(ភ្នំពេញ)៖ ស្ថានីទូរទស្សន៍កងយោធពល ខេមរភូមិន្ទប៉ុស្ដិ៍លេខ៥ បានរៀបចំកម្មវិធីតាំងពិព័រណ៍ ផលិតផលនានា មានដូចជាមុខទំនិញ និងចំណីអាហារ មានគុណភាពខ្ពស់ ដោយក្នុងនោះ បានអញ្ជើញវត្តមានកំពូលតារាចម្រៀងថៃដ៏ល្បីល្បាញលោក ទិកហ្ស៊ីរ៉ូ (Tik Shiro) ដែលត្រូវបានគេស្គាល់ជាទូទៅថា ជាម្ចាស់បទ «ម៉ា ម៉ា ម៉ា ចយ កាន់ៗ» ដោយបានប៉ះជាមួយនឹងកំពូលតារាចម្រៀង ខេមរៈ សិរីមន្ត និងកញ្ញា សុខ ពិសី ធ្វើឲ្យកក្រើកឆាកតន្ត្រីប៉ុស្ដិ៍លេខ៥ ខណៈដែលទស្សនិកជនបានចូលរួមទស្សនា យ៉ាងច្រើនកុះករ នាល្ងាចថ្ងៃទី០៥ ខែសីហា នៅក្នុងបរិវេណសង្វៀន TIFFY ARINA ខណ្ឌជ្រោយចង្វា។
បទចម្រៀងមនោសញ្ចេតនា និងញាក់កន្ត្រាក់អារម្មណ៍ដ៏ពេញនិយមជាច្រើនបទ របស់របស់តារាចម្រៀងទាំងបីរូបខាងលើ បានបង្កើតឲ្យមានសំឡេងហ៊ោកញ្ជៀវ យ៉ាងកងរំពងពីអ្នកទស្សនា។ ការអញ្ជើញសិល្បករល្បីឈ្មោះ នៃព្រះរាជាណាចក្រកម្ពុជា និងព្រះរាជាណាចក្រថៃ ឲ្យមកច្រៀងរួមគ្នាលើឆាកតែមួយនេះ គឺដើម្បីបង្កើតទស្សនីយភាពប្លែកភ្នែក សម្រាប់ទស្សនិកជន។
លោក ហួង តារាមុន្នី ប្រធានផលិតកម្មវិធីកម្សាន្តនៅប៉ុស្ដិ៍លេខ៥ បានឲ្យដឹងថាលោក ទិកហ្ស៊ីរ៉ូ ត្រូវបានអញ្ជើញឲ្យបើកឆាកការប្រគំតន្ត្រី ដោយសារតែមើលឃើញថា លោកល្បីឈ្មោះនៅក្នុងប្រទេសថៃ និងជាតារាម្នាក់នៅកម្ពុជា ក៏ស្គាល់តារារូបនេះច្រើន។
លោកបានបន្តថា តារាចម្រៀងថៃរូបនេះ គ្រាន់តែជាតារាចម្រៀងម្នាក់ ក្នុងចំណោមតារាល្បីរបស់ថៃ ដែលត្រូវបង្ហាញខ្លួនតាមរយៈការអញ្ជើញ របស់ប៉ុស្ដិ៍លេខ៥ប៉ុណ្ណោះ។ ដោយសារតែពេលបន្តបន្ទាប់ គឺប៉ុស្ដិ៍លេខ៥ សម្រេចធ្វើការប្រគំតន្ត្រី អមដោយការតាំងពិព័រណ៌រៀងរាល់មួយខែម្ដង នៅរៀងរាល់ថ្ងៃសុក្រដើមខែ រហូតដល់ដាច់ឆ្នាំ២០១៦ ហើយកំណត់ចំណាយប្រាក់អញ្ជើញ តារាថៃល្បីឈ្មោះម្នាក់ ឬ២នាក់ឲ្យមកច្រៀងអម ជាមួយកំពូលតារាចម្រៀងរបស់ខ្មែរ។
ដោយឡែក តារាចម្រៀង និងតារាសម្តែង Tik Shiro ដែលប្រជាជនខ្មែរធ្លាប់បានស្គាល់ តាមរយៈការសម្តែងខ្សែភាពយន្ត ជាយូរមកហើយនោះ បានញ្ជាក់ថា លោកពិតជាមានអារម្មណ៍រំភើបរីករាយ ក្នុងការបានធ្វើដំណើរមកកាន់កម្ពុជាជាថ្មី កាលពីថ្ងៃទី០៥ ខែសីហា នេះ ដើម្បីបានច្រៀងរួមជាមួយនឹងសិល្បករកម្ពុជា។ លោកបន្តថា នេះគឺជាលើកទី៤ ហើយ ដែលលោកបានមកកម្ពុជា ទាំងការច្រៀង និងដំណើរកម្សាន្ត។ លោកពិតជាសប្បាយចិត្តណាស់ ជាពិសេសនៅពេលដែលឃើញ អ្នកទស្សនាជាជនជាតិខ្មែរស្គាល់បទចម្រៀងរបស់លោក និងបានស្រែកហ៊ោជាការគាំទ្រយ៉ាងច្រើនកុះករ។
សូមបញ្ជាក់ថា កំពូលតារាចម្រៀង ទិកហ្ស៊ីរ៉ូ (Tik Shiro) បានប្រឡូកអាជីពចម្រៀង និងសម្ដែងរឿងប្រមាណជា៣០ឆ្នាំហើយ ដោយកាលពី១៥ឆ្នាំមុន លោកក៏បានទទួលពានជាតារាសម្ដែងប្រុសឆ្នើម ប្រចាំប្រទេសថៃ អមដោយការទទួលស្គាល់ថា ជាតារាចម្រៀងលំដាប់ជួរមុខម្នាក់ អស់រយៈពេលច្រើនឆ្នាំនោះផង។ ស្ថិតក្នុងវ័យ៥៥ឆ្នាំ លោក ទិកហ្ស៊ីរ៉ូ នៅតែមានសកម្មភាពខ្លាំង នៅក្នុងពិភពចម្រៀង បើទោះជាការចេញបទថ្មី នៅមិនសូវមានច្រើនដូចពេលមុនក្ដី៕
