(ភ្នំពេញ)៖ លោក ស៊ុន ចាន់ថុល ជាមន្ត្រីជាន់ខ្ពស់មួយរូបនៃរាជរដ្ឋាភិបាលនីតិកាលទី៦ ក្រោមការដឹកនាំរបស់សម្តេចតេជោ ហ៊ុន សែន។ លោកមានឋានៈជាទេសរដ្ឋមន្ត្រី និងជារដ្ឋមន្ត្រីក្រសួងសាធារណការ និងដឹកជញ្ជូន។
លោក ស៊ុន ចាន់ថុល ទទួលបានការទុកចិត្តពីសម្តេចតេជោ ហ៊ុន សែន ឱ្យចូលមកកាន់ក្រសួងសាធាណការ និងដឹកជញ្ជូនក្នុងឆ្នាំ២០១៦ ពោលគឺពាក់កណ្តាលអាណត្តិទី៥។
ក្នុងឋានៈជារដ្ឋមន្ត្រីក្រសួងសាធារណការ និងដឹកជញ្ជូនរយៈពេលប្រមាណជា ៧ឆ្នាំចុងក្រោយនេះ លោក ស៊ុន ចាន់ថុល បានប្រឹងប្រែងធ្វើកំណែទម្រង់ និងនាំមកនូវសមិទ្ធផលជាច្រើនក្រោមសមត្ថកិច្ចរបស់លោក។
សមិទ្ធផលទាំងនោះមានដូចជា ការប្រឹងប្រែងជំរុញពន្លឿនការចុះបញ្ជីយានយន្ត និងការបន្តសុពលភាពបណ្ណបើកបរយានយន្តបានស្រួល លឿនរហ័ស មិនស្មុគស្មាញ ដោយបង្កើតឱ្យមានកន្លែងផ្តល់សេវាក្រៅក្រសួងមាននៅផ្សារទំនើបអ៊ីអនទាំង៣នៅរាជធានីភ្នំពេញ ផ្សារទំនើបនៅសៀមរាប និងព្រះសីហនុ។
ពាក់ព័ន្ធការដឹកជញ្ជូន លោក ស៊ុន ចាន់ថុល បានប្រឹងប្រែងទប់ស្កាត់ការដឹកជញ្ជូនលើសទម្ងន់កំណត់ ប្រឹងប្រែងពង្រឹងគុណភាពផ្លូវ បង្កើតសេវាដឹកជញ្ជូនអ្នកដំណើរតាមផ្លូវទឹក ជំរុញឱ្យដំណើរការឡើងវិញផ្លូវដែកភ្នំពេញ-ប៉ោយប៉ែត ជំរុញឱ្យចេញរូបរាងផ្លូវល្បឿនលឿនភ្នំពេញ-ព្រះសីហនុ លើកគំនិតជូនសម្តេចតេជោសាងសង់ហេដ្ឋារចនាសម្ព័ន្ធផ្លូវក្នុងក្រុងសៀមរាប ពង្រីកផ្លូវជាតិលេខ៥ ផ្លូវជាតិលេខ៣ ផ្លូវក្រវាត់ក្រុងទី២ និងទី៣ ស្ពានអាកាសដីហុយ បង្កើតសាលាបណ្តុះបណ្តាលបើករថយន្តធំៗ ជំរុញបង្កើតកន្លែងឆៀករថយន្តកាន់តែច្រើនកន្លែង បង្កើត QR កូដលើផ្លាកលេខងាយស្រួលត្រួតពិនិត្យព័ត៌មានរថយន្ត លុបបំបាត់ផ្លាកលេខក្លែងក្លាយ បង្កើតឱ្យមានផ្លាកលេខពិសេសផ្ទាល់ខ្លួនបំពេញបំណងអ្នកប្រើរថយន្ត និងរកចំណូលចូលរដ្ឋ។
លោក ស៊ុន ចាន់ថុល បានបង្កើតសាលាបណ្តុះបណ្តាលជំនាញសាធារណការ និងដឹកជញ្ជូន ដើម្បីបង្កើតធនធានមនុស្សលើជំនាញក្នុងវិស័យនេះ។ ការបង្កើតសាលាបណ្តុះបណ្តាលជំនាញសាធារណការ និងដឹកជញ្ជូននេះ ទទួលបានការគាំទ្រ និងកោតសរសើរជាខ្លាំងពីសម្តេចតេជោ ហ៊ុន សែន។
