(ភ្នំពេញ)៖ ស្នាដៃទី២ របស់ផលិតកម្ម «Z En​ter​tain​ment» ដែលជាប្រភេទរឿងបែបអភិនិហា ដឹងជាតិរបស់តួអង្គប្រុសស្រី មានចំណងជើងថា «អមតៈ» បានប្រារព្ធកម្មវិធី​បើកសម្ពោធបញ្ចាំង​​ជាផ្លូវការ​ហើយ ខណៈរឿងនេះកំពុងតែស្ថិតក្នុង​​ភាពចម្រូងចម្រាសគ្នា រវាងអ្នកនិពន្ធរឿង និងចាងហ្វាងផលិតកម្ម «Z En​ter​tain​ment» ពោលគ្រាន់តែ​សម្ពោធបញ្ចាំង បានរយៈពេលមួយថ្ងៃភ្លាម ក៏ផ្ទុះកូដកម្មតវ៉ា ​ពីសំណាក់មនុស្សមួយក្រុម ដឹកនាំដោយលោក សាន សេកសុខុម ដែលអះអាងថា ផលិតកម្ម​នេះ មិនបានគោរពសិទ្ធិ​អ្នកនិពន្ធ។

ថ្លែងនៅក្នុងពិធីបើកសម្ពោធ ចាក់បញ្ចាំងជាផ្លូវការ ក្រោមវត្តមាន​អ្នកសិល្បៈល្បីៗ​ជាច្រើន និងក្រោមវត្តមានលោក ស៊ិន ចាន់សាយ៉ា ប្រធាននាយកដ្ឋាន​ភាពយន្ត និងទស្សនិយភាព នៃក្រសួងវប្បធម៌ និងវិចិត្រសិល្បៈ លោក លៀង ខេងហេង ចាងហ្វាងផលិតកម្ម «Z En​ter​tain​ment» និងជាផលិតករ ផងនោះ មានប្រាប់ឲ្យដឹងថា រឿង អមតៈ ជាប្រភេទភាពយន្តថ្មី​មួយទៀត ដែលមានឈុតឆាកអភិនិហា ជាច្រើន ដែលជាលក្ខណៈ​ខុសប្លែកពីរឿងដទៃ នឹងធ្វើឲ្យអ្នកគាំទ្រ ទស្សនាជក់ចិត្តដិត​អារម្មណ៍!»

លោកបន្តថា ភាពយន្តនេះ បានចំណាយពេលថត និងចាយទុនអស់ប្រមាណ​​​ ជាង៧ម៉ឺនដុល្លារ ដើម្បីឲ្យផ្ទៃរឿងមានគុណ​ភាពល្អ ដោយសាររឿងបាន​និ​យាយ ពីតួឯកស្រី​បង្ហាញ​​ការតស៊ូរង់ចាំស្នេហាស្មោះ រហូតដល់៥០០ឆ្នាំ នៅក្នុងប្រាសាទ ហើយទីបំផុតស្នេហ៍​ស្មោះ​ស្ម័គ្រនោះ ពិតជាបានជួបដូច​បំណង ប៉ុន្តែក៏បាន​នាំមក​នូវ​បញ្ហា និងអហ្ភូហេតុ​អភិនិហា​ផ្សេងៗ​ទៀត ជាច្រើនផងដែរ។ រឿងនេះ លោកសង្ឃឹមថា នឹងទទួលបានជោគជ័យ ព្រោះត្រូវបានសម្រិតសម្រាំងឡើង​យ៉ាងល្អ ទាំងតួសម្ដែង ទីតាំងថត ប្លង់ថត និងសាច់រឿង។

ដោយឡែក ពាក់ព័ន្ធជាមួយនឹងការកើតទុក្ខ​​មិនសុខចិត្ត របស់អ្នកនិពន្ធ​លោក សាន សេកសុខុម ដែលបាន​ចោទថា ផលិតកម្ម មិនបានគោរពកម្មសិទ្ធិបញ្ញា​របស់អ្នកនិពន្ធ រហូតផ្ទុះការតវ៉ា​នៅពេលចាក់បញ្ចាំងនេះ ត្រូវបានលោក លៀង ខេងហេង បានបង្វែសំណួរ​ឲ្យសួរទៅលោក ជា ឌីណាង ដែលជាអ្នកគ្រប់គ្រង​ទូទៅ ក្នុងការផលិតកម្ម ដើម្បីធ្វើការបក​ស្រាយ។

លោក ជា ឌីណាង បាននិយាយថា ផលិតកម្ម «Z Entertainment» នឹងចាត់វិធានការតាមផ្លូវច្បាប់ ចំពោះលោក សាន សេកសុខុម ដែលបានបំពាន លាបពណ៌ផលិតកម្ម​ទាំងគ្មានការពិត ដោយប្ដឹងពី បទបរិហារកេរ្តិ៍ផលិតកម្ម។ ផលិតកម្ម​មិនបានលួច​​ចម្លងកម្មសិទ្ធិបញ្ញា ​របស់លោក សាន សេកសុខុម នោះឡើយ​។ ផលិតកម្មកំពុងតែពិចារណា ចំពោះទង្វើរបស់លោក សាន សេកសុខុម ដែលបានបំភ្លៃការពិតឲ្យទស្សនិកជន ភ័ន្តច្រឡំចំពោះផលិតកម្ម «Z Entertainment» ហើយនឹងមានវិធានការចំពោះបុគ្គលនេះ ក្នុងពេលឆាប់ៗនេះ ។

លោកបន្ថែមថា តាមការពិត លោក សាន សេកសុខុម បានបោះបង់ការងារចោល តាំងចាប់ផ្ដើមថតរឿង «ល្បុក្កតោចម្លែក»មកម្ល៉េះ ហើយលោកបានខលហៅឲ្យត្រឡប់មកវិញ ចំនួន២ទៅ៣ដងមកហើយ តែលោក សាន សេកសុខុម មិនព្រមមក។ ជាមួយគ្នានេះ ផលិតកម្មមិនអាចបណ្ដែតបណ្ដោយចាំ មនុស្សពីរបីនាក់រហូតខូចខាត​ការផលិតកុន តាមគម្រោងបានឡើយ។ ប៉ុន្តែពេលសមិទ្ធផលនេះ បានចេញជាផ្លែផ្កា បែរជាមកឡាំប៉ាចង់បានទាំងបំពាន ដូច្នេះលោកមិនអាចយល់ព្រមដូចគ្នា។

លោក ជា ឌីណាង បានបន្តទៀតថា លោកសូមទទូចដល់ទស្សនិកជន មេត្តាពិចារណាឲ្យបានគ្រប់ជ្រុងជ្រោយ មុននឹងជឿលង់​ទៅលើអ្វីមួយ ជាពិសេសការតវ៉ានេះ ថាតើនរណាខុស​ នរណាត្រូវ ដោយសូមឲ្យមានការថ្លឹងថ្លែង​ឲ្យបានច្បាស់ ព្រោះលោក សាន សេកសុខុម ក៏មានកំហុសឆ្គងច្រើនមកហើយដែរ កាលលោកនៅបំពេញការងារ ជាមួយនឹងផលិតកម្ម «Z Entertainment »៕

លោក សាន សេកសុខុម