀលផងដែរ។
នាឱកាសនោះ លោកឧត្តមសេនីយ៍ត្រី បោន ប៊ិន ក៏បានចូលរួមសម្តែងនូវមរណៈទុក្ខដ៏ក្រៀមក្រំចំពោះក្រុមគ្រួសារសព លោកវរសេនីយ៍ត្រីនួម ឆៃរ៉ាត់ និងលោកនាយចំណង់ ប្លុង ម៉ៅ ដែលបានលាចាកឆ្ងាយពីក្រុមគ្រួសារគ្មានថ្ងៃវិលត្រឡប់ចោលប្រពន្ធ និងកូន បងប្អូនសាច់ញាតិទាំងក្តីអាឡោះអាល័យជាទីបំផុត។
ឧត្តមសេនីយ៍ត្រី បោន ប៊ិន បានបន្តថា នាយឧត្តមសេនីយ៍ សៅ សុខា តែងតែគិតគូរពីសុខទុក្ខជីវភាពរបស់មន្ត្រីអាវុធហត្ថក្រោមឱវាទ ជាពិសេសបេីទោះបីជាអាវុធហត្ថសោធននិវត្តន៍ ដែលទទួលមរណៈភាពក៏ដោយក៏នាយឧត្តមសេនីយ៍ សៅ សុខា នៅតែយកចិត្តទុកដាក់ជួយជាថវិកាផ្ទាល់ខ្លួនចូលរួមបុណ្យសពផងដែរ។
សូមបញ្ជាក់ផងដែរថា លោកវរសេនីយ៍ត្រី នួម ឆៃរ៉ាត់ បានទទួលមរណភាព កាលពីថ្ងៃទី២១ ខែមីនា ឆ្នាំ២០២២, នាយចំណង ប្លុង ម៉ៅ បានទទួលមរណភាព នៅថ្ងៃទី២៤ ខែកក្កដា ឆ្នាំ២០២៣៕
