(សាងហៃ)៖ ក្រុមហ៊ុនអាកាសចរណ៍ចិន Hainan Airlines បានចំណាយលុយ ៤៥០លានដុល្លារអាមេរិក ដើម្បីទិញភាគ​ហ៊ុនរបស់ក្រុមហ៊ុនអាកាសចរណ៍ធំលំដាប់ទី៣របស់ប្រេស៊ីល ដើម្បីពង្រីក​ជើង​ហោះហើរ។ នេះបើយោងតាម​ការ​ចេញផ្សាយរបស់សារព័ត៌មាន AFP នៅរសៀលថ្ងៃទី០៤ ខែសីហា។

យោងតាមសេចក្ដីប្រកាសរបស់ក្រុមហ៊ុន Azul បានឲ្យដឹងថា ក្រុមហ៊ុនអាកាសចរណ៍ឯកជនធំជាងគេបំផុត និងធំលំដាប់ទី៤របស់ចិន Hainan បានយល់ព្រមចំណាយលុយ ៤៥០លានដុល្លារអាមេរិក ដើម្បីទិញយកភាគហ៊ុន​​​របស់ក្រុមហ៊ុន Azul ចំនួនជិត ២៤ភាគរយ ដែលនាំឲ្យក្រុមហ៊ុន Hainan ក្លាយជាម្ចាស់ភាគហ៊ុនធំរបស់ Azul។

គួរបញ្ជាក់ផងដែរថា កាលពីខែឧសភាកន្លងទៅនេះ Hainan Airlines បានទិញភាគហ៊ុនរបស់ក្រុមហ៊ុនអាកាសចរណ៍​អូស្ត្រាលី Virgin Australia ចំនួន ១៣ភាគរយ និងបានទិញ​ភាគហ៊ុនរបស់ក្រុមហ៊ុនអាកាសចរណ៍ព័រទុយហ្គាល់ នៅក្នុងខែតែមួយ ប៉ុន្តែមិនបានបញ្ជាក់ពីចំនួនភាគហ៊ុន៕