(ព្រះសីហនុ)៖ ក្រសួងអប់រំ យុវជន និងកីឡា សហការអាជ្ញាធរជាតិប្រយុទ្ធប្រឆាំងគ្រឿងញៀន នាថ្ងៃទី១១ ខែសីហា ឆ្នាំ២០២៣ បានរៀបចំសិក្ខាសាលាអប់រំផ្សព្វផ្សាយស្តីពីការបង្ការការប្រើប្រាស់ផលិតផលថ្នាំជក់ បារីអេឡិចត្រូនិកគ្រឿងញៀនខុសច្បាប់ មេរោគអេដស៍ ជំងឺអេដស៍ និងគ្រោះថ្នាក់ចរាចរណ៍ផ្លូវគោកនៅតាមគ្រឹះស្ថានសិក្សានៅខេត្តព្រះសីហនុ ដែលមានអ្នកពាក់ព័ន្ធចូលរួមពីថ្នាក់ជាតិ និងក្រោមជាតិសរុប២២១នាក់។
លោកស្រី អ៊ុច សោភា ប្រធានមន្ទីរអប់រំ យុវជន និងកីឡា ខេត្តព្រះសីហនុ បានស្វាគមន៍និងរបាយការណ៍ពីការចូលរួមអនុវត្តនូវគោលនយោបាយជាតិស្តីពីសុខភាពសិក្សាដែលបានដាក់ឱ្យអនុវត្តតាំងពីឆ្នាំ២០១៩មក។
លោក ឯម ភាព បានថ្លែងថា បញ្ហាគ្រឿងញៀន អេដស៍ ចរាចរណ៍ និងបារីអេឡិចត្រូនិក គឺជាបញ្ហាសុខភាពដែលផ្សាភ្ជាប់ជាមួយប្រជាពលរដ្ឋដែលយេីងទាំងអស់គ្នាខិតខំចូលរួមបង្ការទប់ស្កាត់កុំឱ្យមានការរីករាលដាល។
លោក ហោ ប៊ុនឡេង អនុប្រធានអាជ្ញាធរជាតិប្រយុទ្ធនឹងជំងឺអេដស៍ បានថ្លែងថា បញ្ហាជំងឺអេដស៍នៅមិនទាន់ទៅណាចោលយេីងទេ បញ្ហានេះអាចត្រឡប់មកវិញបានពេលដែលយេីងធ្វេសប្រហែសខ្វះការប្រុងប្រយ័ត្ន។
លោកស្រី ឃុន រចនា អនុរដ្ឋលេខាធិការក្រសួងអប់រំ យុវជន និងកីឡា បានថ្លែងនូវការកោតសសេីរដល់អ្នកពាក់ព័ន្ធទាំងអស់ដែលបានខិតខំពង្រឹងបាននូវគុណភាពសិក្សាដែលជាផ្នែកមួយជួយពង្រឹងបាននូវគុណភាពអប់រំនៅកម្ពុជា ហេីយគុណភាពអប់រំអាចរឹងមាំបានលុះត្រាតែសិស្សទាំងអស់មានសុខភាពល្អ។
ជាមួយគ្នានេះ លោកស្រី ឃុន រចនា បានមានសំណូមពរដល់អ្នកចូលរួមទាំងអស់ត្រូវបន្តចូលរួមយកចំណេះដឹងពីសិក្ខាសាលានេះទៅផ្សព្វផ្សាយដល់មិត្តភក្តិនិងមនុស្សជាទីស្រឡាញ់ ដេីម្បីបង្ការទប់ស្កាត់កុំឱ្យមានការប្រេីប្រាស់នូវផលិតផលថ្នាំជក់ បារីអេឡិចត្រូនិក គ្រឿងញៀន បង្ការមេរោគអេដស៍ ជំងឺអេដស៍ និងគ្រោះថ្នាក់ចរាចរណ៍៕
