(ភ្នំពេញ)៖ គណបក្សខ្មែររួបរួមជាតិដឹកនាំដោយ លោក ញឹក ប៊ុនឆៃ បានចេញសេចក្តីថ្លែងការណ៍ ទទួលយកលទ្ធផលផ្លូវការ នៃការបោះឆ្នោតជាតិជ្រើសតាំងតំណាងរាស្រ្ត អាណត្តិទី៧ ដែលប្រកាសដោយ គ.ជ.ប នៅថ្ងៃទី០៥ ខែសីហា ឆ្នាំ២០២៣នេះ។
គណបក្សខ្មែររួបរួមជាតិ បានចូលរួមការបោះឆ្នោតជ្រើសតាំងតំណាងរាស្ត្រ នីតិកាល ទី៧ ឆ្នាំ២០២៣ ហើយថ្នាក់ដឹកនាំគណបក្សគ្រប់លំដាប់ថ្នាក់ សកម្មជន អ្នកគាំទ្រ ប្រជាពលរដ្ឋ បានចូលរួមសកម្មភាពជាច្រើនរបស់គណបក្ស ទាំងមុនយុទ្ធនាការ ទាំងអំឡុងពេលយុទ្ធនាការ។
គណបក្សខ្មែររួបរួមជាតិ សង្កេតឃើញថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣នេះ បានប្រព្រឹត្តទៅដោយសន្តិវិធី គ្មានអំពើហឹង្សា គ្មានអំពើចលាចល ណាមួយទេ ចាប់តាំងពីចាប់ផ្តើមយុទ្ធនាការ រហូតដល់ការបិទបញ្ចប់ការរាប់សន្លឹកឆ្នោត តាម ការិយាល័យបោះឆ្នោត។
គណបក្សនេះ បានបញ្ជាក់បន្ថែមថា គណបក្សខ្មែររួបរួមជាតិ ទទួលយកលទ្ធផលបោះឆ្នោត ដែលប្រកាសជាផ្លូវការ ដោយគណៈកម្មាធិការជាតិរៀបចំការបោះឆ្នោត(គ.ជ.ប) ថ្ងៃទី០៥ ខែសីហា ឆ្នាំ២០២៣។ គណបក្សខ្មែររួបរួមជាតិ មានការខកចិត្ត និងសោកស្តាយ ដែលខ្លួនទទួលបានសំឡេងឆ្នោតមិនគ្រប់គ្រាន់ ដើម្បីបានអាសនៈនៅរដ្ឋសភា ទោះបីមានសកម្មភាព និងការចូលរួមយ៉ាងច្រើនកុះករ ពីប្រជា ពលរដ្ឋក្តី។
គណបក្សខ្មែររួបរួមជាតិ សំណូមពរដល់រាជរដ្ឋាភិបាលថ្មី ដែលកើតចេញពីការបោះ ឆ្នោតជ្រើសតាំងតំណាងរាស្ត្រនីតិកាលទី៧ ថ្ងៃទី២៣ ខែកក្កដា ឆ្នាំ២០២៣ ជួយជំរុញបន្ថែមទៀត ក្នុងការបើកលម្អលទ្ធិប្រជាធិបតេយ្យ ឲ្យទូលំទូលាយ ការពង្រឹង ការគោរពសិទ្ធិមនុស្ស ការពង្រឹង ការបង្រួបបង្រួម ផ្សះផ្សារជាតិ តាមស្មារតីកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១៕
