(ភ្នំពេញ)៖ Facebook ដែលជាទូទៅគេស្គាល់ថា ជាបណ្ដាញទំនាក់ទំនងសង្គមដ៏ទូលំទូលាយមួយនៅលើពិភពលោក ហើយក៏ត្រូវបានគេចាត់ទុកថាជាបណ្ដាញសំរាប់ចែក​រំលែក និងផ្ដល់ព័ត៌​មាន​ឲ្យគ្​នាទៅវិញទៅមកដ៏ល្អបំផុតផងដែរនៅលើលោកយើងនេះ។

ដោយឡែកនៅកម្ពុជាយើង បណ្ដាញទំនាក់ទំនងសង្គម Facebook ក៏កំពុងក្លាយជាទីពេញនិយមបំផុតក្នុងការលេង និងទំនាក់ទំនងផ្ដល់ព័ត៏មានតាមបែប​សាធារណៈឲ្យគ្នាទៅវិញ​ទៅមក រហូតដល់​អ្នកខ្លះញៀនលេង Facebook ស្ទើតែចង់ដូចអ្នកញៀនបារី ញៀនគ្រឿងញៀនទៅហើយ។ បច្ចុប្បន្ននេះ មិនថាតែយុវវ័យនោះទេ ដែលនាំគ្នាលេង Facebook សូម្បីតែចាស់ៗមិនចេះ អាយធី (IT)​សោះ ក៏ខំចំណាយលុយទិញទូរស័ព្ទ​ស្មាតហ្វូនភ្ជាប់អ៉ិនធឺណិត បញ្ចូលលុយឲ្យកូន ឬចៅបង្កើត Account Facebook លេងនឹងគេដែរ រហូតដល់នាយករដ្ឋមន្ត្រី ព្រះសង្ឃ ទៀតផង។

តាមពិតបណ្ដាញទំនាក់ទំនងសង្គម Facebook បានផ្ដល់ផលប្រយោជន៍យ៉ាងច្រើនលើសលប់ដល់អ្នកលេង ដូចជាងាយស្រួលធ្វើការទំនាក់ទំនងគ្នា ការទទួលបានព័ត៏មានពីសង្គម ពីសហគមន៍ និង​ពីពិភពលោកទាំងមូលបានលឿន គេអាចលេងទាញយកប្រយោជន៏លើផ្នែកសេដ្ឋកិច្ច និងចំណេះដឹង រួមទាំងអត្ថប្រយោជន៏ផ្សេងៗទៀតបានលឿន។ ប៉ុន្តែផ្ទុយមកវិញវាក៏ផ្ដល់ផលអាក្រក់ផងដែរ ប្រសិនបើអ្នកលេងមិនចេះលេង មិនយល់ពីរបៀបលេង និងលេងលើផ្លូវខុសជាដើម។ល។

បច្ចុប្បន្ននៅកម្ពុជាយើងមានអ្នកលេងច្រើន ហើយក៏មានអ្នកខ្លះលេងដោយទាញយកប្រយោជន៍បានត្រឹមត្រូវពីបណ្ដាញទំនាក់ទំនងសង្គមនេះ តែក៏មានអ្នកខ្លះលេងដើរលើផ្លូវខុសដោយ​មិនដឹងខ្លួន និងអ្នកខ្លះទៀតបានយកបណ្ដាញទំនាក់ទំនងសង្គមដ៏ទូលំទូលាយនេះ ទៅលេងបំរើផលប្រយោជន៍ទុច្ចរិតក៏មានដែរ។

* អ្នកលេង Facebook ក្នុងផ្លូវល្អ៖
អ្នកលេង Facebook ក្នុងផ្លូវល្អគឺគេទាញយកផលប្រយោជន៏ ពីការលែងនេះរួមមានដូចជា គេលេងដើម្បីធ្វើការទំនាក់ទំនងជាមួយក្រុមគ្រួសារ ញាតិមិត្ត និងមិត្តភក្ដិ ការចែករំលែករូបថត និងព័ត៌មាន​ឲ្យគ្នាទៅវិញទៅមក។ គេក៏អាចលេងចែករំលែកព័ត៌មាន និងរូបថតក៏ដូចជា ចំណេះដឹង និងបទពិសោធន៏ដែលយើងមានដើម្បីឲ្យសាធារណជនបានដឹងបានឃើញ។ ក្រៅពីនេះគេក៏អាចប្រើ Face​book លេងដើម្បីតាមដាន និងផ្សព្វផ្សាយព័ត៏មាន និងដំណឹងថ្មីៗ ស្រាវជ្រាវរកឯកសារ និងយកបណ្ដាញនេះទៅធ្វើការឃោសនានយោបាយ ធ្វើអាជីវកម្មផ្សព្វផ្សាយពាណិជ្ជកម្ម លក់ដូរ រួមទាំងការលេង​កំសាន្តបំបាត់ការនើយហត់ជាដើម។

