(ព្រៃវែង)៖ យ៉ាងហោចណាស់មានមនុស្សប្រុសស្រី ក្មេងចាស់ ចំនួន៤នាក់ បានស្លាប់ និងរងរបួស៧នាក់ ក្នុងករណីគ្រោះថ្នាក់ចរាចរណ៍រថយន្ត បុករថយន្ត ដែលបើកបរបញ្ច្រាសទិសគ្នាដ៏រន្ធត់មួយ នៅយប់ថ្ងៃទី១៣ ខែសីហា ឆ្នាំ២០២៣ ចំណុចភូមិស្ទឹងស្លូត ឃុំអ្នកលឿង ស្រុកពាមរក៍ ខេត្តព្រៃវែង។

សមត្ថកិច្ចស្រុកពាមរក៍ បានឲ្យដឹងថា មុនពេលកើតហេតុគេឃើញរថយន្តមួយគ្រឿង ម៉ាកហាយឡែនឌ័រ ពាក់ស្លាកលេខ2AZ-0614 បានធ្វើដំណើរមកក្នុងទិសដៅពីលិច ទៅកើតក្នុងល្បឿនយ៉ាងលឿន លុះមកដល់ចំណុចកើតហេតុ រថយន្តបានរេចង្កូតឆ្លងទ្រូងថ្នល់ទៅខាងឆ្វេង បុកចំពីមុខរថយន្តកូរ៉េដឹកផ្លែឈើ ដែលបើកមកបញ្ច្រាស់ទិសគ្នា យ៉ាងពេញទំហឹងបណ្តាលឲ្យរថយន្តហាយឡែនឌ័រក្រឡាប់ធ្លាក់ចេញពីផ្លូវ និងមនុស្សក្នុងរថយន្ត១០នាក់ ខ្ទាតចេញមកក្រៅដេកស្តូកស្តឹងពេញ ផ្លូវចំណែករថយន្តកូរ៉េដឹកផ្លែឈើក្រឡាប់ផ្ងាជើង។

គ្រោះថ្នាក់ខាងលើនេះ បានបណ្តាលឲ្យភាគីខាងរថយន្តម៉ាកហាយឡែនឌ័រ ស្លាប់ចំនួន៤នាក់ ក្នុងនោះមានក្មេងប្រុសអាយុ៨ខែម្នាក់ និងរបួសធ្ងន់ស្រាល៥នាក់ ចំណែកភាគីរថយន្តកូរ៉េរបួសធ្ងន់២នាក់។ សមត្ថកិច្ចបានបញ្ជាក់ថា នៅក្នុងហេតុការណ៍គ្រោះថ្នាក់ចរាចរណ៍ដ៏អាក្រក់នេះ គឺបណ្ដាលមកពីរថយន្តទាំងពីរបើកបរក្នុងល្បឿនលឿន ខ្វះការប្រុងប្រយ័ត្នបណ្ដាលឲ្យបុកគ្នាតែម្តង។ បច្ចុប្បន្នរថយន្តទាំងពីរយកទៅរក្សាទុកនៅប៉ុស្តិ៍រដ្ឋបាលអ្នកលឿង ដើម្បីដោះស្រាយតាមច្បាប់៕