(ភ្នំពេញ)៖ បន្ទាប់ពីការកាន់តំណែងជានាយករដ្ឋមន្ត្រីកម្ពុជាអស់រយៈពេលជាង ៣៨ឆ្នាំ សម្តេចតេជោ ហ៊ុន សែន សម្រេចចិត្តមិនបន្តតំណែងទៀតនោះឡើយ។ តំណែងដែលមានការទទួលខុសត្រូវខ្ពស់ចំពោះជោគវាសនាជាតិ និងប្រជាជនកម្ពុជានេះ នឹងត្រូវប្រគល់ឱ្យទៅលោកបណ្ឌិត ហ៊ុន ម៉ាណែត ជាកូនប្រុសច្បងរបស់សម្តេច ហើយត្រូវបានជ្រើសរើសដោយគណៈអចិន្ត្រៃយ៍បក្សប្រជាជនកម្ពុជា។
ក្នុងពិធីសម្ពោធដាក់ឱ្យប្រើប្រាស់ផ្លូវក្រវាត់ក្រុងទី៣ នាព្រឹកថ្ងៃទី៣ ខែសីហា ឆ្នាំ២០២៣ សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា ការប្រគល់តួនាទីជូនដល់យុវជននាពេលនេះ ដើម្បីធានាបាននូវស្ថេរភាព និងការអភិវឌ្ឍន៍សង្គមកម្ពុជាក្នុងរយៈពេលវែង។
ការសម្រេចដាក់ចុះនូវអម្រែកជាតិនាពេលនេះ គឺជារឿងដ៏ភ្ញាក់ផ្អើល ហើយក៏ជាព្រឹត្តិការណ៍នៃរបត់ប្រវត្តិសាស្ត្រថ្មីមួយទៀតរបស់កម្ពុជា។ សម្តេចតេជោ ហ៊ុន សែន បានចាប់ផ្តើមជីវិតនយោបាយជានាយករដ្ឋមន្ត្រីកាលពីថ្ងៃទី១៤ ខែមករា ឆ្នាំ១៩៨៥។ រយៈពេលជាង៣៨ឆ្នាំ ក្នុងឋានៈជានាយករដ្ឋមន្ត្រីរបស់កម្ពុជា សម្តេចតេជោ ហ៊ុន សែន បានប្រឹងប្រែងយ៉ាងខ្លាំងក្នុងការដោះស្រាយបញ្ហារបស់ជាតិ ប្រឹងប្រែងកសាងអភិវឌ្ឍន៍ជាតិពីគំនរផេះផង់ភ្លើងសង្គ្រាម ដោះស្រាយគ្រោះអត់ឃ្លានរបស់ប្រជាពលរដ្ឋ។
សមិទ្ធផលធំៗជាច្រើនបានកើតមានលើដែនដីកម្ពុជា ក្រោមការដឹកនាំរបស់សម្តេចតេជោ មានដូចជាការនាំមកនូវសុខសន្តិភាព ការបង្រួបបង្រួមជាតិ ជំរុញសេដ្ឋកិច្ចជាតិចេញពីឋានៈប្រទេសក្រីក្រមកកាន់ប្រទេសមានចំណូលមធ្យមកម្រិតទាប លើកកម្ពស់ជីវភាព និងការរស់នៅរបស់ប្រជាពលរដ្ឋកាន់តែល្អប្រសើរ ហើយក៏បានលើកកម្ពស់កិត្តិនាម និងកិត្តិស័ព្ទរបស់ជាតិកម្ពុជាឱ្យខ្ពង់ខ្ពស់លើឆាកអន្តរជាតិជាថ្មី បន្ទាប់អីអាប់ឱនរបស់រយឆ្នាំព្រោះតែវិបត្តិនៃសង្គ្រាម។
ក្នុងឋានៈជានាយករដ្ឋមន្ត្រីនេះ សម្តេចតេជោ ហ៊ុន សែន តែងតម្កល់ខ្ពស់នូវសុខទុក្ខរបស់ប្រជាពលរដ្ឋ ហើយតែងចុះប្រាស្រ័យទាក់ទងជាមួយប្រជាពលរដ្ឋគ្រប់មជ្ឈដ្ឋានប្រកបដោយមនោសញ្ចេតនាយ៉ាងជ្រាលជ្រៅបំផុត។
សមិទ្ធផលការងារ ស្នាដៃដឹកនាំ និងការយកចិត្តទុកដាក់របស់សម្តេចតេជោ ចំពោះជាតិ និងប្រជាជនកម្ពុជានេះ បានធ្វើឱ្យប្រជាពលរដ្ឋមានការនឹកស្រណោះ និងអាឡោះអាល័យ នៅពេលសម្តេចតេជោប្រកាសលាឈប់ពីតំណែងជានាយករដ្ឋមន្ត្រី។
ប្រជាពលរដ្ឋស្រុកកៀនស្វាយ ដែលបានចូលរួមក្នុងពិធីសម្ពោធផ្លូវក្រវាត់ក្រុងទី៣ បានថ្លែងថា ពួកគេនឹករលឹកចំពោះសម្តេច ហើយក៏ចងចាំជានិច្ចនូវគុណបំណាច់របស់សម្តេចតេជោ ដែលបានលះបង់ចំពោះជាតិ និងប្រជាជនកម្ពុជា។
បើទោះបីជាយ៉ាងណាពួកគេ គោរពការសម្រេចចិត្តរបស់សម្តេចតេជោ ចំពោះការរៀបចំឱ្យមានអ្នកបន្តវេន ដែលជារឿងដ៏ស័ក្តិសមបំផុត។
ប្រជាពលរដ្ឋស្រុកកៀនស្វាយ ក៏បានសម្តែងការគាំទ្រចំពោះបេក្ខភាពលោកបណ្ឌិត ហ៊ុន ម៉ាណែត ជានាយករដ្ឋមន្ត្រីកម្ពុជាក្នុងអាណត្តិថ្មី។ ពួកគេជឿជាក់ថា លោកបណ្ឌិត នៅតែបន្តតាមគន្លងសម្តេចតេជោ តម្កល់ប្រយោជន៍ជាតិ និងប្រជាជនជាធំ ហើយធ្វើឱ្យកម្ពុជា មានសុខសន្តិភាព និងការអភិវឌ្ឍន៍ ដែលជាបំណងប្រាថ្នាធំរបស់ប្រជាជនកម្ពុជា៕