គេក៏នៅចាំបានដែរថា ចូលមកកាន់ក្រសួងសាធារណការ និងដឹកជញ្ជូនដំបូង លោក ស៊ុន ចាន់ថុល បានប្រឹងប្រែងសង់អគារទីស្តីការក្រសួងនៅទីតាំងចាស់ក្បែរវត្តភ្នំ បន្ទាប់មកសង់អគារទីស្តីការថ្មីនៅផ្លូវ៥៩៨ ធ្វើឱ្យមន្ត្រីក្រសួងសាធារណការ និងដឹកជញ្ជូនមានកន្លែងធ្វើការល្អ មិនមានពាក្យថាអត់កន្លែងអង្គុយធ្វើការនោះឡើយ។
ក្រៅពីសមិទ្ធផលដែលរៀបរាប់ គឺនៅមានសមិទ្ធផលជាច្រើនទៀត ដូចជាផ្លូវ និងស្ពានជាច្រើន ក៏ត្រូវបានសាងសង់ និងដាក់ឱ្យប្រើប្រាស់ពេលលោកកាន់តួនាទីនេះ។ គម្រោងធំៗជាច្រើនទៀត ក៏ត្រូវបានផ្តួចផ្តើមឡើងដែរ តែមិនទាន់បានរួចរាល់ជាស្ថាពរនៅឡើយ។ គម្រោងទាំងនោះ មានដូចជាគម្រោងផ្លូវល្បឿនលឿនភ្នំពេញ-បាវិត, គម្រោងផ្លូវល្បឿនលឿនភ្នំពេញ-សៀមរាប, សៀមរាប-ប៉ោយប៉ែត, ការពង្រីងកំពុងផែពហុបំណងក្រុងព្រះសីហនុ ដើម្បីពង្រីកការដឹកជញ្ជូនផ្លូវសមុទ្រ។
គម្រោងពិសេសជាប្រវត្តិសាស្ត្រមួយទៀត ដែលលោកទេសរដ្ឋមន្ត្រី ស៊ុន ចាន់ថុល បានប្រឹងប្រែងឈ្មុសឈ្មុលរហូតឱ្យមានការសិក្សាលំអិតពីរាជរដ្ឋាភិបាលអាណត្តិចាស់នោះ គឺគម្រោងព្រែកជីកហ្វូណន-តេជោ ដែលជាគម្រោងតភ្ជាប់ផ្លូវទឹកពីទន្លេ ទៅសមុទ្រកម្ពុជា។ គម្រោងនេះ គឺជាគម្រោងមួយដែលទទួលបានការគាំទ្រខ្ពស់ពីប្រជាពលរដ្ឋខ្មែរ។
សម្រាប់អាណត្តិថ្មី បើតាមការបញ្ជាក់របស់សម្តេចតេជោ ហ៊ុន សែន ពេលសម្ពោធផ្លូវក្រវាត់ក្រុងទី៣នោះ បានឱ្យដឹងថា លោក ស៊ុន ចាន់ថុល នឹងទទួលបានឋានៈជាឧបនាយករដ្ឋមន្ត្រី ប៉ុន្តែមិននៅដឹកនាំក្រសួងសាធារណការបន្តទៀតនោះឡើយ។
ចាប់តាំងពីកាន់តួនាទីជារដ្ឋមន្ត្រីក្រសួងពាណិជ្ជកម្មពីឆ្នាំ២០១៣ និងក្នុងតំណែងជារដ្ឋមន្ត្រីក្រសួងសាធារណការ និងដឹកជញ្ជូនមកដល់ពេលបច្ចុប្បន្ននេះ លោក ស៊ុន ចាន់ថុល ជាមន្ត្រីរាជរដ្ឋាភិបាលមួយរូប ដែលទទួលបានការកោតសរសើរពីប្រជាពលរដ្ឋ តាមរយៈកិច្ចប្រឹងប្រែងក្នុងការបំពេញការងារនាំមកនូវឧត្តមប្រយោជន៍សម្រាប់ជាតិ និងប្រជាជន។
លោក ស៊ុន ចាន់ថុល បានថ្លែងថា ជាឱកាសមួយដ៏កម្រសម្រាប់រូបលោកក្នុងការចូលរួមចំណែកបម្រើជាតិ និងប្រជាជន ហើយក៏ជារឿងដ៏រីករាយសម្រាប់លោកផងដែរ។
លោកទេសរដ្ឋមន្ត្រី បានគូសបញ្ជាក់ដូច្នេះ «រីករាយជានិច្ចក្នុងតួនាទីរបស់ខ្ញុំ ដែលយើងមានភ័ព្វសំណាងបានបម្រើប្រទេសជាតិមាតុភូមិរបស់យើង។ តើប៉ុន្មាននាក់ សុបិនរាល់ថ្ងៃចង់បម្រើ តែមិនបានបម្រើ ទាមទារចង់បម្រើ មិនបានបម្រើ។ ដូច្នេះយើងទាំងអស់គ្នាដែលមានភ័ព្វសំណាង មានឱកាសបម្រើជាតិ ត្រូវតែសប្បាយចិត្ត ខិតខំប្រឹងប្រែងធ្វើការឱ្យអស់ពីកម្លាំងកាយ កម្លាំងចិត្ត ដោយសារយើងនេះជាអ្នកបម្រើរាស្ត្រ។ តាមការណែនាំរបស់សម្តេចតេជោ ហ៊ុន សែន យើងជាអ្នកបម្រើរាស្ត្រ ដូច្នេះត្រូវខិតខំឱ្យអស់ពីកម្លាំងកាយ កម្លាំងចិត្ត បម្រើរាស្ត្រឱ្យមានប្រសិទ្ធភាព»។
