(ភ្នំពេញ)៖ ស្ត្រីអ្នកខេត្តរតនគិរីម្នាក់ទៀត ដែលលង់ខ្លូនប្រព្រឹត្តកំហុសគូសបំផ្លាញសន្លឹកឆ្នោតតាមការញុះញង់របស់អ្នកនយោបាយជ្រុលនិយមក្បត់ជាតិ សម រង្ស៉ី បានចេញមុខសារភាពទទួលស្គាល់កំហុស និងសូមការអនុគ្រោះពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា។
ស្ត្រីដែលចេញមកទទួលស្គាល់កំហុសក្នុងការចូលរួមបំផ្លាញដំណើរប្រជាធិបតេយ្យនៅកម្ពុជានេះ មានឈ្មោះ គន់ ស្រស់ អាយុ ៣៥ឆ្នាំ។
គន់ ស្រស់ បានបញ្ជាក់ក្នុងវីដេអូឃ្លីបយ៉ាងដូច្នេះ «នាងខ្ញុំពិតជាមានការសោកស្តាយ ដែលជឿការញុះញង់ទណ្ឌិត សម រង្ស៉ី ដែលជាមេខ្លោង ធ្វើឱ្យប៉ះពាល់ និងមានកំហុសឆ្គងនឹងផ្លូវច្បាប់»។
ស្ត្រីដែលចាញ់កលការញុះញង់ធ្វើទង្វើល្មើសនឹងច្បាប់បោះឆ្នោតរូបនេះ ក៏បានគោរពថ្លែងអំណរគុណសម្តេចតេជោ ហ៊ុន សែន ដែលបានផ្តល់ក្តីមេត្តា និងអនុគ្រោះដល់រូបនាង និងពលរដ្ឋខ្មែរដទៃទៀត ដែលលង់ជឿការញុះញង់របស់ទណ្ឌិត សម រង្ស៉ី។
សូមរំលឹកថា នៅមុនពេលបោះឆ្នោតជ្រើសតាំងតំណាងរាស្ត្រនីតិកាលទី៧ ក្រុមអ្នកនយោបាយជ្រុលនិយមដឹកនាំដោយទណ្ឌិត សម រង្ស៉ី បានធ្វើយុទ្ធនាការបំផុសបំផុលប្រជាពលរដ្ឋឱ្យគូសបំផ្លាញសន្លឹកឆ្នោត។ ការគូសបំផ្លាញសន្លឹកជាទង្វើផ្ទុយនឹងច្បាប់ស្តីពីការបោះឆ្នោតរបស់កម្ពុជា។
ក្នុងយុទ្ធនាការគូសបំផ្លាញសន្លឹកឆ្នោតនេះ ក្រុមអ្នកនយោបាយជ្រុលនិយម បានបង្កើតគ្រុបតេឡេក្រាម ឈ្មោះ «Sbai សប្បាយ» បម្រើដល់សកម្មភាពរបស់ពួកគេ។ តាមរយៈគ្រុបតេឡេក្រាមនេះ សមត្ថកិច្ច កំណត់បានមុខសញ្ញាអ្នកប្រព្រឹត្តល្មើសនឹងច្បាប់ជាច្រើនរូប។
បើទោះបីជាយ៉ាងណា សម្តេចតេជោ ហ៊ុន សែន បានទុកឱកាសឱ្យមុខសញ្ញាប្រព្រឹត្តល្មើសនឹងច្បាប់បោះឆ្នោតទាំងអស់នោះ ចេញមកសារភាពទោសកំហុស ដើម្បីទទួលបានការអនុគ្រោះ។
ចាប់ពីល្ងាចថ្ងៃទី២៣ ខែកក្តដា ឆ្នាំ២០២៣ មកដល់ថ្ងៃទី០២ ខែសីហា ឆ្នាំ២០២៣ មានអ្នកចេញសារភាពកំហុសសរុបចំនួន ១០នាក់ ក្នុងចំណោមមុខសញ្ញាមានក្នុងបញ្ជីឈ្មោះចំនួន ៤៤នាក់។ អ្នកសារភាពកំហុសទាំងនោះរួមមាន៖
១៖ ឈ្មោះ ឆាយ រ័ត្ន ភេទប្រុស អាយុ ៤៧ឆ្នាំ អតីតក្រុមការងារបណ្តោះអាសន្នខេត្តព្រះសីហនុ និងជាអនុប្រធានប្រតិបត្តិខេត្តព្រះសីហនុ។
២៖ ឈ្មោះ ឡេង សុវណ្ណ ភេទស្រី អាយុ ៤២ ឆ្នាំ។
៣៖ ឈ្មោះ ថាច់ ជាចន្ថា ភេទស្រី អតីតប្រធានចលនាយុវជនខណ្ឌច្បារអំពៅ។
៤៖ ឈ្មោះ សយ ឧត្តម ភេទប្រុស អាយុ ២៩ឆ្នាំ។
៥៖ ឈ្មោះ សេង ប៊ុនហាន ភេទប្រុស អាយុ ៣២ឆ្នាំ រស់នៅរាជធានីភ្នំពេញ។
៦៖ ឈ្មោះ ជា សេរី ភេទប្រុស អាយុ ៤៨ឆ្នាំ រស់នៅខេត្តតាកែវ។
៧៖ ឈ្មោះ ហ៊ត ហ៊ាង ភេទប្រុស អាយុ ៤៨ឆ្នាំ រស់នៅរាជធានីភ្នំពេញ។
៨៖ ឈ្មោះ ចំរើន សិរីទិត្យ ភេទប្រុស។
៩៖ ឈ្មោះ ឌិន សុធារិទ្ធ ភេទប្រុស អាយុ ៤២ឆ្នាំ រស់នៅខេត្តតាកែវ។
១០៖ ឈ្មោះ គន់ ស្រស់ ភេទស្រី អាយុ៣៥ឆ្នាំ រស់នៅខេត្តរតនគិរី៕
