(កណ្តាល)៖ មេបញ្ជាការអាវុធហត្ថខេត្តកណ្តាល លោកឧត្តមសេនីយ៍ត្រី សំ តុលា បានបន្តដាក់ផែនការដល់កងកម្លាំងរបស់ខ្លួនទាំងអស់ត្រូវពង្រឹង កាន់តែខ្លាំងលើការបង្ក្រាបបទល្មើសនានា ជាពិសេសបទល្មើស​ប្លន់ប្រដាប់អាវុធ និងបញ្ហាគ្រឿងញៀនជាដើម។

សូមបញ្ជាក់ថា ក្រុមចោរ៦នាក់ ត្រូវបានកម្លាំងនគរបាលក្រសួងមហាផ្ទៃ ដេញបង្ក្រាបនៅទឹកដីឃុំក្រាំងយ៉ូវ ស្រុកស្អាង ខេត្តកណ្តាល កាលពីប៉ុន្មានថ្ងៃមុននេះ ដោយចាប់ខ្លួន៦នាក់ រថយន្តមួយគ្រឿង រហូតបាញ់បាក់ជើងម្នាក់ ដែលក្រុម​ចោរទាំងនេះ បានរៀបចំផែនការប្លន់ផ្ទះលក់មាស លក់សាំង និងផ្ទេរប្រាក់ Wing នៅតាមផ្លូវចូលតាមវត្តធន់មន់។

លោកឧត្តមសេនីយ៍ត្រី សំ តុលា បានដាក់ផែនការដល់កងកម្លាំងរបស់ខ្លួនខាងលើនេះ បានធ្វើឡើងនៅថ្ងៃទី៦ ខែសីហា ឆ្នាំ២០១៦នេះនៅក្នុងពិធីប្រជំុបូកសរុបលទ្ធផលការងារប្រចាំខែ
កក្កដានិងលេីកទិសដៅបន្តខែសីហា ឆ្នាំ២០១៦។

កិច្ចប្រជុំមួយនេះក៏មានការអញ្ជើញចូលរួមពីមេបញ្ជារង​ មេបញ្ជាការងសេនាធិការ ប្រធាន អនុប្រធានមន្ទីរ នាយការិយាល័យ មេបញ្ជាការក្រុងស្រុកនិងបញ្ជាការរង​ទទួលការងារប្រតិបត្តការ​ទាំង១១ក្រុងស្រុក។

នៅចំពោះមុខកងកម្លាំងអាវុធហត្ថលោកឧត្តមសេនីយ៍ត្រី សំ តុលា បានធ្វើការផ្សព្វផ្សាយ​ និង​ ពង្រឹង​ការងារការពារសុវត្ថិភាព សន្តិសុខ សណ្តាប់ធ្នាប់ ជូន​ថ្នាក់ដឹកនាំ​ (ថ្នាក់ជាតិ​ ក្រោមជាតិ​) និង​ ប្រជាជន​ ក្នុងខេត្តកណ្តាល​ ឲ្យបានប្រសើរឡើង។​

លោកមេបញ្ជាការក៏បានធ្វើការផ្សព្វផ្សាយបន្ថែមលើបទបញ្ជាទាំង៩ ចំណុចរបស់​ នាយឧត្តមសេនីយ៍សៅ សុខា អគ្គមេបញ្ជាការរងកងយោធ​ពលពលខេមរភូមិន្ទ និង​ ជាមេបញ្ជាការកងរាជ​អាវុធហត្ថ​លេីផ្ទៃប្រទេស។

ជាមួយគ្នានេះលោកមេបញ្ជាការ បានជំរុញឲ្យពង្រឹងការងារ​ បង្ការ​ បង្រាប​ បទល្មើស​ និង​ ជួយសង្គ្រោះប្រជាពលរដ្ឋ​ បន្ថែមទៀត​ ពិសេសលួចប្លន់​ និង​ បទល្មើសគ្រឿងញៀន។​

យ៉ាងណាក៏ដោយ លោកឧត្តមសេនីយ៍ ក៏មិនភ្លេច ចំពោះការ កោតសរសើរដល់កងកម្លាំងគ្រប់ជាន់ថ្នាក់ដែលបានខិតខំអស់ពីកាយចិត្តដើម្បីបម្រើជាតិ​ មាតុភូមិ​ និង​ ប្រជាជន​ កន្លងទៅ​ដោយឥតលក្ខខណ្ឌ ហើយត្រូវបន្តថែមទៀត៕