សូមបញ្ជាក់ថា លោក ស៊ុន ចាន់ថុល ធ្លាប់បានកាន់តួនាទីជាច្រើនក្នុងជួររាជរដ្ឋាភិបាលតាំងពីឆ្នាំ១៩៩៤មក។ ពីឆ្នាំ១៩៩៤ ដល់ ឆ្នាំ១៩៩៧ បានបម្រើការជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃក្រុមប្រឹក្សាអភិវឌ្ឍន៍កម្ពុជា, ចាប់ពីឆ្នាំ១៩៩៩ ដល់ឆ្នាំ២០០៣ បានបម្រើការជាទីប្រឹក្សាសេដ្ឋកិច្ច និងហិរញ្ញវត្ថុប្រធានសភាជាតិ, ចាប់ពីឆ្នាំ២០០៤ ដល់ឆ្នាំ២០០៨ បានបម្រើការជារដ្ឋមន្ត្រីក្រសួងសាធារណៈការ និងដឹកជញ្ជូន, ចាប់ពីឆ្នាំ២០០៨ ដល់ឆ្នាំ២០១៣ បានបម្រើការជាទេសរដ្ឋមន្ត្រី និងអនុប្រធានក្រុមប្រឹក្សាអភិវឌ្ឍន៍កម្ពុជា, ចាប់ពីឆ្នាំ២០១៣ ដល់ខែមេសា ឆ្នាំ២០១៦ បានបម្រើការជាទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាអនុប្រធានក្រុមប្រឹក្សាអភិវឌ្ឍន៍កម្ពុជា (CDC), ចាប់ពីឆ្នាំ២០១៦ ដល់ខែកញ្ញាឆ្នាំ ២០១៨ បានបម្រើការជាទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន និងចាប់ពីខែកញ្ញា ឆ្នាំ២០១៨ រហូតដល់បច្ចុប្បន្ន បានបម្រើការជាទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន។
លោក ស៊ុន ចាន់ថុល បច្ចុប្បន្នមានវ័យប្រមាណ ៦៧ឆ្នាំ។ លោកបានបញ្ចប់ការសិក្សា ថ្នាក់បរិញ្ញាប័ត្រវិទ្យាសាស្ត្រផ្នែកគ្រប់គ្រងពា ណិជ្ជកម្មពីសាកលវិទ្យាល័យអាមេរិក នៅឆ្នាំ១៩៧៨ និងកម្មវិធីគ្រប់គ្រងជាន់ខ្ពស់ពីសាកលវិទ្យាល័យ Whartonរដ្ឋ Pennsylvania នៅឆ្នាំ១៩៩៧ ហើយបញ្ចប់ការសិក្សាថ្នាក់អនុបណ្ឌិតផ្នែករដ្ឋបាលសាធារណៈពីសាកលវិទ្យា Harvard នៅឆ្នាំ១៩៩៩។
លោក ស៊ុន ចាន់ថុល ក៏ធ្លាប់បានបម្រើការងារឱ្យក្រុមហ៊ុន General Electric រយៈពេល ១៦ឆ្នាំ នៅក្នុងមុខតំណែងប្រតិបត្តិជាន់ខ្ពស់ជាច្រើន, ការគ្រប់គ្រងទូទៅ និងហិរញ្ញវត្ថុ (នៅសហរដ្ឋអាមេ រិក បារាំង និងថៃ), សវនករក្រុមហ៊ុន General Electric ហើយក៏ជាអ្នកបង្កើតក្រុមហ៊ុនពាណិជ្ជកម្ម និងវិនិយោគកម្ពុជា នៅឆ្នាំ១៩៩៩ផងដែរ៕
