(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣ ខែសីហា ឆ្នាំ២០២៣នេះ បានពន្យល់នូវហេតុផលចំនួន៤ ដែលនាំឱ្យសម្តេចសម្រេចចិត្តចាកចេញពីតំណែងនាយករដ្ឋមន្ត្រីនៃកម្ពុជា សម្រាប់នីតិកាលទី៧។
ហេតុផលចំនួន ៤នោះរួមមាន៖ទី១៖ ការផ្ទេរអំណាចដល់យុវននៅពេលនេះ មានស្ថិរភាព និងសុវត្ថិភាព, ទី២៖ ការរៀបចំខ្លួនរួចរាល់របស់យុវជនបន្តវេន, ទី៣៖ សម្តេចនៅបន្តកាន់តំណែងជាមេបក្សកាន់អំណាច ដែលជាខ្សែក្រវាត់២ជាន់ការពារសន្តិភាព និងការអភិវឌ្ឍន៍ និងទី៤៖ សំឡេងឆ្នោតគាំទ្រ យ៉ាងច្រើនលើសលុប ចំពោះបេក្ខភាពនាយករដ្ឋមន្ត្រីថ្មី គឺបណ្ឌិត ហ៊ុន ម៉ាណែត។
ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសអញ្ជើញសម្ពោធដាក់ឱ្យប្រើប្រាស់ ផ្លូវក្រវាត់ក្រុងទី៣ នាព្រឹកថ្ងៃទី០៣ ខែសីហា ឆ្នាំ២០២៣។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានពន្យល់ចំពោះសម្រេចចិត្តចេញពីតំណែងនាយករដ្ឋមន្ត្រីថា ទី១៖ ការផ្ទេរឱ្យយុវជននៅពេលនេះ គឺមានស្ថិរភាព និងសុវត្ថិភាព ជាងពេលដែលយើងចាស់ ឬស្លាប់។ ត្រង់ចំណុចនេះ សម្តេចបានចោទសួរថា មានមនុស្សប៉ុន្មាននាក់ នៅកម្ពុជាដែលធ្លាប់បានលះបង់អំណាចដូចសម្តេច ក្នុងពេលដែលសម្តេចមានលទ្ធភាព ធ្វើនាយករដ្ឋមន្ត្រីពី៥ ទៅ១០ឆ្នាំទៀត ? ប៉ុន្តែមិនជាការល្អទេ ប្រសិនជាអាយុចាស់ពេក ឬស្លាប់។ សម្តេចតេជោ ហ៊ុន សែន បន្ត ការរៀបចំផ្ទេរតំណែងរបស់សម្តេចនាពេលនេះ គឺយកតាមព្រះរាជគំរូរបស់ព្រះបរមរតនកោដ្ឋ។
សម្តេចបន្តថា ធ្លាប់មានសេណារីយូ២ ដែលបានដាក់ចេញ គឺ១៖ គណៈរដ្ឋមន្ត្រីចាស់ អាចបន្តដឹកនាំប្រទេសរយៈពេល១ ឬ២ឆ្នាំ រួចហើយទើបបន្តទៅឱ្យអ្នកជំនាន់ក្រោយ និងសេណារីយូ ទី២៖ គឺឱ្យយុវជនចាប់ផ្តើមពីដើមអាណត្តិ។ ដោយយោងតាមលក្ខខណ្ឌអំណោយផល គណៈអចិន្ត្រៃយ៍បក្សបានសម្រេចជ្រើសរើសទី២ គឺឱ្យរាជរដ្ឋាភិបាលថ្មី ជាយុវជនចេញដំណើរពីដើមអាណត្តិតែម្តង ដើម្បីផ្តល់អំណាចពេញលេញដល់អ្នកបន្តវេន។
សម្រាប់ហេតុផលទី២ សម្តេចបញ្ជាក់ថា យុវជនជំនាន់ក្រោយបានចូលមកដឹកនាំ ក្នុងពេលដែលពួកគេ រៀបចំខ្លួនបានយ៉ាងល្អ ដែលមកទទួលអំរែកពីមនុស្សចាស់ ហើយពួកគេក៏មិនមែនជាក្មេងទៀតនោះទេ សម្រាប់នាយករដ្ឋមន្ត្រី នីតិកាលទី៧ គឺបណ្ឌិត ហ៊ុន ម៉ាណែត ចូលធ្វើនាយករដ្ឋមន្ត្រីមានអាយុ ៤៦ឆ្នាំ ច្រើនជាងកាលពីពេលសម្តេចចូលធ្វើជានាយករដ្ឋមន្ត្រី ចំនួន១៤ឆ្នាំ។
