(អង់គ្លេស)៖ ធនាគារអង់គ្លេស (Bank of England) បានកាត់បន្ថយអត្រាការប្រាក់ពី ០.៥ភាគរយ មកនៅត្រឹម ០.២៥ភាគរយ ដែលនេះជាការកាត់បន្ថយការប្រាក់លើកដំបូងបំផុតក្នុងរយៈពេល ៧ឆ្នាំចុងក្រោយ ចាប់តាំងពីវិបត្តិហិរញ្ញវត្ថុ ឆ្នាំ២០០៩។ នេះ​បើយោងតាម​ការចេញផ្សាយរបស់សារព័ត៌មាន BBC នៅមុននេះបន្តិច។

នៅក្នុងសេចក្ដីប្រកាសរបស់ធនាគារអង់គ្លេស បានឲ្យដឹងថា ដើម្បីបន្ធូរបន្ថយនូវវិបត្តិហិរញ្ញវត្ថុ​ ដែលមានចាប់តាំងពីឆ្នាំ ២០០៩មក ក៏ជាដោះស្រាយនូវបញ្ហាសេដ្ឋកិច្ច ក្រោយពេលអង់គ្លេសបោះឆ្នោតប្រជាមតិចាកចេញពី​សហភាពអឺរ៉ុបផងនោះ ធនាគារអង់គ្លេស បាន​សម្រេចទិញមូលបត្របំណុលរបស់រដ្ឋាភិបាលចក្រភពអង់គ្លេស ក្នុងតម្លៃ ៦០ពាន់លានផោន និង​មូលបត្របំណុលសាជីវកម្ម​ ចំនួន ១០ពាន់លានផោន។

គួរបញ្ជាក់ផងដែរថា នៅថ្ងៃទី២៣ ខែមិថុនាកន្លងទៅនេះ អង់គ្លេសបានបោះឆ្នោតប្រជាមតិចាកចេញពីសហភាពអឺរ៉ុប ដោយ​ជាលទ្ធផល សំឡេងគាំទ្រចាកចេញមានចំនួនច្រើន ដូច្នេះហើយអង់គ្លេសក៏សម្រេចចាកចេញពីសហភាពអឺរ៉ុប ដោយក្នុងនោះ​ អ្នកវិភាគបានលើកឡើងថា អង់គ្លេសអាចនឹងជួបវិបត្តិ​ជាច្រើនក្រោយពីចាកចេញ៕