(កំពង់ចាម)៖ រូបសំណាកព្រះបាទសូរ្យវរ្ម័នទី២ ដែលមានតម្លៃជិត៥ម៉ឺនដុល្លារ ត្រូវបានដង្ហែមកតម្កល់នៅលើភ្នំជើងព្រៃ ភូមិគោករវៀង ឃុំគោករវៀង ស្រុកជើងព្រៃ ខេត្តកំពង់ចាម ទុកជាទីសក្ការបូជារបស់ប្រជាពុទ្ធបរិស័ទ។
ពិធីដង្ហែនេះធ្វើឡើងនាព្រឹកទី៨ ខែសីហា ឆ្នាំ២០២៣។ លោក អួត ឈាងលី អភិបាលស្រុកជើងព្រៃ បានឱ្យដឹងថា រូបសំណាកព្រះបាទសូរ្យវរ្ម័នទី២នេះ មានតម្លៃជិត៥ម៉ឺនដុល្លារ ហើយបានផ្តួចផ្តើមកសាងដោយឧបាសិកា ជា សុខឡេង ព្រមទាំងបុត្រ និងចៅ លោក គួច ចំរើន និងលោកស្រី ព្រមទាំងបុត្រ លោក អួត ឈាង លី និងលោកស្រី លោក ឆាយ វ៉ាន់ស៉ី និងលោកស្រី លោក ខាត់ សុខន និងលោកស្រី លោក សេង ពៅ និងលោកស្រី លោក លី ប៉េងជ័រ និងលោកស្រី រួមទាំងសប្បរសជនជាច្រើនរូបទៀត។
លោកបានបន្តថា រូបសំណាក់ព្រះបាទសូរ្យវរ្ម័នទី២ គឺជាសមិទ្ធផលមួយទៀតហើយនៅក្នុងព្រះពុទ្ធសាសនាដែលជាសាសនារបស់រដ្ឋ ក្នុងនាមប្រជាពលរដ្ឋនៅក្នុងស្រុកជើងព្រៃនេះសូមអបអរសារទរយ៉ាងខ្លាំង និងបានថ្លែងអំណរអរគុណដល់សប្បុរសជននានាដែលបានជួយកសាងរូបសំណាក់នេះឡើង។
លោកអភិបាលស្រុកបានអំពាវនាវដល់ប្រជាពលរដ្ឋមេត្តាជួយថែរក្សារូបសំណាក់ព្រះបាទសូរ្យវរ្ម័នទី២ ទុកសម្រាប់ជាទីសក្ការគោរបូជា ពិសេសទុកជាទីកន្លែងទេសចរណ៍ផងដែរ៕
