(ភ្នំពេញ)៖ អ្នកនាំពាក្យក្រសួងយុត្តិធម៌ លោក គឹម សន្តិភាព បានថ្លែងប្រាប់ Fresh News នៅមុននេះបន្តិចថា ក្រសួងយុត្តិធម៌ នឹងធ្វើការតាមដាន លើករណីដែលចៅក្រមស៉ើបសួរ សាលាដំបូងខេត្តមណ្ឌលគិរី ដែលអនុញ្ញាតឲ្យជនត្រូវចោទ២នាក់ នៅក្រៅឃុំជាបន្តទៀត ប្រសិនបើករណីនេះ មានភាពមិនប្រក្រតីមែននោះ។
ពាក់ព័ន្ធការអនុញ្ញាតឲ្យជនត្រូវចោទទាំង២នាក់នៅក្រៅឃុំនេះ លោក គឹម សន្តិភាព បានលើកឡើងថា ករណីនេះចៅក្រមស៉ើបសួរ សម្រេចឲ្យនៅក្រៅឃុំបណ្តោះអាសន្ន និងដាក់ឲ្យស្ថិតក្រោមការត្រួតពិនិត្យ របស់តុលាការ គឺមិនមែនជាការដោះលែង ដោយបិទសំណុំរឿងនោះទេ។ ការសម្រេចមិនឃុំខ្លួន គឺជាឆន្ទានុសិទ្ធិរបស់ចៅក្រម ប៉ុន្តែប្រសិនបើការសម្រេចនេះ មានភាពមិនប្រក្រតីដោយប្រការណាមួយ ឬពាក់ព័ន្ធនឹងលាភសក្ការៈអ្វីមួយនោះ ចៅក្រមត្រូវទទួលខុសត្រូវចំពោះមុខច្បាប់។
អ្នកនាំពាក្យរូបនេះ បានបន្ថែមថា ជានីតិវិធី បើព្រះរាជអាជ្ញាបានស្នើសុំឃុំខ្លួន ហើយចៅក្រមស៉ើបសួរមិនឃុំខ្លួននោះ ព្រះរាជអាជ្ញាអាចប្តឹងមកសភាស៊ើបសួរបាន តែករណីនេះ តំណាងអយ្យការអមសាលាដំបូង ខេត្តមណ្ឌលគីរីបានប្តឹងរួចហើយ ក្រសួងយុត្តិធម៌ នឹងបន្តតាមដានករណីនេះ យ៉ាងយកចិត្តទុកដាក់ ដើម្បីធានាបានការអនុវត្តច្បាប់ត្រឹមត្រូវ។
សូមបញ្ជាក់ថា ជនត្រូវចោទចំនួន២នាក់ ត្រូវបានចៅក្រមស៉ើបសួរ គឺលោក សំអឿន កោសល្យមុនី សំរេចឲ្យនៅក្រៅឃុំបន្ទាប់ពី មន្ត្រីនគរបាលធ្វើការឃាត់ខ្លួន ពាក់ព័ន្ធការចោទប្រកាន់ថា ជនសង្ស័យទាំង២រូបនេះ បានឆបោក និងក្លែងឯកសារសាធារណៈ និងត្រូវបានព្រះរាជអាជ្ញារង សំរេចធ្វើការចោទប្រកាន់ ក្នុងបទល្មើសទាំងពីរខាងលើផងដែរ។
ការអនុញ្ញាតឲ្យនៅក្រៅឃុំ ដោយចៅក្រមស៉ើបសួរនេះ ធ្វើឲ្យមានការរិះគន់ពីមន្ត្រីអនុវត្តច្បាប់ គឺនគរបាលយុត្តិធម៌ ដែលជាអ្នកដុតដៃដុតជើង ធ្វើការស្រាវជ្រាវរហូតឈានដល់ការឃាត់ខ្លួន កសាងសំណុំរឿងបញ្ជូនទៅតុលាការ។ មិនតែប៉ុណ្ណោះព្រះរាជអាជ្ញារង ជាអ្នកចោទប្រកាន់ ក៏មិនឯកភាពទៅនឹងការអនុញ្ញាត ឲ្យនៅក្រៅឃុំនេះដូចគ្នា ហើយក៏សំរេចប្ដឹងទៅសាលាឧទ្ទរណ៍ផងដែរ។
ឥឡូវគេកំពុងរង់ចាំតាមដាន ករណីអនុញ្ញាតឲ្យនៅក្រៅឃុំនេះ ថាតើវាជារឿងត្រឹមត្រូវ ឬក៏ជារឿងក្នុងនាមចៅក្រមស៉ើបសួរ អាងទៅលើឆន្ទានុសិទ្ធដោះលែងជាថ្នូរ ទៅនឹងរឿងផលប្រយោជន៍ឬយ៉ាងណា?៕
