(ភ្នំពេញ)៖ ជាអតីត Freshie girl ចំណាត់ថ្នាក់លេខ១ ក្នុងឆ្នាំ២០១៥ កញ្ញា គង់ ចាន់ស្រីដែន បានសម្រេចចិត្តមិនទទួលយកការងារសម្តែងថ្មីៗឡើយ ដើម្បីមានពេលមកសិក្សាថ្នាក់សរសេរព័ត៌មាន នៅមជ្ឈមណ្ឌលបណ្ដុះបណ្ដាលព័ត៌មាន Fresh News (FTC) ក្នុងបំណងបង្កើនជំនាញសម្រាប់អនាគត។
សិល្បៈការិនីរូបនេះ បច្ចុប្បន្ន កញ្ញាជាអ្នកអានព័ត៌មានមួយរូប នៅស្ថានីយទូរទស្សន៍ប៉ុស្តិ៍អប្សរា ក្នុងកម្មវិធីព័ត៌មានអប្សារណេត។ ការងារសិល្បៈនៅតែបន្តធ្វើ ហើយការសិក្សាក៏រឹតតែសំខាន់ ជាពិសេសការសិក្សាលើជំនាញសរសេរព័ត៌មាននេះតែម្ដង ហើយការជ្រើសរើសមកសិក្សាបន្ថែមនៅ FTC ។
កញ្ញាបានឲ្យដឹងថា៖ «ខ្ញុំចង់ដឹង យល់ពីព័ត៌មានឲ្យកាន់តែច្បាស់ របៀបនៃការសរសេរ ប្រភពព័ត៌មាន និយាយរួមគឺរបៀបសសេរព័ត៌មាន មានច្រើនមែនទែន។ អញ្ចឹង យើងចង់ដឹង ចង់រៀនឲ្យបានច្រើនជាងនេះ។ នៅថ្ងៃអានាគតនាងខ្ញុំចង់ក្លាយជាអ្នកសរសេរព័ត៌មានមួយរូប បន្ថែមពីការងារជាអ្នកអានព័ត៌មានបច្ចុប្បន្នដែលនាងខ្ញុំមានស្រាប់ ព្រោះថានៅពេលយើងចេះសរសេរព័ត៌មាន យល់ពីព័ត៌មាន នោះការអានព័ត៌មានរបស់យើង ក៏ល្អប្រសើរទៅតាមនោះដែរ»។
ការមកសិក្សានៅមជ្ឈមណ្ឌលបណ្ដុះបណ្ដាលព័ត៌មាន Fresh News (FTC) របស់កញ្ញា គឺទទួលបានការណែនាំដោយផ្ទាល់ពី លោក ម៉ារ យ៉ារិទ្ធ ដែលជាប្រធានមជ្ឈមណ្ឌលបណ្ដុះបណ្ដាលនេះផ្ទាល់។ បច្ចុប្បន្ន (FTC) មានសិក្សាចំនួន៣ ដោយនៅក្នុងនោះរួមមាន ថ្នាក់សិក្សាអំពីការសរសេរព័ត៌មានទូទៅ, ថ្នាក់សិក្សាអំពីការថតរូប ក្នុងវិជ្ជាជីវៈអ្នកសារព័ត៌មាន និងថ្នាក់សរសេរព័ត៌មានសេដ្ឋកិច្ច និងជំនួញ។
គួរបញ្ជាក់ផងដែរ មជ្ឈមណ្ឌលបណ្តុះបណ្តាលព័ត៌មាន Fresh News (Fresh News Training Center) ហៅកាត់ថា«FTC» ជាផ្នែកមួយរបស់អង្គភាពព័ត៌មាន Fresh News។ «FTC» ត្រូវបានបង្កើតឡើងកាលពីឆ្នាំ២០២១ ក្រោមគំនិតផ្ដួចផ្ដើមរបស់ លោក លឹម ជាវុត្ថា ដែលស្ថាបនិក និងជាអគ្គនាយកនៃអង្គភាពព័ត៌មាន Fresh News ដើម្បីចូលរួមចែករំលែកចំណេះដឹង និងបទពិសោធន៍ផ្នែកព័ត៌មានក៏ដូចជាចូលរួមបណ្តុះបណ្តាលយុវជនជំនាន់ក្រោយ ក្នុងវិស័យព័ត៌មានជាដើម។
FTC មានលោក ម៉ារ យ៉ារិទ្ធ ជាប្រធាន ដែលលោកមានបទពិសោធន៍ក្នុងវិស័យសារព័ត៌មានជិត៤០ឆ្នាំមកហើយ។ លោកធ្លាប់ជាភ្នាក់ងារសារព័ត៌មានបរទេសល្បីៗជាច្រើនដូចជា UPI, AP និង VOA ជាដើម។ លោកក៏ជាអតីតនិស្សិតខ្មែរ ដែលបានសិក្សាវិស័យវិជ្ជាជីវៈសារព័ត៌មានក្នុង សកលវិទ្យាល័យមីឈីហ្គែន University of Michigan និងសកលវិទ្យាល័យមែរីលែន University of Maryland ក្នុងសហរដ្ឋអាមេរិក។
នៅក្រោយការបញ្ចប់វគ្គសិក្សា លោកអ្នកនឹងទទួលបានវិញ្ញាបនបត្របញ្ជាក់ការសិក្សា ដែលចេញដោយអង្គភាព និងគ្រូបង្គោលទៀតផង៕
