(ភ្នំពេញ)៖ នៅវិមាន៧មករា ព្រឹកថ្ងៃទី២៩ ខែសីហា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានអនុញ្ញាតឱ្យលោកស្រី ម៉ារីយា ដែល ខាមែន ម៉ូរេណូ (Maria Del Carmen Moreno) ឯកអគ្គរដ្ឋទូតសហភាពអឺរ៉ុបប្រចាំកម្ពុជា ដែលបញ្ចប់អាណត្តិបេសកកម្មការទូតនៅកម្ពុជា ចូលជួបសម្ដែងការគួរសម និងជម្រាបលា។
សម្តេចតេជោ បានសម្តែងសេចក្តីរីករាយ ដោយបានជួបលោកស្រី ម៉ារីយា ដែល ខាមែន ម៉ូរេណូ មុនពេលលោកស្រីបញ្ចប់បេសកកម្មការទូត ហើយចាកចេញពីប្រទេសកម្ពុជា ដើម្បីបន្តតំណែងជាឯកអគ្គរដ្ឋទូតសហភាពអឺរ៉ុប ប្រចាំប្រទេសស្រីលង្កា និងម៉ាល់ឌីវ នាពេលខាងមុខ។
សម្តេចតេជោបន្តថា លោកស្រី បានបំពេញការងារដ៏លំបាកនៅកម្ពុជា ពិសេសក្នុងដំណាក់កាល នៃការចូលរួមប្រយុទ្ធប្រឆាំងនិងជំងឺកូវីដ១៩។ សម្តេចតេជោ បានសម្តែងការពេញចិត្ត ចំពោះកិច្ចសហប្រតិបត្តិការគ្រប់បែបយ៉ាងលើការប្រយុទ្ធប្រឆាំងជំងឺដ៏កាចសាហាវ ក្នុងនោះសហគមន៍អឺរ៉ុប បានផ្តល់វ៉ាក់សាំងជាង ៩៣ម៉ឺនដូស រួមទាំងឥណទានជិត ៥០០លានដុល្លា ដល់កម្ពុជា ក្នុងដំណាក់កាល នៃការប្រយុទ្ធប្រឆាំងជំងឺកូវីដ១៩។
លោកស្រីឯកអគ្គរដ្ឋទូតសហភាពអឺរ៉ុប បានជំរាបជូនសម្តេចតេជោថា ក្នុងរយៈពេល៤ឆ្នាំ នៃការបំពេញបេសកកម្មការងារនៅកម្ពុជា បើទោះបីជាមានការលំបាក ប៉ុន្តែលោកស្រី មានការពេញចិត្ត ចំពោះកិច្ចសហប្រតិបត្តិការដែលទទួលបានពីរាជរដ្ឋាភិបាល ក៏ដូចជាគ្រប់ផ្នែកទាំងអស់ ពោលគឺកិច្ចសហប្រតិបត្តិការទាំងនោះ គឺជាទាក់ទំនងរវាងអាស៊ាន និងសហគមន៍អឺរ៉ុប។
លោកស្រី ក៏បានជំរាបជូនសម្តេចតេជោ ចំពោះជំនួបរបស់លោកស្រី ជាមួយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ដែលបានមានប្រសាសន៍បើកចំហចំពោះទំនាក់ទំនងរវាងកម្ពុជា និងសហគមន៍អឺរ៉ុបបន្តទៅទៀត។
ក្នុងកិច្ចសន្ទនានោះដែរ សម្តេចតេជោ បានរំលឹកពីការងារដែលបានធ្វើកន្លងមក ទាក់ទិនទៅនិងសហគមន៍អឺរ៉ុបដែលបានជួយកម្ពុជា ទី១) ការប្រយុទ្ធប្រឆាំងជំងឺកូវីដ១៩, ទី២ ជួយកសាងស្ថានីយ៍ទឹកស្អាតនៅបាក់ខែង ដែលបានជួយដល់រាជធានីភ្នំពេញ និងខេត្តជំវិញមានទឹកស្អាតប្រើប្រាស់គ្រប់គ្រាន់។
សម្តេចប្រធានគណបក្សប្រជាជនកម្ពុជា ក៏បានរំលឹកផងដែរ នូវកិច្ចប្រជុំកំពូលអាស៊ីអឺរ៉ុប ដែលកម្ពុជាធ្វើជាម្ចាស់ផ្ទះ តាមរយៈអនឡាញ។ សម្តេចតេជោបន្តថា ប្រសិនបើគ្មានកិច្ចសហប្រតិបត្តិការគ្នាយ៉ាងល្អប្រសើរទេ គឺពិតជាមិនអាចធ្វើឡើងប្រកបដោយរលូនភាពជោគជ័យនោះទេ ពោលសហភាពអឺរ៉ុប បានសម្របសម្រួលលើជំហនៃតំណាងរបស់សហភាពមីយ៉ាន់ម៉ា ដែលរូបសម្តេចបានជួប និងប្រធានសហគមន៍អឺរ៉ុបនៅគ្រប់ទីកន្លែងទាំងអស់ ដែលជំរុញឱ្យកិច្ចប្រជុំកំពូលអាស៊ីអឺរ៉ុប បញ្ចប់ទៅប្រកបដោយភាពជោគជ័យ ក្នុងពេលដែលកម្ពុជាធ្វើជាម្ចាស់ផ្ទះ។
សម្តេចតេជោ បានស្នើឱ្យមានកិច្ចសហប្រតិបត្តិការបំពេញឱ្យគ្នាទៅវិញទៅមក រវាងអាស៊ាន និងអឺរ៉ុប ដោយអឺរុបមានប្រទេសជាសមាជិកចំនួន២៧ និងអាស៊ាន មានប្រទេសសមាជិក១០ និងទីម៉រខាងកើត ដែលនឹងចូលជាសមាជិកពេញសិទ្ធនាពេលខាងមុខ និងមានប្រជាជនជាង ៦០០លាននាក់ ធ្វើឲ្យសេដ្ឋកិច្ចនិងផលប្រយោជន៍បំពេញឲ្យគ្នាទៅវិញទៅមក ជាជាងការប្រកួតប្រជែងលើភូមិសាស្រ្តនយោបាយ។
លោកស្រី ម៉ារីយា ដែល ខាមែន ម៉ូរេណូ មានប្រសាសន៍ថា កម្ពុជាមានបទពិសោធន៍ច្រើនក្នុងការផ្សះផ្សារជាតិ ខុសពីប្រទេសស្រីលង្កា ហើយក្រៅពីនោះកម្ពុជាមានបទពិសោធន៍ច្រើនលើវិស័យផ្សេងៗ ដូចជាវិស័យបោសសំអាតគ្រាប់មីន សិទ្ធិមនុស្ស ស្រ្តី។ លោកស្រីបន្តថា លោក ស្រី នឹងមានឱកាសជួបសម្តេចនៅប្រទេសស្រីលង្កានាពេលខាងមុខ។ ជាការឆ្លើយតបសម្តេចមានប្រសាសន៍ថា សម្តេចខកខានអញ្ជើញទៅប្រទេសស្រីលង្ការយៈពេល ៤០ឆ្នាំមកហើយ ហើយកាលពី ៤០ឆ្នាំមុន ស្រីលង្កាមានការរីកចម្រើនលូតលាស់ជាងប្រទេសកម្ពុជាឆ្ងាយណាស់ ប៉ុន្តែស្រីលង្កាពេលនេះ បានជួបនូវវិបត្តិសេដ្ឋកិច្ច មានការដូលរលំខាងសេដ្ឋកិច្ចយ៉ាងធ្ងន់ធ្ងរ៕
