(ភ្នំពេញ)៖ បុគ្គលសំខាន់ៗជាតិ និងអន្តរជាតិចំនួន៨រូប នឹងជួបគ្នាជជែកពីការបោះឆ្នោតជ្រើសតាំងតំណាងរាស្ត្រនីតិកាលទី៧ នៅកម្ពុជា កាលពីថ្ងៃទី២៣ ខែកក្កដា ឆ្នាំ២០២៣កន្លងទៅនេះ។
ជំនួបនេះធ្វើឡើងតាមរយៈកិច្ចពិភាក្សាពិសេសរៀបចំឡើងដោយរាជបណ្ឌិត្យសភាកម្ពុជា នៅរសៀលថ្ងៃពុធ ទី២ ខែសីហា ឆ្នាំ២០២៣នេះ។ កិច្ចពិភាក្សាពិសេសនេះធ្វើឡើងក្រោមប្រធានបទ «ការបោះឆ្នោតនៅកម្ពុជា៖ ជម្រើសរបស់ប្រជាពលរដ្ឋត្រូវបានលាតត្រដាង»។
កិច្ចពិភាក្សានេះ សម្របសម្រួលដោយលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា។ ដោយឡែកវាគ្មិនដែលបង្ហាញក្នុងកិច្ចពិភាក្សានេះរួមមាន៖ លោក ឌឹម សុវណ្ណារុំ សមាជិកគណៈកម្មការធិការជាតិរៀបចំការបោះឆ្នោត, លោកបណ្ឌិត ជិន ម៉ាលីន រដ្ឋលេខាធិការក្រសួងយុត្តិធម៌, លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល, លោក Luca SCHIO ប្រធានសម្ព័ន្ធអ្នកសង្កេតការណ៍ការបោះឆ្នោតអន្តរជាតិ ដែលមានមូលដ្ឋាននៅទីក្រុងប៉ារីស (IAEO), លោក Hubert Moshe HADDAD ទីប្រឹក្សាប្រធានាធិបតីកូតឌីវ័រ និងលោក Francis Gabriel OKE លេខាធិការអចិន្ត្រៃយ៍នៃសហគមន៍សេដ្ឋកិច្ច នៃរដ្ឋអាហ្វ្រិកខាងលិច ដែលមានប្រទេសចំនួន១៥ នៅអាហ្វ្រិកខាងលិចជាសមាជិក (ECOWAS) (ចូលរួមតាមរយៈ Zoom) និងលោកបណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី។
សូមបញ្ជាក់ថា កាលពីថ្ងៃទី២៣ ខែកក្កដា ឆ្នាំ២០២៣កន្លងទៅនេះ ប្រទេស កម្ពុជា បានរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៧ ដោយមានគណបក្សនយោបាយចូលរួមប្រកួតប្រជែងចំនួន១៨។ ប្រជាពលរដ្ឋរហូតដល់ទៅជាង ៨៤ភាគរយ នៃចំនួនប្រជាពលរដ្ឋក្នុងបញ្ជីឈ្មោះបោះឆ្នោតជិត១០លាននាក់ បានចេញទៅបោះឆ្នោត។
លទ្ធផលបណ្តោះអាសន្នចេញដោយគណៈកម្មាធិការជាតិរៀបចំការបោះឆ្នោត បានបង្ហាញថា គណបក្សប្រជាជនកម្ពុជា ទទួលបានសំឡេងគាំទ្រជាង ៦លាននាក់ ហើយគណបក្សហ៊្វុនស៊ិនប៉ិច ទទួលបានសំឡេងគាំទ្រជាង ៧០ម៉ឺននាក់។
តាមសំឡេងឆ្នោតដែលបានបង្ហាញនេះ គណបក្សប្រជាជនកម្ពុជា អាចនឹងទទួលបានអាសនៈនៅក្នុងរដ្ឋសភាចំនួន ១២០អាសនៈ ហើយគណបក្សហ៊្វុនស៊ិនប៉ិចទទួលបានអាសនៈនៅក្នុងរដ្ឋសភា ៥អាសនៈ៕
