(ភ្នំពេញ)៖ អគ្គិភ័យបានលេបត្របាក់ហាងសម្លៀកបំពាក់មួយកន្លែងយីហោ «ខ្ញុំគឺជាជនជាតិខ្មែរ NT» នាព្រឹកថ្ងៃទី២៨ ខែសីហា ឆ្នាំ២០២៣នេះ នៅចំណុចផ្ទះលេខ៤៧ តាមបណ្តោយផ្លូវហាណូយ ក្រុមទី៣ ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ បណ្តាលឱ្យខូចខាតសម្ភារមួយចំនួន និងមិនមានអ្នកណាម្នាក់រងគ្រោះនោះឡើយ។
បើតាមលោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ បានប្រាប់បណ្តាញព័ត៌មាន Fresh News ឲ្យដឹងថា ដោយនៅក្នុងប្រតិបត្តិការ ខាងលើនេះ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន០៦គ្រឿង ក្នុងនោះរួមមាន៖ រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០៦គ្រឿង ប្រើប្រាស់ទឹកអស់០២ឡាន ស្មេីរនឹង ០៨ម៉ែត្រគូប។
លោកវរសេនីយ៍ឯក ព្រហ្ម យ៉ន បានបញ្ជាក់ថា ចំពោះករណីគ្រោះអគ្គិភ័យខាងលើនេះ ជាប្រភេទសំណង់ ថ្មបេតុង ទំហំ (៤ម៉ែត្រ គុណ ១០ម៉ែត្រ) បានឆេះបន្ទប់ដេរជាន់ទី០១ ចំនួន ០១បន្ទប់, ម៉ាស៉ីនដេរចំនួន ២០គ្រឿង, ម៉ាស៉ីនត្រជាក់ចំនួន ០២គ្រឿង, ត្រណាត់មួយចំនួន នឹងពុំបណ្តាលឲ្យឆេះរាលដាលដល់ផ្ទះអ្នកក្បែរខាងឡេីយ។
ចំពោះករណីអគ្គិភ័យខាងលើនេះ ត្រូវបានកម្លាំងសមត្ថកិច្ចជំនាញរបស់យើងធ្វើការគ្រប់គ្រងបាននៅវេលាម៉ោង ១០៖៤៥នាទីព្រឹក ក្នុងនោះមិនបានបណ្តាលឲ្យអ្នកណាម្នាក់រងរបួសនោះឡេីយ។ រឺឯមូលហេតុដែលបណ្តាលឲ្យកើតមានគ្រោះអគ្គិភ័យខាងលើនេះ គឺបណ្តាលមកពីផ្សារដំបូលធ្លាក់កម្ទេចធូបផ្សារបង្កជាអគ្គិភ័យ៕
