(បាត់ដំបង)៖ កម្លាំងសមត្ថកិច្ចខេត្តបាត់ដំបង បានស្រាវជ្រាវឈានដល់ការឃាត់ខ្លួនបាន បុរសរត់ម៉ូតូកង់បី (Pass App) ដែលបង្កបញ្ហាលើស្ត្រីជនជាតិបារាំងម្នាក់ បណ្តាលឱ្យនាងរងរបួស។
ជនបង្កដែលឃាត់ខ្លួន នៅថ្ងៃទី៧ ខែសីហា ឆ្នាំ២០២៣ មានឈ្មោះទេព ភាឡី ហៅលីញ ភេទប្រុស អាយុ២៩ឆ្នាំ ទីលំនៅភូមិកម្មករ សង្កាត់ស្វាយប៉ោ ក្រុង-ខេត្តបាត់ដំបង មុខរបរ រត់ម៉ូតូ (Pass App)។
សូមជម្រាបថា បន្ទាប់ពីទទួលបានព័ត៌មានរបស់ស្ត្រីរងគ្រោះជនជាតិបារាំង សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានចាត់ទុកជំនួយការមួយរូប គឺលោក កែវ ផុង ចុះជួយយកអាសា និងដោះស្រាយបញ្ហារបស់ស្ត្រីជនជាតិបារាំង ដែលលោតចុះពីម៉ូតូកង់៣ (Pass App) នៅក្នុងខេត្តបាត់ដំបង។ សម្តេចតេជោ ហ៊ុន សែន ក៏បានផ្តល់ថវិកាមួយចំនួនជូនទៅស្ត្រីជនជាតិបារាំងរូបនោះ សម្រាប់ការព្យាបាលរបួសផងដែរ។
ស្ត្រីជនជាតិបារាំងរូបនោះ បានថ្លែងអំណរគុណសម្តេចតេជោ ហើយក៏បានកោតសរសើរ ចំពោះទឹកចិត្តសម្តេចតេជោ ដែលបានខ្វាយខ្វល់ទៅលើបញ្ហារបស់នាងផងដែរ។
ស្ត្រីជនជាតិបារាំងដែលលោតចុះពីលើម៉ូតូកង់៣ ដែលមានបំណងមិនល្អនោះ មានឈ្មោះ អេលេន ដីតឈី (Helene Dietschy) អាយុ ២១ឆ្នាំ ជានិស្សិតពេទ្យជនជាតិបារាំង។ នាងបានមកប្រទេសកម្ពុជា រយៈពេលពីរខែហើយ បម្រើការងារជាបុគ្គលិកហាត់ការនៅមន្ទីរពេទ្យកាល់ម៉ែត។
យោងតាមពាក្យបណ្តឹងរបស់នារីរងគ្រោះ បានឱ្យដឹងថា នៅថ្ងៃទី៤ ខែសីហា ឆ្នាំ២០២៣ វេលាម៉ោង២០៖៣០នាទី នាងបានធ្វើដំណើរចុះទៅខេត្តបាត់ដំបង តាមរយៈក្រុមហ៊ុនដឹកអ្នកដំណើរមួយ ហើយទៅដល់ខេត្តបាត់ដំបង នៅវេលាម៉ោង ៣៖១៥នាទីទៀបភ្លឺថ្ងៃទី៥ ខែសីហា ឆ្នាំ២០២៣។
នារីរងគ្រោះបន្តថា ពេលចុះពីរថយន្ត នាងបានធ្វើដំណើរដោយថ្មើរជើងពីចំណតរថយន្ត ទៅមកផ្ទះសំណាក់ ដែលកក់រួចហើយ ដោយមើលតាមផែនទី (google map)។ មួយសន្ទុះក្រោយមក ពេលដើរដល់កន្លែងមួយ (មិនស្គាល់ភូមិឃុំ) មានឆ្កែជាច្រើន បានព្រុស និងបានរកខាំ ធ្វើឱ្យនាងមានការភិតភ័យ តែនាងនៅតែបន្តរដើរទៅតាមផែនទីដដែល។ រហូតដើរដល់ចំណុចមួយ មានផ្លូវបំបែកជា៣ នាងបានវង្វេងផ្លូវ ដោយសារងងឹតពេក និងមានអារម្មណ៍ ភ័យខ្លាច ព្រោះឆ្កែព្រុសខ្លាំង ក៏បានឈប់នៅផ្លូវបំបែកនោះ និងបានចុចទូរស័ព្ទទៅមនុស្សស្គាល់គ្នា។ ពេលនោះក៏មានម៉ូតូកង់៣ មួយគ្រឿង ពណ៌ស អត់មានទ្វារ និងមិនមានកាតុបតែង បើកដោយបុរសម្នាក់ មាឌរាងស្គម អាយុប្រហែល៣០ឆ្នាំ ពាក់អាវយឺត (មិនចាំពណ៌) ពាក់មួកកាតឹប បានជិះតាមនោះ រួចបានហៅនាងឡើងជិះ។
នារីរងគ្រោះបន្តថា ពេលនាងឡើងជិះ បាននិយាយជាមួយម្ចាស់ម៉ូតូកង់៣ ដោយបង្ហាញរូបផ្ទះសំណាក់ដែលនាងចង់ទៅនោះ។ បន្ទាប់ ពីនិយាយគ្នារួច នាងក៏បានឡើងជិះម៉ូតូកង់៣នោះ តែពេលជិះជាមួយគាត់ នាងបានមើល ផែនទី ឃើញថា គាត់ជិះចេញទៅផ្លូវឆ្ងាយ ខុសពីគោលដៅ។
នារីរងគ្រោះបានរៀបរាប់ទៀតថា ពេលជិះដល់ផ្លូវត្រូវបត់ នាងបានប្រាប់ឱ្យបត់ តែម្ចាស់កង់៣បានបន្ថែមល្បឿនទៅមុខមិនព្រមបត់នោះឡើយ ហើយ ពេលឱ្យឈប់ក៏មិនព្រមឈប់នោះដែរ។ បុរសបើកម៉ូតូកង់៣ បានបើករហូតដល់ម៉ោង ៤៖៧នាទីទៀបភ្លឺថ្ងៃទី០៥ ខែសីហា ឆ្នាំ២០២៣ ពេលជិះដល់ចំណុចផ្លូវបំបែកជា៤ ឆ្លៀតពេលម៉ូតូកង់៣បន្ថយល្បឿន ដើម្បីបត់ឆ្វេងនោះ នារីងគ្រោះ ក៏បានលោត ចុះពីលើម៉ូតូកង់៣តែម្តង។
នារីរងគ្រោះជាជនជាតិបារាំងរូបនេះ បានឱ្យដឹងថា ជាអកុសលពេលលោតចុះនោះ កាបូបស្ពាយខាងក្រោយរបស់នាងបានទាក់ជាមួយម៉ូតូកង់៣ បណ្តាលឱ្យម៉ូតូកង់៣នោះដួលសង្កត់លើនាង ធ្វើឱ្យរងរបួសបាក់ម្រាមដៃ កណ្តាលខាងឆ្វេង, រលាត់ថ្ងាស់-ច្រមុះ ឯនៅលើទ្រូងទាំងសងខាង ជើងខាងស្តាំក្រោមជង្គង់ និងត្រគៀកទាំងសងខាងឡើងជាំ។
ចំណែកម្ចាស់ម៉ូតូកង់៣ បានលើកម៉ូតូឡើង ហើយជិះចេញទៅបាត់ទៅ។ បន្ទាប់មកនារីងគ្រោះ ក៏បានដើរទៅកន្លែងអគារមួយកន្លែង ដែលមានសន្តិសុខនៅទីនោះ ឱ្យជួយលាងរបួស និងសម្រាកនៅទីនោះ រយៈពេលប្រហែល១ម៉ោងកន្លះ ទើបទៅមន្ទីពេទ្យព្យាបាលរបួស។
បន្ទាប់ពីទទួលបានបណ្តឹងនេះ សមត្ថកិច្ចខេត្តបាត់ដំបង កំពុងស្រាវជ្រាវរកជនល្មើស ហើយបានអំពាវនាវដល់សាធារណជន ដែលបានឃើញហេតុការណ៍ ឬមានតម្រុយនានា សូមជួយសហការ ដើម្បីឈានទៅចាប់ជនល្មើស៕
