(បន្ទាយមានជ័យ)៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី០៨ ខែសីហា ឆ្នាំ២០២៣ បានអញ្ជេីញចុះពិនិត្យមេីលកាសាងសង់មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះដោយអំពើជួញដូរមនុស្ស និងជនងាយរងគ្រោះដទៃទៀត នៅក្រុងប៉ោយប៉ែត ដែលចំណាយថវិកាជាង ២លានដុល្លារ។
ពិធីនេះក៏មានការអញ្ជើញចូលរួមពីសំណាក់ថ្នាក់ដឹកនាំក្រសួង និងលោក ង៉ោ ម៉េងជ្រួន អភិបាលរងខេត្តបន្ទាយមានជ័យ និងអភិបាលក្រុងប៉ោយប៉ែត ព្រមទាំងអ្នកពាក់ព័ន្ធមួយចំនួនទៀត។
នាឱកាសនោះដែរ លោក វង សូត បានថ្លែងការអរគុណចំពោះភាគីថៃ ដែលបានជួយជ្រោមជ្រែងទាំងថវិកា ក្នុងដំណេីរការនៃការសាងសង់ផ្នែកបច្ចេកទេស សម្ភារៈទៅតាមស្តង់ដារ ដេីម្បីទទួលបងប្អូនពលកររងគ្រោះដោយអំពើជួញដូរមនុស្ស និងជនងាយរងគ្រោះដទៃទៀត ដេីម្បីបានស្នាក់នៅ និងសិក្សារៀនសូត្រជំនាញដេីម្បីយកទៅបង្កេីតរបចិញ្ចឹមជីវិត។
លោករដ្ឋមន្ត្រីក៏បានណែនាំដល់មន្ត្រីត្រូវផ្តល់សេវានេះជូនដល់ពលរដ្ឋដែលរងដែលរងគ្រោះដែលមកទទួលសេវានៅទីនេះឱ្យបានល្អ ត្រូវប្រកាន់ភ្ជាប់នូវក្រមសីលធម៌ល្អ ដោយគិតផលប្រយោជន៍រួមជាធំ។
លោកស្រី ឈា ម៉ានិត ប្រធានមណ្ឌលសំចត ក្រុងប៉ោយប៉ែត បានឱ្យដឹងថា គម្រោងសាងសង់មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះដោយអំពើជួញដូរ មនុស្ស និងជនងាយរងគ្រោះដទៃទៀត មានទីតាំងស្ថិតក្នុងភូមិប្រជាធម្មកើត សង្កាត់អូរឬស្សី ក្រុងប៉ោយប៉ែត ខេត្តបន្ទាយមានជ័យ។ គម្រោងនេះមុននឹងចាប់ផ្តើមការសាងសង់ភាគីទាំងពីរ គឺរាជរដ្ឋាភិបាលនៃព្រះរាជាណាចក្រកម្ពុជា និងរាជរដ្ឋាភិបាលនៃព្រះរាជាណាចក្រថៃ បានរៀបចំបង្កើតគណៈកម្មាធិការដើម្បីជួបប្រជុំគ្នាចុះត្រួតពិនិត្យស្ថានភាពការដ្ឋានសាងសង់ជាប្រចាំរៀងរាល់មួយខែម្តងនៅសប្តាហ៍ទី ៣នៃខែ។
លោកស្រីបានបន្តថា ការសាងសង់មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះ ជាជំនួយឥតចំណងរាជរដ្ឋាភិបាលនៃព្រះរាជាណាចក្រថៃ ចំនួនទឹកប្រាក់ (២,១៩៩,៩២០ដុល្លារ)។ គម្រោងសាងសង់នេះមានរយៈពេល ១ឆ្នាំ ចាប់ផ្ដើមសាងសង់នៅថ្ងៃទី១៥ ខែសីហា ឆ្នាំ២០២២ នឹងបញ្ចប់នៅថ្ងៃទី១៧ ខែសីហា ឆ្នាំ២០២៣ ដែលមានទំហំផ្ទៃដីសរុប ៩,៧៦៨ម៉ែត្រការ៉េ (បណ្តោយ១០១,៣៩ម៉ែត្រ និងទទឹង៩៦.៣៤ម៉ែត្រ)។
ប្រធានមណ្ឌលសំចត ក្រុងប៉ោយប៉ែត បានបញ្ជាក់ថាការទទួលជនរងគ្រោះដោយអំពើជួញដូរមនុស្ស និងជនងាយរងគ្រោះដទៃទៀតក្រុងប៉ោយប៉ែត ខេត្តបន្ទាយមានជ័យ ការទទួលពលករ ពលការិនីកម្ពុជាបញ្ជូនមកពីប្រទេសថៃ ក្នុង១ថ្ងៃ ជាមធ្យម ៥០នាក់។ ដោយឡែកការទទួលជនរងគ្រោះបញ្ជូនមកពីប្រទេសថៃ ក្នុង១ខែ ជាមធ្យម ១០នាក់។ ក្នុងនោះដែរមជ្ឈមណ្ឌល ក៏មានជំនាញវិជ្ជាជីវៈចំនួន៥ជំនាញ រួមមាន៖ ជំនាញកាត់ដេរ, ជំនាញសាឡន, ជំនាញធ្វើម្ហូប/បង្អែម, ជំនាញអគ្គិសនី និងទឹក, ជំនាញម៉ាស៊ីនត្រជាក់៕
