(ភ្នំពេញ)៖ និយ័តករមូលបត្រកម្ពុជា និងគណៈកម្មការមូលបត្រឡាវ នាថ្ងៃទី១០ ខែសីហា ឆ្នាំ២០២៣នេះ បានចុះអនុស្សារណៈនៃការយោគយល់គ្នា ស្តីពីការផ្លាស់ប្តូរព័ត៌មាន និងការជួយគ្នាទៅវិញទៅមក ​ ដើម្បីជំរុញឱ្យវិស័យមូលបត្ររបស់ប្រទេសទាំងពីរ កាន់តែរីកចម្រើន។

ពិធីចុះអនុស្សារណៈនៃការយោគយល់គ្នា រៀបចំឡើងក្រោមអធិបតីភាព លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុក ជាអគ្គនាយកនិយ័តករមូលបត្រកម្ពុជា និងលោកស្រី Fongchinda Sengsouivong អគ្គលេខាធិការ និងជាអគ្គនាយកនៃគណៈកម្មការមូលបត្រឡាវ។

លោក ស៊ូ សុជាតិ បានថ្លែងថា តាមរយៈការចុះអនុស្សារណៈនៃការយោគយល់គ្នានេះ ភាគីទាំងពីរនឹងជួយជ្រុំជ្រែងគ្នា ​ចែករំលែកចំណេះដឹង និងបទពិសោធគ្នាទៅវិញទៅមក។

លោកបន្តថា ស្របពេលដែលប្រទេសឡាវ ត្រៀមខ្លួនបោះផ្សាយមូលបត្របៃតង ដែលអាចនឹងធ្វើឡើងនៅឆ្នាំនេះ ឬឆ្នាំក្រោយ កម្ពុជានឹងចែករំលែកបទពិសោធន៍ទាក់ទងនឹងការបោះផ្សាយសញ្ញាបណ្ណបៃតង។ ជាមួយគ្នានេះតាមរយៈ MoU នេះដែរ នៅខែតុលាខាងមុខ​ និយ័តករមូលបត្រកម្ពុជា នឹងធ្វើដំណើរទស្សនកិច្ចសិក្សាមួយទៅប្រទេសឡាវ ដើម្បីសិក្សាពីការបោះផ្សាយសញ្ញាបណ្ណ ដោយឡាវគ្រោងនឹងបោះផ្សាយជាប្រាក់ដុល្លារ ដែលកម្ពុជាត្រូវដកស្រង់បទពិសោធន៍​នេះ មកអភិវឌ្ឍន៍វិស័យមូលបត្រនៅកម្ពុជា។

លោកមានជំនឿងថា តាមរយៈ​ជាកិច្ចសហការដ៏ល្អនេះ ​នឹងជំរុញ​ឱ្យវិស័យហិរញ្ញវត្ថុ​ រវាងប្រទេសទាំងពីរ មានទំនាក់ទំនងជិតស្និតជាមួយគ្នា ក្នុងគោលដៅពង្រីកទីផ្សារឱ្យកាន់តែធំ​​ និងមានវិនិយោគិនកាន់តែច្រើន ជាពិសេសវិនិយោគិនបរទេស។

លោកបានឱ្យដឹងផងដែរថា កន្លងមកកម្ពុជាក៏បាន​ចុះអនុស្សារណៈនៃការយោគយល់គ្នា ជាមួយប្រទេសផ្សេងទៀតដូច ថៃ វៀតណាម និងប្រទេស​ម៉ាឡេស៊ី ដើម្បីពង្រីកកិច្ចសហប្រតិបត្តិការក្នុ ងវិស័យមូលបត្រក្នុងតំបន់ផងដែរ បន្ថែមលើក្របខណ្ឌពហុភាគីផ្សេងទៀត៕