(កំពង់ស្ពឺ)៖ អភិបាលរងខេត្តកំពង់ស្ពឺលោកស្រី ឡុង បូណារ៉េត បានជំរុញឱ្យមានចលនាលើកកម្ពស់តម្លៃសីលធម៌សង្គម ការចាត់វិធានការបង្ក្រាប និងពង្រឹងការអនុវត្តច្បាប់ម៉ឺងម៉ាត់ ដើម្បីទប់ស្កាត់អំពើរំលោភសេពសន្ថវៈលើកុមារ មិនទាន់គ្រប់អាយុឱ្យមកនៅកម្រិតទាបបំផុត។
ការណ៍នេះធ្វើឡើងក្នុងកិច្ចប្រជុំក្រុមការងារឆ្លើយតបជាពហុវិស័យចំពោះអំពើហិង្សា ទាក់ទងនិងយេនឌ័រខេត្តកំពង់ស្ពឺ ថ្ងៃទី១៧ ខែសីហា ឆ្នាំ២០២៣ នៅមន្ទីរកិច្ចការនារីខេត្តកំពង់ស្ពឺ។
លោកស្រី ឡុង បូណារ៉េត បានលើកឡើងថា ក្នុងមួយឆ្នាំៗមានជនល្មើសមិនតិចនាក់ទេដែលត្រូវសមត្ថកិច្ចចាប់ខ្លួន និងត្រូវតុលាការផ្តន្ទាទោសដាក់ពន្ធនាគារដោយសារតែអំពើហិង្សា និងការរំលោភសេពសន្ថវៈលើកុមារ។ ជាមួយនិងការកើតមានករណីនេះអាជ្ញាធរខេត្តបាននិងកំពុងតែសិក្សាពីមូលហេតុដែលនាំឱ្យមានបទល្មើសនេះកើតឡើង និងរិះរកគ្រប់មធ្យោបាយបង្កើតផែនការយុទ្ធសាស្ត្រដើម្បីប្រយុទ្ធប្រឆាំងនិងករណីរំលោភសេពសន្ថវៈនេះ។
ជាវិធានការសំខាន់ដើម្បីទប់ស្កាត់ករណីខាងលើ ឱ្យទទួលបានប្រសិទ្ធិភាពខ្ពស់គឺចាំបាច់ត្រូវបង្កើនការផ្សព្វផ្សាយអប់រំឱ្យបានទូលំទូលាយដល់ប្រជាពលរដ្ឋក្នុងមូលដ្ឋាននិងការលើកកម្ពស់ការយល់ដឹងអំពីសីលធម៌សង្គម និងតំលៃនៃសង្គម។ ចាត់វិធានការបង្ការសកម្មភាពដែលកើតមានឡើង និងបង្កើនប្រសិទ្ធិភាពការអនុវត្តច្បាប់ឱ្យបានតឹងរឹងនិងដាច់ខាតលើជនប្រព្រឹត្ត។
ជាមួយនោះដែរលោកស្រីអភិបាលរងខេត្ត ក៏បានជំរុញឱ្យស្ថាប័នពាក់ព័ន្ធទាំងកម្លាំងសមត្ថកិច្ច ត្រូវតែយកចិត្តទុកដាក់លើការព្យាបាលជម្ងឺផ្លូវចិត្ត ពង្រឹងការអនុវត្តច្បាប់ ផ្តន្ទាទោសជនល្មើស បង្កើនការបង្ក្រាបវីដេអូអាសអាភាស និងពង្រឹងការអប់រំ សីលធម៌សង្គមឱ្យកាន់តែខ្លាំងក្លាឡើងថែមទៀត ព្រមទាំងលុបបំបាត់ឱ្យបាននូវការប្រើប្រាស់គ្រឿងញៀន។
យោងតាមរបាយការណ៍របស់មន្ទីរកិច្ចការនារីខេត្តកំពង់ស្ពឺ បានឱ្យដឹងថា ក្នុងរយៈពេល៥ខែ ក្នុងឆ្នាំ២០២៣ កន្លងមកនេះ អំពើហិង្សាកើតឡើង២៨ករណី អំពើរំលោភបំពានផ្លូវភេទលើ៩ក្រុងស្រុកមាន១៤ករណី មានជនរងគ្រោះចំនួន១៥នាក់ ជាអនីតិជន១០នាក់ និងមានជនសង្ស័យ១៧នាក់ជានីតិជន១៤នាក់ និងអនីតិជន៣នាក់៕
