(ភ្នំពេញ)៖ ដូចអ្វីដែលបានគ្រោងទុក កាលពីប៉ុន្មានថ្ងៃមុននេះ ចំពោះការប្រកាសដោយចំហរ​ក្នុងបណ្ដាញសង្គម Facebook របស់អ្នកនិពន្ធ សាន សេកសុខុម ថានឹងធ្វើការតវ៉ា​ចំពោះផលិតកម្ម Z Entertainment ដែលមិនបានគោរពសិទ្ធអ្នកនិពន្ធ ពោលគឺមិនបានរក្សាស្នាដៃរបស់ខ្លួន ឲ្យមហាជនបានដឹងនោះ នៅព្រឹកថ្ងៃទី០៤ ខែសីហា ឆ្នាំ២០១៦នេះ កវីនិពន្ធ សាន សេកសុខុម បានប្រមូលផ្ដុំគ្នីគ្នាប្រមាណជិត១០ ដើម្បីធ្វើការតវ៉ាទាមទារឲ្យផលិតកម្ម Z Entertainment ទទួលខុសត្រូវចំពោះទង្វើរបស់ខ្លួន ស្របពេលផលិតកម្ម Z Entertainment កំពុងតែដាក់បញ្ចាំង​រឿង«អមតៈ» នៅក្នុងរោងភាពយន្ត Legend ស៊ីធីម៉ល។

ការប្រកាស និងផ្ទុះកូដកម្មដ៏គួរឲ្យភ្ញាក់ផ្អើល សម្រាប់អ្នកនិពន្ធរឿង និងបទចម្រៀងនៅក្នុងប្រទេសកម្ពុជា ជាលើកដំបូងនេះ ត្រូវបានគេមើលឃើញថា នៅក្នុងបដារបស់ពួកគេ បានសរសេរ​ពាក្យពេចន៍ធ្ងន់ៗ ហាក់បីដូចជាមានគំនុំគំគួន ជាមួយនឹងផលិតកម្ម Z Entertainment តាំងពីយូរណាស់​មកហើយអ៉ីចឹង ខណៈដែលការតវ៉ានេះ ត្រូវបានផលិតកម្ម Z Entertainment បញ្ជាក់ជំហរយ៉ាងច្បាស់ថា នឹងចាត់វិធានការតាមផ្លូវច្បាប់ ចំពោះលោក សាន សេកសុខុម ពីបទបរិហាកេរ្តិ៍ជាសាធារណៈ​គ្មានមូលដ្ឋានការពិត និងលាបពណ៌ផលិតកម្ម Z Entertainment ។

ក្នុងបដាក្រុមអ្នកតវ៉ា ដែលមានលោក សាន សេកសុខុម ជាអ្នកដឹកនាំកូដកម្មនេះ បានសរសេរប្រយោគជាច្រើន​ថា «ការលួចចម្លងកម្មសិទ្ធិបញ្ញា​ជាអំពើល្មើសច្បាប់, រឿងបោកអមតៈចាប់បញ្ចាំង ថ្ងៃនេះហើយ, ការកេងប្រវ័ញលើកម្លាំងពលកម្ម និងបំបាត់ស្នាដៃរបស់អ្នកនិពន្ធ​ជាបទល្មើស, ផលិតកម្មZ Entertainment ត្រូវទទួលខុស​ត្រូវដោះស្រាយជាបន្ទាន់ និងមានឃ្លាថា ក្រោយពេលចាក់រឿង អមតៈ ចប់ ជូនពរឲ្យផលិតកម្ម Z ចប់តាមរឿងដូច​គ្នា, ព្រមទាំងមានប្រយោគ​ចោទប្រកាន់ ទៅលើផលិតកម្ម ជាច្រើនទៀត»។

ជុំវិញការផ្ទុះកូដកម្ម​ទាំងកណ្ដាលថ្ងៃ ដ៏កម្រមានសម្រាប់អ្នកនិពន្ធ​​នៅស្រុកខ្មែរនេះ អ្នកចាត់ការទូទៅប្រចាំ​ក្នុង​ផលិតកម្ម Z Entertainment លោក ជា ឌីណាង បានថ្លែងប្រាប់ Khmertalking នៅមុននេះបន្តិចថា ផលិតកម្ម Z Entertainment នឹងចាត់វិធានការតាមផ្លូវច្បាប់ ចំពោះលោក សាន សេកសុខុម ដែលបានបំពាន លាបពណ៌ផលិតកម្ម​ទាំងគ្មានការពិត ដោយប្ដឹងពី បទបរិហារកេរ្តិ៍ផលិតកម្ម។ ផលិតកម្ម​មិនបានលួច​ចម្លងកម្មសិទ្ធិបញ្ញា ​របស់លោក សាន សេកសុខុម នោះឡើយ​។ ផលិតកម្មកំពុងតែពិចារណា ចំពោះទង្វើរបស់លោក សាន សេកសុខុម ដែលបានបំភ្លៃការពិតឲ្យទស្សនិកជន ភ័ន្តច្រឡំចំពោះផលិតកម្ម Z Entertainment ហើយនឹងមានវិធានការចំពោះបុគ្គលនេះ ក្នុងពេលឆាប់ៗនេះ ។

លោក ជា ឌីណាង បានបន្តទៀតថា លោកសូមទទូចដល់ទស្សនិកជន មេត្តាពិចារណាឲ្យបានគ្រប់ជ្រុងជ្រោយ មុននឹងជឿលង់ទៅលើអ្វីមួយ ជាពិសេសការតវ៉ានេះ ថាតើនរណាខុស​ នរណាត្រូវ ដោយសូមឲ្យមានការថ្លឹងថ្លែងឲ្យបានច្បាស់ ព្រោះលោក សាន សេកសុខុម ក៏មានកំហុសឆ្គងច្រើនមកហើយដែរ កាលលោកនៅបំពេញការងារ ជាមួយនឹងផលិតកម្ម Z Entertainment ។   

ដោយឡែក​លោក សាន សេកសុខុម អង្គភាពសារព័ត៌មាន Fresh News នៅមិនទាន់អាចទាក់ទងសុំការបំភ្លឺបន្ថែម​បានទេ នៅព្រឹកនេះ ខណៈដែលលោកកំពុងបង្ហាញវត្តមាន នៅកន្លែងកូដកម្មនៅលើយ៕

លោក សាន សេកសុខុម