សម្តេចបន្ថែមថា គណៈរដ្ឋមន្ត្រីអាណត្តិដែលជាក្រុមយុវជន គឺមានសមត្ថភាពគ្រប់គ្រាន់ ដោយខ្លះបានកាន់តំណែងជាឧបនាយករដ្ឋមន្ត្រី រដ្ឋមន្ត្រី និងរដ្ឋលេខាធិការ តាមក្រសួងស្ថាបន័នានារួចរាល់ទៅហើយ។ សម្តេចតេជោ ហ៊ុន សែន ក៏សុំការយោគយល់ដល់រដ្ឋមន្ត្រីចាស់ ត្រូវតែហ៊ានលះបង់ ដើម្បីផ្តល់តួនាទីដល់យុវជនបន្តវេន។
សម្រាប់មូលហេតុទី៣វិញ សម្តេចតេជោ ហ៊ុន សែន បានលើកឡើងថា ជំនាន់ចាស់មិនទាន់ចាកចេញពីឆាកនយោបាយទេ សម្តេចនៅតែបន្តជាប្រធានគណបក្សកាន់អំណាច អមដោយអនុប្រធានបួនរូប ជាមួយសមាជិកការិយាល័យនយោបាយមួយចំនួនទៀត។ សម្តេចមិនព្យាយាមជះឥទ្ធិពល លើការសម្រេចចិត្តរបស់នាយករដ្ឋមន្ត្រី រដ្ឋមន្ត្រីនានាតាមស្ថាប័ននានានោះទេ ប៉ុន្តែការសម្រេចយ៉ាងណាក៏ មិនត្រូវឱ្យខុសពីគោលនយោបាយ របស់គណបក្សដែលបានដាក់ការសន្យា ចំពោះម្ចាស់ឆ្នោតនោះទេ។ សម្តេចតេជោ ហ៊ុន សែន បានថ្លែងអំណរគុណដល់ប្រជាជនកម្ពុជា ដែលបានគាំទ្រដល់បណ្ឌិត ហ៊ុន ម៉ាណែត ដើម្បីអាចក្លាយទៅជានាយករដ្ឋមន្ត្រី នៅពេលដ៏ខ្លីខាងមុខនេះ។
សម្រាប់មូលហេតុទី៤ ត្រូវបានសម្តេចពន្យល់ថា ដោយសារតែសភាពការណ៍អនុគ្រោះ បានអនុញ្ញាតឱ្យក្រុមបន្តវេនចេញដំណើរភ្លាមៗ ព្រោះតែសំឡេងគាំទ្រនៃការបោះឆ្នោតទទួលលើសពី៧៤ភាគរយ។ សម្តេចបន្តថា ពីមុនសម្តេចមានការបម្រុងទុក នៅស្ថានភាពពីរ គឺបើលទ្ធផលបោះឆ្នោតគាំទ្រគណបក្សប្រជាជនកម្ពុជា មានក្រោម ៧៤ភាគរយ សម្តេចនឹងបន្តធ្វើជានាយករដ្ឋមន្ត្រី ព្រោះបានសេចក្តីថា ប្រជាជនមិនគាំទ្របណ្ឌិត ហ៊ុន ម៉ាណែត ទេបានជាទាញសន្លឹកឆ្នោតឱ្យធ្លាក់ចុះ។ ប៉ុន្តែការបោះឆ្នោតនីតិកាលទី៧ បានបង្ហាញឱ្យឃើញច្បាស់ថា សន្លឹកឆ្នោតបានកើនឡើងដល់ជាង ៨២ភាគរយ ដែលបង្ហាញថា ប្រជាជនគាំទ្របណ្ឌិត ហ៊ុន ម៉ាណែត ធ្វើជានាយករដ្ឋមន្ត្រីបន្តវេន។
សម្តេចតេជោ ហ៊ុន សែន បានថ្លែងថា «សួរថាហេតុអ្វីបានជាខ្ញុំត្រូវចាកចេញពីមុខតំណែងនាយករដ្ឋមន្ត្រី ក្នុងពេលដែលគណបក្សប្រជាជនកម្ពុជា ទទួលការគាំទ្រយ៉ាងខ្ពស់ដូចនេះទៅវិញ ? ខ្ញុំអាចនិយាយបានថានេះគឺជាការលះបង់ ដើម្បីភាពសុខសាន្តរយៈពេលវែង គឺធានានូវសន្តិភាព និងធានាដល់ការអភិវឌ្ឍ។ ខ្ញុំធ្លាប់លះបង់រួចហើយ ធ្លាប់បានយកក្បាលធ្វើដើមទុន ដើម្បីរំដោះប្រទេស ធ្លាប់យកក្បាលធ្វើដើមទុន ដើម្បីបង្រួបបង្រួមប្រទេស បញ្ចប់សង្គ្រាមរ៉ាំរ៉ៃ ខ្ញុំបានយកជីវិតនយោបាយរបស់ខ្ញុំ ធ្វើជាដើមទុននៃកំណែទម្រង់នយោបាយ និងសេដ្ឋកិច្ចនៅកម្ពុជា ខ្ញុំបានលះបង់ហើយ ឥឡូវខ្ញុំចង់លះបង់សាជាថ្មីម្តងទៀត ដើម្បីសេចក្តីសុខរយៈពេលវែង របស់ប្រជាជន»៕
