(ភ្នំពេញ)៖ លោក សុង សារិទ្ធ (Very Cool) អតីតសកម្មជនបក្សប្រឆាំង បានសម្តែងការហួសចិត្តជាខ្លាំងចំពោះឥរិយាបថនយោបាយរបស់ក្រុមប្រឆាំង ដែលតែងតែលាបពណ៌ចំពោះជនទាំងឡាយ ដែលដើរចេញពីក្រុមខ្លួន។ លោក សុង សារិទ្ធ ស្នើឱ្យក្រុមប្រឆាំងទម្លាក់ចោលនូវឥរិយាបថញុះញង់បំបែកបំបាក់ជាតិបែបនេះ។
ប្រតិកម្មរបស់លោក សុង សារិទ្ធ បានកើតមានឡើង បន្ទាប់ក្រុមអ្នកប្រឆាំងនៅប្រទេសបារាំង បានបំពាក់ផ្កាយចោទប្រកាន់លោកថាជាជនក្បត់ជាតិ និងជាជនជាតិយួនជាដើម ក្រោយពេលរូបលោកសម្រេចចិត្តដើរចេញពីក្រុមប្រឆាំង ចូលមករួមរស់ជាមួយគណបក្សប្រជាជនកម្ពុជា។
អតីតសកម្មជនបក្សប្រឆាំងដ៏សកម្មរូបនេះ បានអះអាងថា រូបលោកមិនមានជាប់សែស្រឡាយយួននោះឡើយ។ លោក សុង សារិទ្ធ ស្នើទៅក្រុមប្រឆាំងឱ្យបញ្ឈប់នូវឥរិយាបថនយោបាយបែបនេះ បើមិនដូច្នោះក្រុមរបស់ពួកគេនឹងកាន់តែឯកោ ដោយគ្មាននរណាដើរតាមទៀតនោះឡើយ។
ក្នុងវីដេអូឃ្លីបឆ្លើយតបនឹងការលាបពណ៌នេះ លោក សុង សារិទ្ធ ក៏បានឆ្លៀតលើកឡើងពីការជ្រើសតាំងលោកបណ្ឌិត ហ៊ុន ម៉ាណែត ជានាយករដ្ឋមន្ត្រីផងដែរ។ លោក សារិទ្ធ បានគាំទ្រចំពោះការតែងតាំងនេះ ព្រោះលោកមើលឃើញថា លោកបណ្ឌិត ហ៊ុន ម៉ាណែត ជាមនុស្សមានសមត្ថភាពផ្នែកដឹកនាំ និងមានចំណេះដឹងជ្រៅជ្រះ។
ឆ្លើយតបការចោទរបស់ក្រុមប្រឆាំងថា ការតែងតាំងលោកបណ្ឌិត ហ៊ុន ម៉ាណែត ជាទង្វើបក្ខពួកនិយមនោះ លោក សារិទ្ធ បានសួរទៅក្រុមប្រឆាំងថា តើពួកគេអត់មានចរិតបក្ខពួកនិយមទេឬ? ទន្ទឹមនឹងសួរសំណួរបែបនេះ លោក សារិទ្ធ បានរំលឹកថា ពេលក្រុមប្រឆាំងទទួលបានអាសនៈនៅក្នុងរដ្ឋសភា បានជ្រើសរើសសាច់ញាតិ និងភរិយាខ្លួនឱ្យទៅបម្រើការនៅរដ្ឋសភានោះ តើជាទង្វើបក្ខពួកនិយមដែរឬទេ?
