(ភ្នំពេញ)៖ នារសៀលថ្ងៃសៅរ៍ ទី០៥ ខែសីហា ឆ្នាំ២០២៣ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានដឹកនាំប្រតិភូក្រសួងទេសចរណ៍ ចូលរួមគោរពវិញ្ញាណក្ខន្ធសពឯកឧត្តម សំ ព្រហ្មនា សមាជិកក្រុមប្រឹក្សាធម្មនុញ្ញ និងជាអតីតរដ្ឋលេខាធិការក្រសួងទេសចរណ៍ ដែលបានទទួលមរណភាពកាលពីថ្ងៃសុក្រ ទី០៤ ខែសីហា ឆ្នាំ២០២៣ ក្នុងជន្មាយុ ៨១ឆ្នាំ ដោយរោគាពាធ ព្រមទាំងបានផ្ញើសារចូលរួមរំលែកទុក្ខចំពោះក្រុមគ្រួសារសព។
ក្នុងសារលិខិត ឯកឧត្តមរដ្ឋមន្ត្រីបានសរសេរថា៖
តាងនាមថ្នាក់ដឹកនាំ និងមន្ត្រីរាជការទាំងអស់នៃក្រសួងទេសចរណ៍ ខ្ញុំ និងភរិយា មានសេចក្តីតក់ស្លុត និងមានទុក្ខក្រៀមក្រំក្រៃលែង ដោយបានទទួលដំណឹងថា ឯកឧត្តម សំ ព្រហ្មនា សមាជិកក្រុមប្រឹក្សាធម្មនុញ្ញ នៃព្រះរាជាណាចក្រកម្ពុជា បានទទួលមរណភាព នៅថ្ងៃសុក្រ ៣រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែសីហា ឆ្នាំ២០២៣ វេលាម៉ោង ១៣:០០ នាទី ក្នុងជន្មាយុ ៨១ឆ្នាំ ដោយរោគាពាធ។ យើងខ្ញុំ សូមចូលរួមរំលែកទុក្ខជាមួយ ឯកន្ធត្តម និងក្រុមគ្រួសារ ចំពោះការបាត់បង់នូវលោកឪពុក លោកឪពុកក្មេក និងជីតា ជាទីគោរពស្រលាញ់ពោរពេញទៅដោយព្រហ្មវិហារធម៌ដ៏ល្អប្រពៃ។
មរណភាពរបស់ ឯកឫត្តម សំ ព្រហ្មនា ជាការបាត់បង់នូវបញ្ហាវន្តដ៏ឆ្នើម និងជាឥស្សរជនខ្មែរមួយរូប ដែលបានលះបង់កម្លាំង កាយ ប្រាជ្ញាស្មារតី ដើម្បីបុព្វហេតុជាតិមាតុភូមិ និងប្រជាពលរដ្ឋ ព្រមទាំងបានរួមចំណែកយ៉ាងសំខាន់ក្នុងការ អភិវឌ្ឍវិស័យទេសចរណ៍កម្ពុជាកន្លងមក និងស្ថាប័នក្រុមប្រឹក្សាធម្មនុញ្ញ ការធានាការពារការគោរពរដ្ឋធម្មនុញ្ញ និងចូលរួមចំណែកលើកស្ទួយនីតិរដ្ឋ និងលទ្ធិប្រជាធិបតេយ្យនៅកម្ពុជា។
ទោះបីរូបកាយរបស់ ឯកឧត្តម សំ ព្រហ្មនា បានបាត់បង់ទៅមែនពិត ប៉ុន្តែអំពើជាកុសល កិត្តិយស សេចក្ដីថ្លៃថ្នូរ នឹងនៅស្ថិតស្ថេរក្នុងសន្តានចិត្តកូនចៅ និងញាតិមិត្តជិតឆ្ងាយទាំងអស់ជានិច្ចនិរន្តរ៍។ យើងខ្ញុំទាំងអស់គ្នា សូមបួងសួងដល់វត្ថុស័ក្តិសិទ្ធិក្នុងលោក និងគុណបុណ្យព្រះរតនត្រ័យ តាមជួយ បីបាច់ថែរក្សាដល់ដួងវិញ្ញាណក្ខន្ធ ឯកឧត្តម សំ ព្រហ្មនា បានទៅកាន់សុគតិភពកុំបីឃ្លៀងឃ្លាតឡើយ៕