* អ្នកលេង Facebook ក្នុងផ្លូវអាក្រក់៖
អ្នកលេង Facebook ខ្លះ មិនយល់ពីច្បាប់ មិនយល់ពីក្រមសីលធម៌ និងមិនយល់ពីអត្ថប្រយោជន៏នៃការលេង Facebook ហើយក៏មានអ្នកខ្លះយល់ហើយ តែនៅបំពានក៏​នាំគ្នាយកបណ្ដាញ​សង្គមមួយនេះ ទៅប្រើលើផ្លូវខុស ដូចជាផ្សព្វផ្សាយព័ត៌មាន និងរូបភាពបំភ្លៃ បំភ្លើស និងព័ត៌មានមិនពិត ផ្សព្វផ្សាយរូបភាព​អាសអាភាស ផ្សព្វផ្សាយព័ត៌មាន និងរូបភាពរំលោភទៅលើសិទ្ធិអ្នកដ៏ទៃ រហូតដល់អ្នកខ្លះបានប្រើវេទិកា Facebook យកទៅធ្វើការជេរបញ្ចោវាយប្រហារ ទៅលើអ្នកដ៏ទៃ ឬវាយប្រហារគ្នាបំរើឲ្យមហិច្ឆតានយោបាយផ្ទាល់ខ្លួន និងក្រុមបក្ខពួករបស់ខ្លួនក៏មានដែរ រហូតដល់អ្នកខ្លះថែមទាំងប្រើបណ្ដាញនេះ ប្រមាថទៅលើ ព្រះមហាក្សត្រ ដែលរដ្ឋធម្មនុញ្ញបានការពារ ការប្រមាថទៅលើព្រះសង្ឃ ទៅលើឥស្សរជន ឬបុព្វការីជន ចាស់ព្រឹទ្ធាចារ្យ រួមទាំងជេរប្រមាថ​កាតទាន ទៅលើអ្នកខ្លះដែលមានអាយុស្មើ យាយ តា ឬស្មើរឪពុកម្ដាយរបស់ខ្លួនថែមទៀត ធ្វើមើលតែអ្នកទាំងអស់នោះមានអាយុស្មើ ឬប្អូនខ្លួនឯង ដោយមិនគិតថា ខ្លួនឯងធ្វើបែបនេះល្មើសច្បាប់ ខ្វះសីលធម៌ គ្មានសុជីវធម៌ នៅពេលដែលខ្លួនឯងជាជាតិសាសន៏ខ្មែរកាន់ព្រះពុទ្ធសាសនា ដោយពួកគេគិតថា នេះគឺជាសិទ្ធិសេរីភាពក្នុងការបញ្ចេញមតិរបស់ខ្លួនទៅវិញ។

សម័យទំនើបជឿនលឿនហើយ កូនខ្មែរទាំងឡាយល្មមជំរុះចោលនូវភាពអសីលធម៌ និងភាពគ្មានសុជីវធម៌ចោលឲ្យអស់ ជាពិសេសល្មមបញ្ចប់ការប្រើប្រាស់​បណ្ដាញទំនាក់ទំនងសង្គម​ដែលជាបណ្ដាញផ្សព្វផ្សាយ​សាធារណៈតាមផ្លូវខុស ដោយប្រើប្រាស់ភាសាជេរប្រមាថ ឬរូបភាពអាសអាភាស និងខ្វះសុជីវធម៌តទៅទៀត។

គេគួរតែនាំគ្នាប្រើប្រាស់បណ្ដាញសង្គមមួយនេះឲ្យមានផលចំណេញដល់ខ្លួនឯង ដល់ក្រុមគ្រួសារ និងចំណេញដល់សង្គមជាតិវិញទើបជាការប្រសើរ៕