(ភ្នំពេញ)៖ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានសព្វព្រះរាជហឫទ័យត្រាស់បង្គាប់ផ្តល់គោរមងារជា «ឧកញ៉ា» ជូនលោកស្រី សោម ទីណា។
ព្រះរាជក្រឹត្យត្រាស់បង្គាប់ផ្តល់គោរមងារតបតាមការក្រាបបង្គំទូលថ្វាយរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានធ្វើឡើងកាលពីថ្ងៃទី១៥ ខែសីហា ឆ្នាំ២០២៣។
សូមបញ្ជាក់ថា លោកស្រី សោម ទីណា គឺជាអគ្គនាយិការមជ្ឈមណ្ឌលកែសម្ភស្ស «Tina Beauty Care»។ លោកស្រី សោម ទីណា ត្រូវបានគេកត់សម្គាល់ថា តែងតែចូលរួមបរិច្ចាគថវិកាផ្ទាល់ខ្លួន ដើម្បីកសាងសមិទ្ធផលនានាបម្រើជាប្រយោជន៍ក្នុងសង្គម។ បន្ថែមពីលើនោះ លោកស្រី ជាមនុស្សប្រកបដោយចិត្តបុណ្យ ចិត្តមេត្តា ហើយតែងធ្វើសកម្មភាពមនុស្សធម៌ជួយដល់ទុរគតជន ជនចាស់ជរា និងជនដែលជួបការលំបាកជាដើម។
លោកស្រី សោម ទីណា បានបង្ហាញក្តីរំភើបរីករាយជាខ្លាំងចំពោះការទទួលបាននូវគោរមងារជា «ឧកញ៉ា» នាពេលនេះ។ លោកស្រី ចាត់ទុកការទទួលបាននូវគោរមងារជាកិត្តិយសដ៏ធំធេងសម្រាប់លោកស្រី និងក្រុមគ្រួសារទាំងមូល។
លោកស្រី បានក្រាបថ្វាយបង្គំបរមរាជានុញ្ញាតថ្លែងអំណរព្រះគុណយ៉ាងជ្រាលជ្រៅថ្វាយព្រះមហាក្សត្រខ្មែរ ដែលព្រះអង្គសព្វព្រះរាជហឫទ័យត្រាស់បង្គាប់ផ្តល់នូវគោរមងារជា «ឧកញ៉ា» ជូនលោកស្រី។
លោកស្រី សោម ទីណា ក៏បានគោរពថ្លែងអំណរគុណសម្តេចតេជោ ហ៊ុន សែន ដែលបានក្រាបបង្គំទូលថ្វាយព្រះមហាក្សត្រត្រាស់បង្គាប់ផ្តល់គោរមងារប្រកបដោយកិត្តិយសជូនលោកស្រី។
លោកស្រី ទីណា បានប្រកាសសន្យាប្រឹងប្រែងប្រតិបត្តិខ្លួនឱ្យសមនឹងគោរមងារដ៏ខ្ពង់ខ្ពស់នេះ តាមរយៈការធ្វើសកម្មភាពនានាជាប្រយោជន៍សង្គម និងប្រជាពលរដ្ឋ៕
