(ភ្នំពេញ)៖ លោកបណ្ឌិត ឃឹម ប៊ុនសុង អភិបាលខេត្តសៀមរាប នៅថ្ងៃទី២ ខែសីហា ឆ្នាំ២០១៦នេះ បានដឹកនាំមន្ទីរអង្គភាពជំនាញ ចុះត្រួតពិនិត្យ ស្ថានភាពផ្លូវក្នុងក្រុងសៀមរាប ដែលទទួលរងការខូចខាតកន្លងមក ដើមី្បរៀបចំធ្វើគម្រោងជួសជុល ស្ថាបនា និងពង្រីកឱ្យបានល្អប្រសើរឡើងវិញ។
លោក គឹម ប៉ុណ្ណា ប្រធានមន្ទីរសាធារណការនិងដឹកជញ្ជូនខេត្តសៀមរាប បានឲ្យដឹងថា អាជ្ញាធរខេត្ត នឹងពង្រីកផ្លូវ និងស្ថាបនា ផ្លូវចាប់ពីផ្លូវបំបែករង្វង់មូលនាគ (រង្វង់មូលផ្សារចាស់) ឆ្ពោះទៅស្ថានីយ៍ចម្រោះទឹកស្អុយ ក្នុងសង្កាត់ស្រង៉ែឡើងវិញ ហើយត្រូវបានធ្វើការស្ថាបនាផ្លូវថ្មី១ខ្សែរ ភ្ជាប់ពីផ្លូវ៣០ម៉ែត្រទៅតភ្ជាប់ផ្លូវចូលទៅសាលាក្រុងសៀមរាប ។
លោកថា អាជ្ញាធរ ក៏នឹងធ្វើការជួសជុលផ្លូវមុខផ្សារដើមក្រឡាញ់ ទៅផ្លូវមន្ទីរពេទ្យគុន្ធបុប្ជា ជ័យវរ្ម័នទី៧, ផ្លូវអភិរក្សដ្ឋានអង្គរចាប់ពីមុខពេទ្យគុន្ធបុបា រហូតដល់ស្ពាន់វត្តព្រះឥន្ទកោសី ព្រមទាំងធ្វើការពង្រីកផ្លូវអមសងខាងដងស្ទឹងមានទទឹង ៩ម៉ែត្រ ចាប់ពីចំណុចស្ពានអតីតមន្ទីរទេសចរណ៍ទៅដល់ស្ពាននាគ ដែលជាគម្រោងរបស់សាលាខេត្តសៀមរាប ព្រមទាំងសាងសង់ស្ពានបេតុងចំនួន ២ នៅចំណុចស្ពានព្រះរាជដំណាក់ និងវត្តពោធិ៍លង្កា ដែលជាគម្រោងរបស់ក្រសួងសាធារណការ និងដឹកជញ្ជូន ។
ក្នុងការចុះពិនិត្យផ្លូវនោះ លោក ឃឹម ប៊ុនសុង ក៏បានដាក់នូវវិធានការ ឲ្យមន្ទីរសាធារណការ និង ដឹក ជញ្ជូនខេត្ត រួមសហការជាមួយសាលាខេត្ត រៀបចំធ្វើគម្រោងក្នុងការជួសជុលផ្លូវ ស្ថាបនាផ្លូវថ្មី ស្ពាន និង ពង្រីកផ្លូវអមតាមមាត់ស្ទឹងទៀតផង ។
លោក ឃឹម ប៊ុនសុង បានបញ្ជាក់ថា គម្រោងជួសជុល និង ស្ថាបនា ពង្រីកផ្លូវនេះ ជា គម្រោមរបស់ខេត្ត សម្រាប់ឆ្នាំ២០១៧ ក្នុងការអភិវឌ្ឍខេត្ត ឲ្យកាន់តែមាននូវសោភណ្ឌភាពស្រស់ត្រកាល ឲ្យសក្តិសមជាខេត្តគោលដៅទេសចរណ៍លើពិភពលោក ដែលបានកំពុងទាក់ទាញនូវអារម្មណ៍ភ្ញៀវទេសចរណ៍ មកពី គ្រប់មជ្ឈដ្ឋាននានាលើសកលោក ។
ក្នុងនោះលោក ក៏បានឲ្យមន្ទីរសាធារណការ និង ដឹកជញ្ជូនខេត្ត ត្រូវធ្វើកិច្ចសហការជាមួយ សាលាខេត្ត និង អាជ្ញាធរក្រុងសៀមរាប ក្នុងការរៀបចំធ្វើគម្រោង និង ការសម្រួលនូវ បញ្ហាមួយចំនួន នៅពេលធ្វើការស្ថាបនាផ្លូវ និង ពង្រីកផ្លូវ ជាមួយបងប្អូនប្រជាពលរដ្ឋ ដែលមានលំនៅដ្ឋាន និង ធ្វើ អាជីវកម្មអមតាមដងផ្លូវទាំងនេះផងដែរ ។ លោកក៏បានធ្វើការកំណត់ក្នុងការពង្រីកផ្លូវអមសង្ខាងដងស្ទឹង ដោយមានទទឹង ៩ម៉ែត្រ ក្នុងការសម្រួលដល់ការធ្វើចរាចរណ៍នៃយានយន្តគ្រប់ប្រភេទ ដែលបានធ្វើដំណើរតាមដងផ្លូវនេះ ហើយក៏ជាការលើនូវសម្រស់ដងស្ទឹងប្រវត្តិសាស្ត្រផងដែរ ។
លោក ក៏បានណែនាំដល់មន្ទីរជំនាញ ត្រូវធ្វើយ៉ាងណាត្រូវរៀបចំប្រព័ន្ធលូបង្ហូរទឹកភ្ញៀងនៅតាមដងផ្លូវ ដើមី្បបញ្ជៀសកុំឲ្យ ហូរចូលទៅក្នុងស្ទឹង ដែលនាំឲ្យប៉ះពាល់បរិស្ថាន អនាម័យដងស្ទឹង ។ ម៉្យាងទៀតចំពោះ កំណាត់ផ្លូវតភ្ជាប់ពីផ្លូវ៣០ ម៉ែត្រ ក៏ត្រូវធ្វើការរៀបចំប្រព័ន្ធលូក្រោមដីឲ្យត្រឹមត្រូវតាមស្តង់ដា បច្ចេកទេស ហើយកិច្ចការទាំងនេះ ក៏ត្រូវមានការ ចូលរួមពីបងប្អូនប្រជាពលរដ្ឋផងដែរ ។ ក្នុងនោះលោកអភិបាលខេត្ត ក៏បានសារទរផងដែរ ដែលក្រសួងសាធារណការ និង ដឹងជញ្ជូន បានផ្តល់ស្ពាន់បេតុង ឆ្លងកាត់ស្ទឹងសៀមរាប ចំនួនពីរ ដល់ប្រជាពលរដ្ឋខេត្តសៀមរាប ៕
